Praryŭ rasijskaha vojska z Kryma ŭ Chiersonskuju vobłaść zastajecca ledź nie hałoŭnym jaje pośpiecham u sprobie ŭkrainskaha «blickryhu». Šturmavyja atrady Uzbrojenych sił RF užo ŭ pieršyja dni vajny zmahli prasunucca z paŭvostrava na pravy bierah Dniapra i zachapić Chierson.
Klučavym faktaram pośpiechu tady staŭ kantrol nad mastami, jakija pry najaŭnaści takoj vialikaj vodnaj pieraškody, jak raka Dniapro, majuć stratehičnaje značeńnie dla chutkaści nastupalnych apieracyj.
I choć dalejšaje prasoŭvańnie na Mikałajeŭ ukrainskaja armija zmahła spynić i navat adkinuć rasijanaŭ, svoj płacdarm na Dniaproŭskim pravabiarežžy tyja zachavali.
Zrešty, paśla pačatku udaraŭ USU pa mastach Chiersonskaj vobłaści budučynia hetaj rasijskaj hrupoŭki vyklikaje ŭsio bolš pytańniaŭ.
Nieŭzarvany Antonaŭski most i inšyja pierapravy
Praz Dniapro ŭ Chiersonskaj vobłaści jość usiaho try pierapravy: Antonaŭski aŭtamabilny most (ci prosta «Antonaŭski most») kala Chiersona, Antonaŭski čyhunačny most za 6 km ad jaho, a taksama damba Kachoŭskaha vadaschovišča ŭ Novaj Kachoŭcy — jašče za 70 km.
Klučavym ličycca mienavita Antonaŭski most — jon samy vialiki i blizki da Chiersona.
Hety most byŭ pabudavany ŭ 1985 hodzie, jon maje 31 aporu, jaho šyrynia 25 m, a daŭžynia — 1366 m. Most pierasiakaje Dniapro i jaho levy prytok Konku.
Rasijskaja armija zmahła zachapić Antonaŭski most na druhi dzień vajny — 25 lutaha Chiersonskaja abłasnaja administracyja paviedamiła, što, «niahledziačy na adčajnyja namahańni ŭkrainskaj armii, na žal, stračany kantrol nad pierapravaj u Chierson».
Čamu ŭkrainskaja armija nie ŭzarvała Antonaŭski most u pieršyja dni ŭvarvańnia — adna z zahadak taho etapu vajny. Tym bolš što, pa dumku bolšaści vajennych ahladalnikaŭ, razbureńnie hetych mastoŭ uvachodziła ŭ płany abarony poŭdnia Ukrainy i adpracoŭvałasia na vučeńniach.
Mahčymaj pryčynaj taho, što Antonaŭski most acaleŭ 24 i 25 lutaha, moh być usieahulny chaos pieršych dzion vajny, a taksama intensiŭny ruch cyvilnych praź jaho.
Dźmitryj Dazorčy, kamandzir tankavaj roty 59-j asobnaj motapiachotnaj bryhady, jakaja tady abaraniała most, raspaviadaje, što byŭ šakavany dziejańniami cyvilnych padčas bajoŭ za pierapravu.
«Voś jedzie pa moście tank, adkryvaje ahoń pa varožych celach, a nasustrač — lehkavik: ludzi sihnalać, mirhajuć, rukami machajuć, zdymajuć na telefony. Jechała fura, vorah strelnuŭ, mahčyma, u naš tank celiŭsia, a trapiŭ u furu. I voś jana ŭžo haryć, a ludzi ŭsio roŭna jeduć, zdymajuć usio na telefony. Dla mianie heta było šokam: tut praciahvajucca aktyŭnyja bajavyja dziejańni pa razbłakavańni mosta, a ludzi jak na niejkim 5D filmie ŭ pieršym šerahu», — raspaviadaje tankist.
Kachoŭskuju HES (jaje płacinu — inšuju pierapravu praz Dniapro ŭ Chiersonskaj vobłaści) rasijanie naohuł zachapili adrazu 24 lutaha — mienavita kala jaje pačynajecca Paŭnočna-Krymski kanał, razbłakavańnie jakoha było adnoj z hałoŭnych metaŭ Rasii.
«Miašok» dla rasijskaj hrupoŭki
Pieršy ŭdar USU pa Antonaŭskim moście byŭ naniesieny 19 lipienia, na nastupny dzień udar paŭtaryŭsia, a miascovyja akupacyjnyja ŭłady zajavili ab vymušanym pierakryćci pierapravy.
«Ruch my budziem pierakryvać. My znojdziem inšyja šlachi pierachodu praz Dniapro u horad Chierson. Horad nie zastaniecca biez złučeńnia ź levym bieraham», — raspavioŭ u razmovie z rasijskimi miedyja pradstaŭnik akupacyjnych uładaŭ Chiersonščyny Kirył Stremavusaŭ.
Jašče raniej stała viadoma ab abstrełach HES u Novaj Kachoŭcy.
«Antonaŭski most i most u Novaj Kachoŭcy — heta punkty źviazvańnia, ad jakich zaležyć mahčymaść viadzieńnia bajavych dziejańniaŭ rasijskimi vojskami na Pravabiarežžy. Heta dźvie klučavyja mahistrali, praź jakija rasijskaja armija pahražaje Mikałajevu i Kryvomu Rohu», — tłumačyć ukrainski vajenny karespandent Juryj Butusaŭ ŭ efiry svajho kanała «Butusaŭ+».
«Paśla taho, jak buduć źniščanyja masty, vorahu budzie vielmi ciažka zabiaśpiečvać pastaŭki svaim vojskam na pravym bierazie pantonami. Heta budzie ryzykoŭna, i prapusknaja zdolnaść pantonaŭ značna mienšaja. Takim čynam, buduć stvoranyja ŭmovy dla bolš aktyŭnych dziejańniaŭ ukrainskich vojskaŭ i možna budzie vyzvalić pravabiarežnuju častku Chiersonskaj vobłaści i padyści da samoha Chiersona i Novaj Kachoŭki», — dadaje Butusaŭ.
Ukrainski aficer, jaki słužyć na paŭdniovym kirunku, u razmovie ź Bi-bi-si na ŭmovach ananimnaści paćviardžaje važnaść błakavańnia Antonaŭskaha mosta zaraz.
«Kali jašče «režam» Novuju Kachoŭku — usia rasijskaja hrupoŭka budzie ŭ miašku. Biez łahistyki im kaniec. Jany razumiejuć ryzyku akružeńnia i ŭžo padciahvajuć pantony, — kaža vajskoviec. — Ale pantony — heta kuča času. Plus kali my dastajem most, to ŭdaryć pa pantonach budzie jašče praściej».
Aeradrom Čarnabajeŭka, na jaki jašče ŭ sakaviku rasijanie, miarkujučy pa ŭsim, uskładali vialikija nadziei pa zabieśpiačeńni chiersonskaj hrupy avijacyjaj z Kryma, paśla šmatlikich abstrełaŭ alternatyvaj mastam užo nie staŭ.
«U Čarnabajeŭku kali niešta z avijacyi prylataje, to ŭsiaho na paru chvilin. Asnoŭny aeradrom u ich u Čaplincy», — dadaje aficer. Čaplinka — pasiołak za 70 km na paŭdniovy ŭschod ad Chiersona, ciapier heta hłyboki tył rasijskaj armii.
A vajskovy ahladalnik i publicyst Michaił Žyrochaŭ u razmovie ź Bi-bi-si akcentuje ŭvahu na tym, što ŭkrainskamu vojsku važna zabłakavać i čyhunačny most.
«Kažučy tolki pra Antonaŭski most i Novakachoŭskuju dambu, nielha zabyvać jašče i pra čyhunačny most — a ŭ ciapierašnich umovach jon stanovicca dla rasiainaŭ navat bolš važnym, čym pieršyja dva, bo viadoma, što łahistyka rasiejskaha vojska trymajecca, pierš za ŭsio, na čyhunačnych pieravozkach», — kaža jon.
Abjezd
Błakavańnie abodvuch antonaŭskich mastoŭ — aŭtamabilnaha i čyhunačnaha — stavić pad pahrozu Chiersonski harnizon rasijskaj armii navat pry ŭmovie, što damba ŭ Novaj Kachoŭcy budzie cełaja.
Akramia raściažeńnia łahistyki na 70-kiłamietrovy abjezd tolki na pravym bierazie Dniapra, heta stvaraje novyja prablemy dla zabieśpiačeńnia rasijskaj hrupoŭki.
Bo abjaznaja daroha prachodzić praź jašče adnu raku — hetym razam Inhulec, — praź jakuju jość tolki adzin most u vioscy Darjeŭka. I jon taksama moža być razburany.
«A pantony na Inhulcy źnieści «HIMARSami» budzie nieskładana», — prahnazuje ŭkrainski aficer.
Źniščeńnie abo ahniavy kantrol?
U toj ža čas źniščeńnie (a nie paškodžańnie) mastoŭ, tym bolš takich mahutnych, jak antonaŭski, — niaprostaja zadača dla reaktyŭnaj artyleryi.
«Abjektyŭna ciapier u USU niama ahniavych srodkaŭ, kab całkam źniščyć antonaŭski most. Usie hetyja abstreły, jakija my bačym apošnija dni, nosiać nie bolš čym papieradžalny charaktar. Dla realnaha źniščeńnia patrebnyja nie HIMARS z rakietami z 90-kiłahramovaj bajavoj častkaj, i navat nie «kropki». Tut patrebnyja masiravanyja avijacyjnyja ŭdary 500-kiłahramovymi bombami», — adznačaje Michaił Žyrochaŭ.
«Navat rasijanie ź ich vialikimi mahčymaściami tolki z čaćviortaha razu zmahli źniščyć most praz Zatoku ŭ Adeskaj vobłaści, dy i heta značyć vialikija pytańni da ich vynikovaści», — dadaje jon.
«Tamu, dumaju, naša kamandavańnie vydatna razumieje prablemnaść paŭnavartasnaha źniščeńnia mosta i płanuje tolki ŭziać pad ahniavy kantrol usie try masty, kab takim čynam pierakryć zabieśpiačeńnie», — miarkuje vajskovy ahladalnik.
Tezis ab «ahniavym kantroli» (inšymi słovami — mahčymaści abstrelvać) nad mastami jak metu USU faktyčna paćvierdziŭ daradca kiraŭnika ofisa prezidenta Ukrainy Alaksiej Arastovič u niadaŭnim efiry na kanale «Fiejhin Live».
Pa jaho słovach, abstreły Antonaŭskaha mosta byli nakiravany nie stolki na źniščeńnie, kolki na «pieraškody ŭ ruchu hruzaŭ, ŭzbrajeńniaŭ, vajennaj techniki i žyvoj siły».
«Viadoma, zastalisia čyhunačny most i Novaja Kachoŭka, ale my ž pakazali: chłopcy, heta ŭsio pad ahniavym kantrolem USU», — patłumačyŭ Arastovič.
«U Kachoŭcy damba, jaje tak prosta nie razvališ. Ale tam možna ŭziać pad ahniavy kantrol usio, što ruchajecca. Jak tolki jano zasoŭvałasia — pa im palacieła. I žadajučych ruchacca budzie ŭsio mienš. A samaje hałoŭnaje — heta vielmi ŭskładnić hety ruch», — dadaŭ daradca.
A chiersonski žurnalist Ivan Ancipienka piša pra simvaličnaje značeńnie ŭdaraŭ pa Antonaŭskim moście: «paśpiachovyja dziejańni USU vakoł mosta i ŭdary pa rasijskich składach majuć surjozny psichałahičny efiekt: ludzi ŭ akupacyi bačać, što Ukraina nie pakinuła ich. I ŭsio roŭna, što rasijskaja prapahanda chłusić pra heta».
U toj ža čas razbureńnie Antonaŭskaha mosta tearetyčna ŭskładnić mahčymaści dla ŭkrainskaj armii nastupać na levy bierah Dniapra ŭ Chiersonskaj vobłaści, kali joj sapraŭdy ŭdasca viarnuć pad svoj kantrol Pravabiarežža.
Zrešty, rasijskaje vojska ŭ vypadku adstupleńnia, chutčej za ŭsio, i tak padarvie pierapravu.
«Viadoma, jość minus u tym, što Antonaŭski most potym treba budzie adbudoŭvać. Ale plusaŭ [jaho błakavańnia] bolš — heta mahčymaść davieści rasijanaŭ da zdačy ŭ pałon i źbierahčy Chierson ad razbureńnia», — ličyć ukrainski aficer, jaki vajuje na poŭdni.
Daradca kiraŭnika ofisa prezidenta Ukrainy Michaił Padalak napisaŭ 21 lipienia ŭ «tvitary»: «antonaŭski most — aktualny pakul «žest dobraj voli», jaki namiakaje: para rasiejskim vojskam dobraachvotna pakinuć Chierson. U advarotnym vypadku — pastajannyja abstreły, načnyja strachi, paničnyja ataki i HIMARS. Dyjapazon mahčymaściaŭ zvužajecca, jak i dakładnaść ukrainskaha artyleryjskaha ahniu».
