U Jeŭropie Biełaruś paprakajuć u parušeńni pravoŭ čałavieka, u toj čas jak u Niderłandach palicyja brutalna razhaniaje fiermieraŭ i zabivaje pratestoŭcaŭ. Pra heta ŭ prahramie «Kłub redaktaraŭ» zajaviŭ kiraŭnik BT.
«Na Zachadzie nas paprakajuć u tym, što my niedastatkova vykonvajem pravy čałavieka. Bolš za toje, represujem ludziej, a našy supracoŭniki pravaachoŭnych orhanaŭ vielmi žorstka dziejničajuć. Prytym što ŭ 2020 hodzie ludzi vyjšli z łozunhami ab źmienie ŭłady ŭ Biełarusi. Ličycca, što luby čałaviek moža vyjści na vulicu i vykazać svajo abureńnie dziejańniami ŭrada i jamu za heta ničoha nie pavinna być. Ale kali 30 hadoŭ tamu nam takija kazki možna było raskazvać, to siońnia kožny minak — heta reparcior. Tamu ŭ našym rasparadžeńni dziasiatki, sotni i tysiačy faktaŭ žorstkaha abychodžańnia palicyi krain Zachadu sa svaimi hramadzianami. A na Zachadzie ludzi vychodziać ź niejkimi biaskryŭdnymi rečami», — śćviardžaje Ivan Ejsmant.
«U Hałandyi zaraz razhaniajuć fiermieraŭ. Adkryli stralbu na paražeńnie i zabili maładoha chłopca. A ŭ 2020 hodzie ŭrad Hałandyi asudžaŭ Biełaruś», — śćviardžaje kiraŭnik BT.
Što nie tak z hetymi zajavami?
Pa-pieršaje, antyŭradavyja pratesty — absalutna narmalnaja reč dla luboj demakratyčnaj i cyvilizavanaj krainy. U lubym hramadstvie zaŭsiody znojdziecca častka ludziej, jakaja budzie niezadavolenaja dziejańniami ŭrada i budzie hatovaja suprać hetaha ŭrada pratestavać.
Vystupać z łozunhami ab źmienie ŭłady — absalutna narmalna. Navat u demakratyčnych krainach, dzie, u adroźnieńnie ad łukašenkaŭskaj Biełarusi, hałasy realna ličać, a hramadzianie z roznych hrup majuć palityčnaje pradstaŭnictva ŭ orhanach ułady. I žychary demakratyčnych krain mohuć absalutna svabodna pratestavać i vystupać za źmienu ŭłady na mitynhach, i ich nichto nie budzie karać, kali jany nie parušajuć normaŭ hramadskaj biaśpieki i nie čyniać hvałt u dačynieńni da siłavikoŭ.
Palicyja i praŭda moža siłaj razhaniać pratesty, ale tolki ŭ vyklučnych vypadkach: kali pratestoŭcy pavodziać siabie ahresiŭna ź niebiaśpiekaj dla ludziej albo kali jany pieraškadžajuć pracy krytyčna važnaj dla funkcyjanavańnia dziaržavy infrastruktury.
Nichto ŭ Jeŭropie nie karaje za sam fakt vychadu na pratesty — kali i karajuć, to tolki za kankretnyja dziejańni, jakija niasuć pahrozu hramadskaj biaśpiecy. Nichto ŭ Niderłandach, jak u Biełarusi, nie hrabie ludziej u turmu za nalepku na mašynie z nacyjanalnym hierbam, za firanki koleru apazicyjnaj partyi, za kamientary ŭ sacsietkach ci za demanstracyju pa prajeznaj častcy darohi. Nichto nie abvinavačvaje ludziej ŭ tym, što jany imknucca «źmianić uładu šlacham vybaraŭ».
Padčas pratestaŭ hałandskich fiermieraŭ, pra jakija kaža Ejsmant, pratestoŭcy vykarystoŭvali traktary dy inšuju sielskahaspadarčuju śpiectechniku dla błakavańnia mahistralaŭ dziaržaŭnaha značeńnia i pikietavańnia aeraporta. Ničoha padobnaha ŭ Biełarusi padčas pratestaŭ 2020—2021 hadoŭ u pryncypie nie było. Pratesty za sumlennyja vybary i demakratyju ŭ Biełarusi byli našmat bolš mirnymi, čym ekanamičnyja pratesty hałandskich fiermieraŭ.
Akramia taho, miascovyja hałandskija ŭłady navat zapluščvali vočy na padobnyja akcyi fiermieraŭ i navat dazvalali im pikietavać aeraport (pry ŭmovie, što pikietoŭščyki nie buduć błakavać uźlotnyja pałosy dla miedycynskich viertalotaŭ z orhanami dla transpłantacyi). Palicyja zrabiła niekalki strełaŭ padčas pratestaŭ fiermieraŭ u Niderłandach tolki tady, kali niekatoryja z pratestoŭcaŭ na svaich traktarach chacieli najechać na palicejskich i ich techniku.
Bolš za toje, Ejsmant chłusić, kali kaža, što palicyja «zabiła maładoha chłopca». Nichto padčas incydentu nie paciarpieŭ.
Akramia taho, u demakratyčnych krainach luboje vykarystańnie zbroi siłavikami na akcyjach pratestu stanovicca abjektam dbajnaha rasśledavańnia, parłamienckich debataŭ, i kali budzie dakazana, što palicyja vykarystała zbroju niezakonna — heta moža kaštavać ministru ŭnutranych spraŭ partfiela albo ŭvohule pryvieści da adstaŭki ŭrada. Kałasalny kantrast z łukašenkaŭskaj Biełaruśsiu, dzie ŭłady nie pakłapacilisia navat pra imitacyju rasśledavańnia śmierci Ramana Bandarenki, nie kažučy ŭžo pra sapraŭdnaje rasśledavańnie.
Biełaruskaja prapahanda paśladoŭna dyskredytuje siłavyja struktury demakratyčnych krain dla taho, kab apraŭdać biezzakońnie łukašenkaŭskich siłavikoŭ i pierakanać biełarusaŭ u tym, što demakratyi niama nidzie: nie tolki ŭ Biełarusi, ale i na Zachadzie.
