Ukrainski vajskoviec robić sełfi na fonie harmaty. Daniecki front, 3 vieraśnia. AP Photo / Kostiantyn Liberov
«Paŭnočnuju darohu na Kupiansk ŭkraincam udałosia jak minimum uziać pad ahniavy kantrol. Nočču išli bai kala Vołchavaha Jara i całkam dapuskaju, što sapierniku ŭdałosia vybić nas ź jaho. Bałakleja ŭ apieratyŭnym akružeńni, VSU buduć praciahvać raźvivać pośpiech i, całkam imavierna, što jany pasprabujuć vyjści da Kupianska, adrezaŭšy i Bałakleju, i Izium. Siły ŭ ich na heta jość, — piša rasijski šavinistyčny telehram-kanał «Staršie Eddy». — Pabačym, čym adkaža rasijski Hienštab i jaki ŭzrovień apieratyŭnaha mastactva jon prademanstruje», — z amal nieprychavanaj krytykaj dadaje jon.
Bałakleja — horad z nasielnictvam 27 tysiač čałaviek pamiž Charkavam i Iziumam na poŭdni Charkaŭskaj vobłaści. Heta važny transpartny vuzieł, u im mieściacca bujnyja savieckija arsienały ŭzbrajeńniaŭ, nastolki vializnyja, što ani ŭkraincy nie paśpieli ich całkam evakujavać da prychodu rasijan, ani rasijanie nie paśpieli ich vykarystać. Horad byŭ zaniaty rasijskimi vojskami 3 sakavika, na 8-y dzień vajny. Ad Bałaklei da Charkava prykładna 80 kiłamietraŭ, stolki ž da rasijskaj miažy.
Miarkujučy pa dopisach rasijskich błohieraŭ, u tym liku frantavych, ukrainskaja armija mocnym tankavym udaram prarvała ŭsie linii abarony na poŭnač ad Bałaklei i vyjšła ŭ tyły rasijskaj hrupoŭki, kułak jakoj znachodzicca pad Iziumam i, u vypadku ŭziaćcia Kupianska, apyniecca adrezany. Heta, u svaju čarhu, zdymie pahrozu sa Słavianska i Kramatorska.
Rasijskija resursy ŭčora jak pa kamandzie raspaŭsiudžvali post: «Nijakaj paniki niama. U Bałaklei stajali mabilizavanyja». Majucca na ŭvazie prymusova mabilizavanyja žychary akupavanych Danieckaj i Łuhanskaj abłaściej, jakija nie majuć achvoty vajavać.
Sens byŭ taki: u Bałaklei stajali słabyja siły, ale z padychodam udarnych častak rasijskaj armii situacyju ŭdasca vypravić.
Bližej da viečara pasłańnie źmianiłasia. «Biez paniki. U straty Bałaklei trahiedyi nie budzie», — napisaŭ rasijski «Palitnavihatar».
Nastup ukrainskich vojskaŭ pad Bałaklejaj pakazvaje, što ŭdary ŭkrainskich vojskaŭ pad Chiersonam mahli mieć na mecie adciahvańnie ŭvahi praciŭnika.
U kožnym razie, inicyjatyva na froncie pierajšła da ŭkrainskaha boku.
Vsiemirnyj dień uničtožienija vojennoj ihruški