Volha Pavuk. Fota: «Jeŭrapiejski vybar»
Stvaralnicaj pietycyi stała Volha Pavuk, aktyvistka rodam z Homielskaj vobłaści.
«Ideja pryjšła na Forumie Kalinoŭskaha. Była razmova pra toje, što ciapier jašče možna zrabić dla Biełarusi. Unutry krainy mała mahčymaściaŭ, a z-za miažy nie tak dobra atrymlivajecca ŭpłyvać. Tam prysutničali jeŭraparłamientaryi, litoŭskija palityki, my razam abmiarkoŭvali, što rabić z našym hieapalityčnym vyznačeńniem. I spynilisia na takoj inicyjatyvie.
Ciapier mnohija z apazicyjnaj supolnaści, jakaja była nastrojenaja suprać Łukašenki, źjechali, jak praviła, na Zachad. Kali my chočam abaranić našy pravy, to šukajem takija mahčymaści ŭ Jeŭropie. Kali chočam vyratavać krainu, to nam treba ščylna ŭzajemadziejničać ź Jeŭrasajuzam», — ličyć jana.
Na pytańnie, čamu takaja pietycyja źjaviłasia ciapier, Volha kaža, što z hetym biełarusy vielmi spaźnilisia. Treba było pačynać dva hady tamu, a paskoryłasia ŭsio z-za pačatku vajny.
Sens pietycyi — pakazać śvietu, što biełarusy suprać vajny, akupacyi Kramlom. Takaja inicyjatyva — pieršy krok da samavyznačeńnia, ličyć Volha Pavuk.
«My stali dziejničać «źnizu», bo «źvierchu» niemahčyma. Ličba pakaža, kolki nas nasamreč. Jaki sens my ŭ hetym bačym? Kaniečnie, nie toj, što nas adrazu voźmuć u Jeŭrasajuz.
Heta krok, paśla jakoha śviet zrazumieje, što biełarusy nie chaŭruśniki Kramla. Heta toj samy marš, jak u 2020-m, tolki iści nikudy nie treba. Prosta nacisnuć knopku i pakazać, što nas šmat», — tłumačyć jana ideju.
Fota: «Jeŭrapiejski vybar»
«Biełarusaŭ ciapier pradstaŭlaje Śviatłana Cichanoŭskaja, Pavieł Łatuška, dyjaspary. Zdajecca, što tolki jany ŭ nas jość.
Biezumoŭna, niekatoryja ludzi pra našu inicyjatyvu buduć dumać, što heta niejkaja kankurencyja ŭ apazicyi. Nie. Pa-pieršaje, majo asabistaje staŭleńnie da palityčnaha žyćcia ŭ tym, što inicyjatyva pavinna być roznaja, a meta adna. Kali my idziom roznymi šlachami, to možam pryciahnuć ludziej, jakija raniej nie prymali ŭdzieł u niejkich aktyŭnaściach. Pa-druhoje, kožny biełarus maje prava na inicyjatyvu», — kamientuje jana.
U arhkamitecie inicyjatyvy 10 čałaviek: Volha Šparaha (Ofis pa adukacyi dla novaj Biełarusi), Aleś Čajčyc (Rada BNR), Vadzim Sarančukoŭ (BNF), Volha Pavuk («Jeŭrapiejski vybar») i inšyja.
Padtrymali ideju ofis Śviatłany Cichanoŭskaj, partyja «Narodnaja hramada», BNF, Uładzimir Niaklajeŭ, Rada BNR, Alesia Rudnik i inšyja.
Fota: «Jeŭrapiejski vybar»
«Kali my nie zmožam zrabić hety vielmi prosty krok, to ja bajusia, što nie atrymajecca ničoha. Bolš składanyja rečy buduć niemahčymyja», — tłumačyć Volha svaju pazicyju.
Podpisy pad pietycyjaj — arhumient biełarusaŭ, kab praciahvać dyjałoh ź Jeŭropaj.
«I Polšča, i Litva, i Łatvija chočuć mieć adekvatnaha susieda, ich intares vielmi naturalny, — kaža Volha. — Jany dobra pamiatajuć, što było ź imi paśla vychadu z Savieckaha sajuza, tamu chočuć ad serca dapamahać biełarusam».
Ci nie źbirajecca sama Volha ŭ palityku?
Fota: «Jeŭrapiejski vybar»
«Kali pažanilisia z Andrejem Pavukom, my stali žyć u Akciabrskim rajonie. Pačali razvaročvać bytavyja temy. Naprykład, nakont placovak, balnic, razmaŭlali z čynoŭnikami. Z 2016 pa 2018 hod ja była ŭ Abjadnanaj hramadzianskaj partyi, potym pierajšła ŭ «Havary praŭdu». Mnie padabałasia, što jany šmat kamunikujuć ź ludźmi. Možna skazać, što ŭ palitycy ja daŭno, dumała, što ŭ 2020-m skonču hety šlach, budu hadavać dziaciej, ale nie atrymałasia.
Ja razumieju, što situacyja dla Biełarusi nie palapšajecca, i heta maja asabistaja apošniaja sproba pakazać, što biełarusy nie źmirylisia z hetaj situacyjaj», — padsumoŭvaje Volha Pavuk.