Budynak hałoŭnaha štaba Słužby biaśpieki Ukrainy (SBU) ŭ Kijevie, Fota: Schutterstock.com
Maje vyšejšuju adukacyju i siamju va Ukrainie
Zatrymany biełarus pražyvaje va Ukrainie z 2006 hoda na padstavie vidu na stałaje žycharstva. Jon maje siamju i niepaŭnaletniaje dzicia.
Mužčyna, jakoha padazrajuć u špijanažy na karyść «varožych śpiecsłužbaŭ», naradziŭsia ŭ Małaryckim rajonie Brescakaj vobłaści i maje vyšejšuju adukacyju.
Jaho advakat nie paviedamiŭ «Svabodzie» imia svajho padabaronnaha, abhruntavaŭšy heta metami biaśpieki jak dla zatrymanaha, tak i dla jaho siamji. «Ja nie mahu paviedamić vam jaho asabistyja źviestki. Heta navat u intaresach biaśpieki jaho siamji», — skazaŭ jon.
Rasśledavańnie spravy praciahnuli
Hramadzianina Biełarusi zatrymali 18 sakavika. Dasudovaje rasśledavańnie spravy musili zakončyć 18 maja, ale śledčyja nie zmahli svoječasova pravieści ekśpiertyzy, tamu źviarnulisia ŭ sud, kab praciahnuć rasśledavańnie spravy da 18 lipienia.
«Moj padabaronny źviarnuŭsia ŭ SBU, kab paviedamić, što jaho majuć namier zavierbavać śpiecsłužby Biełarusi, a jaho zatrymali i abvinavacili ŭ špijanažy. SBU, zamiest taho, kab vykarystać jaho jak mahčymaha patencyjnaha ahienta ŭ intaresach Ukrainy, pastaviła sabie «ptušačku» i zaviała kryminalnuju spravu», — paviedamiŭ «Svabodzie» advakat. Jon taksama prasiŭ nie nazyvać jaho imia.
«Prapanavali chatni aryšt pad zakład»
U sakaviku sud pry razhladzie chadajnictva śledstva ab praciahu ŭtrymańnia biełarusa pad vartaj uchvaliŭ mahčymaść uniasieńnia finansavaha zakładu. Pry apłacie 1984800 hryŭniaŭ (na toj momant amal 67 tysiač dalaraŭ u ekvivalencie) biełarusa mahli pieravieści pad chatni aryšt.
Ale takich hrošaj u siamji niama.
«Mahu skazać, što prymianiajucca niedazvolenyja mietady praviadzieńnia dasudovaha rasśledavańnia. Detali, kali ja heta zmahu dakazać, adpaviedna zmahu taksama paviedamić», — paviedamiŭ advakat biełarusa.
Juryst pakul nie viedaje, ci dazvolać praviadzieńnie suda ŭ adkrytym dla žurnalistaŭ režymie. Nieŭzabavie śledstva maje źviarnucca ŭ sud, kab čarhovy raz padoŭžyć termin utrymańnia pad vartaj i praviadzieńnia dasudovaha rasśledavańnia.
Jakich ekśpiertyz čakajuć śledčyja
Śledčyja tłumačać nieabchodnaść praciahieńnia terminaŭ rasśledavańnia spravy tym, što jašče nie zaviaršylisia ekśpiertyzy.
U pryvatnaści, ad kamandujučaha suchaputnych vojskaŭ Uzbrojenych sił Ukrainy čakajuć zaklučeńnia pa vynikach praviadzieńnia ekśpiertyzy ŭ śfiery dziaržaŭnaj tajny.
Asobna ŭkrainski navukova-daśledčy instytut śpiecyjalnaj techniki i sudovych ekspertyz SBU pravodzić kampjutarna-techničnuju ekśpiertyzu mabilnaha telefona, jaki zabrali ŭ biełarusa pry zatrymańni.
Śledčyja nie vyklučajuć, što pa vynikach ekśpiertyz hramadzianinu Biełarusi mohuć źmianić abvinavačańnie, a taksama vyznačycca z pravavoj kvalifikacyjaj «dziejańniaŭ mahčymych saŭdzielnikaŭ padazravanaha». Heta adznačajecca ŭ pastanovie suda ab praciahnieńni rasśledavańnia da 18 lipienia.
Zhodna z ukrainskim zakanadaŭstvam, hramadzianinu Biełarusi pahražaje pazbaŭleńnie voli na termin ad 10 da 15 hadoŭ z kanfiskacyjaj majomaści, abo bieź jaje.
Pieršaha «biełaruskaha špijona» dahetul nie mohuć asudzić
U červieni 2017 hoda na ŭkrainskim pamiežnym pierachodzie «Novyja Jaryłavičy», što na miažy ź Biełaruśsiu, pa padazreńni ŭ špijanažy zatrymali biełaruskaha hramadzianina Juryja Palityku. Jon adsiadzieŭ u śledčym izalatary da kastryčnika 2019 hoda, pakul jaho nie abmianiali na ŭkrainskaha žurnalista Paŭła Šarojku, zatrymanaha ŭ Biełarusi pavodle anałahičnaha abvinavačańnia i asudžanaha na 8 hadoŭ pazbaŭleńnia voli.
Juryj Palityka, jak i zatrymany na Vałyni hramadzianin Biełarusi, taksama abvinavačvajecca pavodle častki 1 artykuła 114 Kryminalnaha kodeksa Ukrainy ab špijanažy.