Pa danych Biełstata, sa studzienia pa sakavik 2022 hoda Biełaruś zaviezła z Danii amal 3 tysiačy śviniej. Dla paraŭnańnia: u minułym hodzie byli zakuplenyja 232 śvińni. Roźnica ŭ 13 razoŭ.
Zrešty, letašnija śvińni byli parodzistyja i kaštavali pa 1048 dalaraŭ. A ŭ hetym hodzie zakuplenyja parasiaty da 50 kh vahoj pa canie 80 dalaraŭ za adnaho.
Jašče kraina zakupiła 24 koniej, pryčym dvuch ź ich va Ukrainie, astatnich 22 — u krainach ES: 9 — u Niderłandach, 5 — u Hiermanii, pa 2 — u Bielhii, Polščy i Čechii i pa adnym — u Estonii i Vienhryi. Siaredniaja cana za kania — 763 dalary. U minułym hodzie ŭ pieršym kvartale Biełaruś impartavała 14 koniej, ale daražej, pa 871 u.a. u siarednim, u tym liku troch skakunoŭ z Łatvii pa tysiačy dalaraŭ kožny.
Čystaparodnuju bujnuju rahatuju žyviołu impartavali ŭ kolkaści 392 štuki (u tym hodzie było bolš — 891). Siaredniaja cana na parodzistych karoŭ i bykoŭ skłała 2781 dalar, zavozili ich z Danii. Ale byli 12 asobin z Hiermanii amal pa 8 tysiač dalaraŭ za adnu.
Kuraniat u pieršym kvartale 2022 hoda zavieźli ŭ 3,7 raza bolš, čym u minułym hodzie. Darečy, samy bujny pastaŭščyk kuraniat —Vienhryja. Kačaniat u Biełaruś zavoziać vyklučna z Francyi, a indyčaniat — z Rasii, choć hod tamu pałova impartu była z Polščy i Słavakii.
Pryvodzicca statystyka i pa impartnych nasiakomych. Viadoma, što ŭ pieršym kvartale 2022-ha było zakuplena za miažoj 737 pčoł pa canie 41 dalar za adnu. Pčoły rasijskija. Darečy, letaś jany byli na dva dalary daražejšyja. Zavieziena ŭ Biełaruś jašče asobin inšych žyvych nasiakomych. Jakich mienavita — nie ŭdakładniajecca. Ale viadoma, što častka ź ich z Rasii pa 75 dalaraŭ i častka ź Ispanii — pa 22 dalary za kazurku.
Cikavaja hieahrafija zakupak zamarožanaj ryby. Amal pałova jaje impartujecca z Rasii, a ŭ top-5 inšych krain, jakija pastaŭlajuć zamarožanuju rybu ŭ Biełaruś, uvachodziać Narviehija, Isłandyja, Farerskija astravy, Finlandyja i Estonija. Bolš za ŭsio krevietak na biełaruskich pryłaŭkach rodam ź Indyi.
U pieršyja try miesiacy hoda ŭ 11 razoŭ vyras impart žyvych i śviežych amaraŭ — zavieziena 852 kiłahramy suprać 78 letašnich. Amary laciać u Biełaruś z Kanady, kaštujuć 37 dalaraŭ za kiło. Darečy, u minułym hodzie byli daražejšyja — pa 44.
Žyvych i śviežych krabaŭ u minułym hodzie kraina naohuł nie ŭvoziła, a ŭ hetym zakupili 180 kh pa 32 dalary za kiło. A voś chaładnavodnych krevietak z Hiermanii pa 2 dalary za kiłahram u 2021 hodzie kupili 4 tony, a ŭ hetym abyšlisia bieź ich. Roŭna jak i biez žyvych i śviežych karakacic i kalmaraŭ.
Ale biez vustryc nie abyšlisia. Zusim nievialikuju ich častku zakupili ŭ Rasii, tanna — pa 6 u.a. za kiło. Ale ŭ asnoŭnym impart vustryc idzie z Francyi i abychodzicca ŭ 16 dalaraŭ za kiło. Vustrycy, darečy, padaraželi — u minułym hodzie rasijskija, i francuzskija kaštavali na 2 dalary mienš.
Zatoje ceńnik na rasijskija hrabiańki ŭdvaja ŭpaŭ — u tym hodzie Biełaruś kuplała ich pa 14 dalaraŭ za kiłahram, a ŭ hetym — pa 7.
Ź niezvyčajnaha tavaru — čałaviečyja vałasy: ich kupili 323 kiłahramy ŭ dźviuch krainach. Dziasiatuju častku — va Uźbiekistanie pa 34 dalary za kiło, astatniaje — u Indyi pa 10 dalaraŭ.
U śpisie impartu jość jašče byčynaja śpierma, jaje Biełaruś kupiła ŭ Rasii, 15 kiło pa 2033 dalary za adzin.
