Dźmitryj Tankovič: «Ja znachodžusia na baku praŭdy i ščyra vieru, što jana pieramoža». Skrynšot: Nexta Live
Pry kancy červienia ŭ efiry kanała Nexta Live źjaviłasia novaja pieradača «A ja vam zaraz pakažu».
Kožny vypusk — heta 10—12 chvilin hodnaj ironii, a miescami satyryčnaha ściobu, abjektam jakich vystupajuć samyja absurdnyja dy rezanansnyja padziei na terytoryi Ukrainy, Rasii dy Biełarusi. Cikava, što tvaram prajekta staŭ viadomy biełaruski šoŭmien Dźmitryj Tankovič, jaki doŭhi čas pracavaŭ viadučym na ŭkrainskim telekanale «Kijeŭ».
«Nasamreč, ideja źjaviłasia jašče ŭ lutym — za dva dni da pačatku rasijskaha ŭvarvańnia, — raspavioŭ «Našaj Nivie» były frantmien minskaj kamandy KVZ «ČP». — Ale vajna zbłytała ŭsie płany.
Zrazumieła, što pieršymi tydniami sakavika ŭsim było nie da pieradačy. Tamu zapusk piłota adkłali. Adnak paśla pytańnie infarmacyjnaj dapamohi frontu dy krainie znoŭ nabyło aktualnaść. My aktyvizavalisia — i zaraz vynik bačny ŭsim».
Cikava, što pieršapačatkova prajekt «razmaŭlaŭ» vyklučna na ŭkrainskaj movie i vychodziŭ jak na telekanale «Kijeŭ» — asnoŭnym pracoŭnym miescy humarysta ŭ ŚMI — tak i na jutub-kanale viaščalnika. Paśla cikavaść da pieradačy prajaviła Nexta Live, i tekst pajšoŭ na jaje płatformie ŭ ruskim varyjancie. Tamu zaraz Tankoviča čujuć i razumiejuć amal u kožnaj krainie byłoha Savieckaha Sajuza. Da taho ž prahladaŭ niamała dadajuć karystalniki ź Jeŭropy i ZŠA.
Zapis pieradačy adbyvajecca va ŭkrainskaj stalicy, paśla čaho sihnał pieradajecca Nexta Live. «Usio adbyvajecca va ŭmovach i pa zakonach vajennaha času, — paśmichajecca Dźmitryj.
— Robim kožny vypusk maksimalna chutka, maksimalna biudžetna, ale imkniemsia zachoŭvać vysokuju jakaść materyjału dy karcinki».
Značnaść prajekta dla siabie i dla kožnaha ŭdzielnika «A ja vam zaraz pakažu» šoŭmien akreślivaje davoli prosta: my prahniem, kab nas pačuli.
«Va ŭmovach infarmacyjnaj błakady ŭ Rasii, Biełarusi, a časami i ŭ Jeŭropie (prynamsi da błakavańnia RT i ŚMI anałahičnaha kštałtu) važna, kab ludzi bačyli vonkavy bok źjavaŭ, pra jaki navat padumać nie mahli, i razumieli toje, što zastavałasia pa-za ŭvahaj», — tłumačyć Tankovič.
Scenary pieršych pieradač Dźmitryj pisaŭ samastojna, što, darečy, i praciahvaje rabić u dačynieńni da ŭkrainskich vypuskaŭ.
Prahramy ž, jakija bolš adrasavanyja biełaruskaj aŭdytoryi, apošnim časam dapamahajuć stvarać suajčyńniki humarysta.
Da statusu ekstremista, jaki šoŭmien aŭtamatyčna atrymaŭ paśla supracoŭnictva z zabaronienym biełaruskimi ŭładami Nexta Live, Tankovič stavicca sarkastyčna.
«Nie adčuvaju siabie niejkim padryŭnikom spakoju, bo nie źviartaju ŭvahi na vysiłki biełaruskaj albo rasijskaj prapahandy. Tak, mienavita jany padkidajuć temy dla novych vypuskaŭ pieradačy. Ale na piersanalnym uzroŭni jany nie vartyja ŭvahi, — padkreślivaje Dźmitryj. I ŭdakładniaje svajo śvietaadčuvańnie: — Ja znachodžusia na baku praŭdy i ščyra vieru, što jana pieramoža, jak by pafasna heta ni hučała».
Čytajcie taksama:
«Niezłaśliva? My vyśmiejvali Łukašenku tak, jak rabiŭ heta ŭvieś biełaruski narod». Vialikaja hutarka z byłym kavezešnikam Dźmitryjem Tankovičam
