Kanavałaŭ pracavaŭ na Viciebskaj dystancyi sihnalizacyi i suviazi UP «Viciebskaje adździaleńnie Biełaruskaj čyhunki». Jon byŭ zatrymany 6 sakavika 2022 hoda za «padrychtoŭku aktu teraryzmu».
Pa viersii MUS, mužčyna nibyta płanavaŭ vyviadzieńnie sa stroju sistem, jakija zabiaśpiečvajuć biaśpieku čyhunačnaha ruchu. 7 lipienia KDB unios Siarhieja ŭ «śpis terarystaŭ».
Sudovy praces raspačaŭsia 24 žniŭnia ŭ zakrytym režymie, tamu akaličnaści spravy pakul nieviadomyja.
Viadoma tolki, što Siarhiej Kanavałaŭ pryznany vinavatym u «naŭmysnych dziejańniach, skiravanych na ŭzbudžeńnie nacyjanalnaj i inšaj sacyjalnaj varožaści pa prykmiecie nacyjanalnaj i inšaj sacyjalnaj prynaležnaści», «padrychtoŭcy da ździajśnieńnia inšych dziejańniaŭ, jakija stvarajuć niebiaśpieku hibieli ludziej, pryčynieńnia im cialesnych paškodžańniaŭ i inšych ciažkich nastupstvaŭ u metach akazańnia ŭździejańnia na pryniaćcie rašeńniaŭ orhanami ŭłady, zapałochvańnia nasielnictva, destabilizacyi hramadskaha paradku (akta teraryzmu), učynienych hrupaj asob» i «padrychtoŭcy da naŭmysnaha pryviadzieńnia ŭ nieprydatny dla ekspłuatacyi stan srodkaŭ suviazi, kali hetyja dziejańni mahli paciahnuć śmierć čałavieka, krušeńnie, avaryju albo inšyja ciažkija nastupstvy».
Za ŭsio heta sudździa Burunoŭ prysudziŭ Kanavałavu 15 hadoŭ kałonii va ŭmovach uzmocnienaha režymu, a taksama daŭ jamu štraf u pamiery 300 bazavych vieličyniaŭ.
