Usie fota: alexanderrybak.com
U 2016 hodzie jon byŭ na «Słavianskim bazary ŭ Viciebsku». U 2018 sprabavaŭ jašče raz skaryć «Jeŭrabačańnie», ale na hety raz biespaśpiachova, jon staŭ usiaho tolki 15-m. Z taho času viestak pra muzyku zusim mała.
Pandemija i adsutnaść hastrolaŭ ciažka dałasia ŭsim artystam. Alaksandr vyrašyŭ vykarystać čas prastoju, kab zaniacca svaim zdaroŭjem.
Jak vyśvietliłasia, šmat hadoŭ u jaho była zaležnaść ad snatvornaha i antydepresantaŭ. «Na praciahu 11 hadoŭ ja byŭ zaležnym ad snatvornaha i antydepresantaŭ. Spačatku ŭsio było dobra, ale ŭ vyniku majo žyćcio ledź nie razburyłasia. Sa studzienia 2020 hoda ja pačaŭ kurs reabilitacyi (pry dapamozie maich daktaroŭ) i pastupova prychodžu ŭ paradak», — pryznaŭsia Alaksandr Rybak u sacsietkach.
Mahčyma, na lačeńni nastojvała taksama dziaŭčyna, jakaja była ŭ toj čas pobač ź im. Jaje zavuć Jula. Viadoma, što jany paznajomilisia praź Cindar i niekatory čas sustrakalisia. Va ŭsiakim razie, Alaksandr publikavaŭ u sacsietkach sumiesnyja ź joj fota i navat pryśviaciŭ joj pieśniu I Came to Love You. Sudziačy pa ŭsim, udvaich ź Julaj jany vandravali pa Amierycy. I ŭsio ž praź niekatory čas vyrašyli rasstacca.
Rybaku ŭžo 36 hadoŭ, jon nikoli nie byŭ žanaty i, zdajecca, ciapier znoŭ adzin.
U žniŭni 2020 hoda Alaksandr Rybak paviedamiŭ, što pastupiŭ u mahistraturu pryvatnaha Kałumbijskaha kaledža ŭ Čykaha (Ilinojs, ZŠA), kab atrymać dypłom kinakampazitara.
Niadaŭna Alaksandr vykłaŭ videa, dzie hraje na skrypcy pieśniu «Stefanija» ŭkrainskaha hurta Kalush Orchestra (pieramožcy «Jeŭrabačańnia» ŭ hetym hodzie).
A jašče ŭ mai Rybak kranalna pavinšavaŭ svaich baćkoŭ z dniom naradžeńnia. Mamie jon pryśviaciŭ videa z kancerta. A ŭ dzień naradžeńnia taty zapisaŭ «Marš» z «Kamiernaj simfonii», jakuju napisaŭ imianińnik.
Rybak z prychilnicami
U paście śpiavak napisaŭ, što mienavita baćka navučyŭ jaho hrać na skrypcy, pisać muzyku i šmat u čym paŭpłyvaŭ na jaho śvietapohlad. «Narodžany ŭ Biełarusi (u toj čas Saviecki Sajuz), jon zaŭsiody byŭ zmaharom za svabodu. Kali jon zakachaŭsia ŭ Narviehiju, napisaŭ hetuju pryvidnuju simfoniju, spadziejučysia, što my z mamaj uźjadnajemsia ź im u jaho novaj krainie», — raspavioŭ artyst.
A zusim niadaŭna Alaksandr Rybak paviedamiŭ, što hatovy adpravicca ŭ novy tur. «Moj pieršy tur z pačatku pandemii. Moj pieršy tur paśla taho, jak ja kinuŭ snatvornaje!» — napisaŭ jon. Pakul paviedamleńniaŭ nakont raskładu tura niama.
