Fota: pixabay.com
Chvarobu Łajma vyklikajuć bakteryi pad nazvaj «barelii». Jany traplajuć u arhanizm čałavieka pry ŭkusie klašča, aktyŭna razmnažajucca i razam z kroŭju raznosiacca pa arhaniźmie. Barelii zdolnyja vyklikać ciažkija paškodžańni sustavaŭ, niervovaj sistemy, serca i inšych orhanaŭ. U najbolš ciažkich vypadkach nie vyklučany latalny zychod.
Adzin z samych viadomych vypadkaŭ chvaroby — historyja kanadskaj śpiavački Aŭrył Łavin, jakaja mieła šalonuju papularnaść na pačatku nulavych. Viasnoj 2014 hoda jaje ŭkusiŭ klešč, i chutka ŭ Łavin pačalisia niezrazumiełyja boli i prystupy słabaści. Stan śpiavački chutka paharšaŭsia, a daktary nijak nie mahli pastavić pravilny dyjahnaz. Vypadkova znajomaja śpiavački, jakaja sama raniej lačyłasia ad chvaroby Łajma, nakiravała Aŭrył da nieabchodnaha śpiecyjalista.
Artystka raspaviadała, što praz chvarobu praviała ŭ łožku dva hady i była vymušanaja pić niekalki vielmi mocnych antybijotykaŭ. Časam Łavin zdavałasia, što jana pamiraje, bo joj nie chapała pavietra dla dychańnia. Jana viarnułasia na scenu tolki ŭ 2018 hodzie.
Aŭrył Łavin u 2014 hodzie. Fota: commons.wikimedia.org
Jak zrazumieć, što ŭ vas moža być barelioz
Klaščy pieranosiać nie tolki barelioz, ale i inšyja zachvorvańni, samaje viadomaje ź jakich — kleščavy encefalit. Baraćbu z hetymi chvarobami varta pačynać z prafiłaktyki ŭkusaŭ klaščoŭ — naprykład, z vykarystańnia supraćklaščovych sprejaŭ ci vadkaściej.
Kali vy znajšli ŭ siabie na skury klašča, vydalać jaho treba aściarožna (padrabiaźniej možna pračytać tut).
Paśla ŭkusu klašča nazirajcie za svaim stanam, kab nie prapuścić mahčymyja simptomy bareliozu. Miedyki vydzialajuć try etapy raźvićcia hetaj chvaroby:
- łakalnaje raźvićcio infiekcyi ŭ miescy ŭkusu (3-30 dzion paśla ŭkusu).
- aktyŭnaje raspaŭsiudžvańnie infiekcyi pa ŭsim arhaniźmie (1-3 miesiacy paśla ŭkusu).
- aŭtaimunnyja parušeńni i hłybokija paškodžańni ŭnutranych orhanaŭ i sistem arhanizma (6 miesiacaŭ — 2 hady paśla ŭkusu).
Praściej za ŭsio vylečyć chvarobu Łajma, kali jaje dyjahnastujuć na samaj pieršaj stadyi. Voś try rannija simptomy bareliozu:
- Mihrujučaja erytema — čyrvony ci błakitna-čyrvony syp na skury. Zvyčajna jon maje vyhlad plamy z praśviatleńniem u centralnaj častcy, časam u erytemie čarhujucca čyrvonyja i śvietłyja abadki. Plama moža źjavicca jak praz try dni paśla ŭkusu, tak i praź miesiac, jana moža pašyracca i ŭ vyniku pieravysić 5 santymietraŭ u dyjamietry.
- Limfacytoma — čyrvonaje ci błakitna-čyrvonaje ŭtvareńnie na skury nakštałt šyški, jakoje nie balić. Limfacytoma sustrakajecca davoli redka, čaściej za ŭsio ŭ dziaciej. Zvyčajna jana ŭtvarajecca na vušnoj rakavinie ci na hrudziach.
- Padobnyja da hrypu simptomy, jakija zvyčajna doŭžacca niekalki dzion i prachodziać samastojna. Havorka pra ahulnaje paharšeńnie samaadčuvańnia, u tym liku pra hałaŭny bol, bol u muskułach i sustavach i pavyšeńnie tempieratury.
Kali vy znajšli ŭ siabie adzin abo niekalki ź pieraličanych simptomaŭ, pierš za ŭsio padumajcie pra toje, ci nie pravodzili vy niadaŭna čas na pryrodzie — naprykład, u lesie ci parku. I padumajcie nad tym, kab źviarnucca da doktara, asabliva kali ŭ vas nie mienš za dva simptomy sa śpisu.
Klaščoŭ usio bolš. Dzie i pa čym možna pryščapicca ad kleščavoha encefalitu
