U kancy sakavika 2022 hoda suprać administratarki telehram-kanału «Kiroŭcy 97%» Viktoryi Kulšy zaviali novuju kryminalnuju spravu za złosnaje niepadparadkavańnie administracyi kałonii (č. 1 art. 411 KK). Heta ŭžo druhi viadomy pravaabaroncam vypadak, kali administracyja papraŭčaj kałonii №4 inicyjuje zaviadzieńnie kryminalnaj spravy suprać palitźniavolenych. Niadaŭna pa hetym artykule da adnaho hoda źniavoleńnia asudzili Palinu Šarendu-Panasiuk.
Spravu Viktoryi razhladali na vyjaznym pasiadžeńni na terytoryi kałonii, tamu svajakoŭ nie prapuścili na sud. Prakuror zapytaŭ dla Viktoryi hod źniavoleńnia — mienavita takoje pakarańnie i pryznačyŭ sudździa Siarhiej Malcaŭ.
Inžynierku pa achovie pracy zatrymali 4 listapada 2020 hoda za toje, što jana administravała telehram-kanał i čat «Kiroŭcy 97%». U lutym 2021 hoda Viktoryju asudzili pa č. 1 i č. 2 art. 342 Kryminalnaha kodeksa (Arhanizacyja i padrychtoŭka dziejańniaŭ, jakija hruba parušajuć hramadski paradak) da 2,5 hadoŭ kałonii. Sudovy praces prachodziŭ u zakrytym režymie. Zhodna z tekstam abvinavačvańnia, Viktoryja razam ź jašče tryma abvinavačanymi, «dziejničajučy ŭ złačynnaj zmovie, naŭmysna zaklikali da masavych biesparadkaŭ, błakavańniaŭ daroh u suviazi ź niezadavolenaściu ŭładaj i falsifikacyjaj vybaraŭ».
Viadoma, što ŭ kałonii na Kulšu akazvali cisk: u sakaviku minułaha hoda jaje pakarali 10 sutkami ŭ karcary za bieł-čyrvona-biełuju zakołku, jakuju jana pryčapiła da Dnia Voli.
U chutkim časie palitźniavolenuju pieraviaduć u homielskaje SIZA-3, dzie jana budzie znachodzicca da razhladu apielacyjnaj skarhi.
Pa danych pravaabaroncaŭ, za apošni hod jak minimum 24 palitźniavolenych pieraviali ŭ «krytuju» turmu, i suprać jašče dziesiaci raspačali kryminalnyja spravy pa art. 411 KK.
