U nastupie pad Kryvym Roham udzielničajuć čačenskija dobraachvotniki, jakija vajujuć na baku Ukrainy. Fota AP Photo / Andrew Kravchenko
Rasijski šavinistyčny telehram-kanał «Rybaŕ», jaki maje šmatlikija krynicy ŭ armii i dazvalaje sabie pisać bolš, čym aficyjnyja ŚMI, paćvierdziŭ, što ŭkrainskija vojski praciahvali raźvivać pośpiech, dasiahnuty ŭ paniadziełak i aŭtorak 29 i 30 žniŭnia.
Pa infarmacyi «Rybaria», kala Andrejeŭki i Łazavoha ŭkrainskaja armija nie tolki, nasupierak śćviardžeńniem rasijskaj prapahandy, utrymała Suchi Stavok, ale vyjšła da vioski Bruskinskaje, praź jakuju idzie hałoŭnaja daroha da Davydavaha Brodu. Ukraincy ŭtrymali ŭsie zachoplenyja pierapravy cieraz raku Inhulec.
Karta frontu kala Suchoha Staŭka pa stanie na paśla abiedu 31 žniŭnia, zhodna z «Rybariem»
«USU ŭsio ž taki pašyryli zonu kantrolu kala Suchoha Staŭka i, zaniaŭšy Kastromku, vyjšli na paŭdniova-zachodniuju ŭskrainu vioski Bruskinskaje, praź jakuju idzie zabieśpiačeńnie hrupoŭki ŭ Davydavym Brodzie», piša «Rybaŕ».
Kala Pasad-Pakroŭskaha ŭkrainskija vojski zaniali Ciarnovyja Pody i vyjšli da Zialonaha Haju. Miarkujučy pa infarmacyi rasijskich błohieraŭ, tut praktyčna na 30-kiłamietrovym froncie ŭkraincam udałosia prasunucca na 1—10 km.
Karta frontu kala Pasad-Pakroŭskaha pa stanie na paśla abiedu 31 žniŭnia, zhodna z «Rybariem»
Na poŭdzień ad Kryvoha Roha stanovišča rasijskich vojskaŭ taksama zastajecca krytyčnym. «Da siaredziny dnia USU zmahli vycieśnić padraździaleńni US RF z paŭnočnych uskrain Archanhielskaha na zapasnyja pazicyi», — piša «Rybaŕ». «Vajskovyja kantynhienty ŭ Volhinie i Vysakopolli na dadzieny momant paśpiachova ŭtrymlivajuć abaronu ŭžo trecija sutki, — piša błohier. — Całkam viarnuć kantrol nad nasielenymi punktami nie ŭdajecca», — pryznaje jon.
Rasijskaja armija vykarystoŭvaje avijacyju, ale abmiežavanaja ŭ pierakidańni reziervaŭ, bo Kachoŭski, Antonaŭski i Darjeŭski masty paškodžanyja ahniom ukrainskaj artyleryi.
«Pačatak nastupleńnia praciŭnika adnačasova na cełym šerahu kirunkaŭ nie čakaŭsia, — pryznaje inšy telehram-kanał, «Dva majora». — Kankretnaja data nastupleńnia taksama nie prahnazavałasia».
«Da Chiersona praryŭ nie dapuščany, front u cełym vystajaŭ», — supakojvaje błohier.
Kanał pryznaje, što rasijskija vojski pierajšli da abarony, i suciašaje samoha siabie i padpisčykaŭ:
«Sam fakt pierachodu da aktyŭnaj abarony (heta taksama vid vajennaj apieracyi, Kurskaja duha z hetaha pačynałasia, ale jana rychtavałasia) kaža, što praciŭnik sprabuje ŭziać inicyjatyvu (naviazvać nam svaju volu na pole boju), pry hetym nie tolki na Chiersonskim kirunku».
Ukrainskaje kamandavańnie pakul ustrymlivałasia ad paviedamleńniaŭ pra vyzvaleńnie tych ci inšych nasielenych punktaŭ. Ukrainskaja artyleryja praciahvaje nanosić masiravanyja ŭdary, u tym liku pa dalokich tyłach praciŭnika.
