Fota: ganc-chas.by
«Biez błatu nie abyšłosia»
Nabyć drovy možna ŭ dziaržaŭnych arhanizacyjach i ŭ pradprymalnikaŭ.
U paraŭnańni ź minułym hodam dziaržaŭnyja drovy padaraželi ŭ siarednim na 5-8 pracentaŭ: z 9,08 da 9,53 rubla za kubamietr draŭniny. Pa lhotnaj canie jaje mohuć kupić žychary, prapisanyja ŭ haradskim pryvatnym siektary abo na vioscy. Dla takoj katehoryi pakupnikoŭ na adnu chatu ŭstanoŭleny limit prodažu — 4,9 kubamietra. Kali chočaš prydbać zvyš hetaj kvoty, płaci «rynkavyja» 69 rubloŭ za kub.
«U mianie chata-piaciścienka siarednich pamieraŭ, dyk, kab jaje naciaplić, nieabchodna try mašyny droŭ, a heta 15 kuboŭ. Kali chočaš pa chacie chadzić u ciełahrejcy, to piaci chopić. Sioleta zapłaciŭ razam z dastaŭkaj try sotni rubloŭ», — apaviadaje žychar Mahiloŭskaha rajonu.
Jon kaža, što parupiŭsia pra drovy napačatku leta, ale pryznajecca: «biez błatu nie abyšłosia». Pa słovach viaskoŭca, mnohija jaho susiedzi šukajuć znajomcaŭ na drevapierapracoŭčych pradpryjemstvach. Adchody vytvorčaści abychodziacca tańniej, kaža jon.
Varta ŭličvać, što bityja drovy z roznych parod drevaŭ majuć svaju canu. Svabodny adpuskny košt kubamietra samych darahich — biarozavych, klanovych, dubovych — u zaležnaści ad ich daŭžyni siahaje 37 rubloŭ i vyšej. Najtańniejšyja — sasna, alešyna — ad 18 da 35 rubloŭ.
Dla ŭładalnikaŭ damoŭ, jakija majuć hazavaje aciapleńnie, cana draŭninnaha paliva vyšejšaja. Za 25-santymietrovyja bityja drovy za kub daviadziecca vykłaści 77 rubloŭ.
«Rajpaliŭzbyt»: U nas čarha 800 čałaviek
Ministerstva lasnoj haspadarki zapeŭnivaje, što ažyjatažnaha popytu na drovy niama. Pavodle viedamstva, lashasy spraŭlajucca z pastaŭkami draŭniny arhanizacyjam, jakija zatym pradajuć jaje. Da kanca hetaha hodu, adznačajuć čynoŭniki, u hartopy płanujuć pastavić kala 480 tysiač kubamietraŭ draŭniny.
«Nas šmat čamu navučyŭ minuły hod, — kaža pradstaŭnik Ministerstva lasnoj haspadarki Vital Bandarevič. — Pryniaty ŭsie nieabchodnyja miery dla taho, kab drovaŭ chapiła ŭsim i nabyć ich možna było davoli chutka».
Fota: 1prof.by
Letašni ažyjataž na drovy čynoŭniki patłumačyli tym, što nasielnictva stała kuplać ich «adnamomantna». Pradaŭcy nie paśpiavali vykonvać zajaŭki, i ŭtvarylisia čerhi.
A jakaja situacyja ciapier? Nie ŭsie arhanizacyi «Rajpaliŭzbytu» hatovyja chutka vykanać zakazy nasielnictva. U niekatorych prablemy z transpartam. U inšych, kab nabyć drovy, treba vystajać u niemałoj čarzie. Pa bityja drovy jana daŭžejšaja. U adnoj z arhanizacyj nam patłumačyli, što vydzielenaja joj hrašovaja datacyja na zakup droŭ skončyłasia, a kali vydzielać nastupny tranš — nieviadoma.
«My jak arhanizacyja, kuplajem drovy pa 32 rubli za kubamietr, a pradavać nasielnictvu davodzicca za 9 rubloŭ. Datacyja na pakryćcio hetaj roźnicy skončyłasia, i ciapier u nas čarha z 800 čałaviek i my nie viedajem, što ź joju rabić. My zapišam vas, ale drovy vy atrymajecie tolki ŭ lutym», — tłumačyć supracoŭnik «Rajpaliŭzbytu» z Mahiloŭščyny.
Surazmoŭca paraiŭ źviarnucca ŭ laśnictvy, dzie, pa jaho słovach, možna nabyć drovy pa toj ža canie, što i ŭ «Rajpaliŭzbycie».
«5 kuboŭ pryviazuć pa 9 rubloŭ, a zvyš hetaha abjomu za poŭny košt», — kaža jon.
U laśnictvie, jakoje nazvaŭ supracoŭnik «Rajpaliŭzbytu», paviedamili, što nabyć drovy ŭ ich nie prablema. Možna kupić luby abjom, ale kali klijent choča, kab tavar byŭ dastaŭleny raniej, to parupicca pra transpart musić sam.
«Kali budziecie čakać našaj dastaŭki, to praz dva miesiacy pryviaziom, moža pašancuje praź miesiac. U nas adna mašyna», — prainfarmavali ŭ laśnictvie.
Tam adznačyli, što drovy pradajuć tolki chvajovych parod i 15 kuboŭ abydziecca ŭ 250 rubloŭ.
Cana ŭ pryvatnika — ad 250 da 300 rubloŭ za mašynu droŭ z dastaŭkaj
Nabyvać drovy nie prablema i ŭ pradprymalnikaŭ. Jany prapanujuć kruhlaki, doški-harbyli, drovy kołatyja roznych pamieraŭ, taŭščyni i navat suchaści. Abiacajuć dastavić tavar pakupniku ciaham troch dzion.
Adzin z pradprymalnikaŭ adznačyŭ, što drovy, padobnyja na tyja, jakija biŭ Łukašenka, kab «vyratavać Jeŭropu ad choładu», naŭrad ci klijentu ŭdasca nabyć. Pa jaho słovach, dla Łukašenki byli śpiecyjalna adabranyja drovy. Jon źviarnuŭ uvahu, jak jany lohka bilisia i byli peŭnaj suchaści.
«Heta byŭ jałovy les, i pa tym, jaki byŭ huk ad udaru siakiery, možna peŭna kazać, što dobra prasušanyja», — adznačaje jon.
U mnostvie abjavaŭ pradprymalniki prapanujuć kupić u ich bityja drovy mašynami. Siaredni ich košt ad 250 da 300 rubloŭ z dastaŭkaj. Kolki ŭ mašynie kubamietraŭ, treba vyśviatlać u pradaŭca.
Ilustracyjnaje fota
Kruhlaki biznesoŭcy pradajuć ad 30 da 90 rubloŭ za kubamietr. U lasistych rajonach ich možna prydbać i tańniej. Naprykład, u Čerykaŭskim rajonie prapanujuć ich pa 18 rubloŭ za kubamietr.
Pavodle znaŭcaŭ narychtoŭki droŭ, pradprymalniki najčaściej nabyvajuć u laśnictvach dzialanki z burałomam, vypiłoŭvajuć jaho i zatym pradajuć nasielnictvu.
Abrezki došak i doški-harbyli abyducca pakupniku ad 150 rubloŭ za mašynu. Jamu samamu daviadziecca ich piłavać.
Minlashas aburany infarmacyjaj aficyjnych prafsajuzaŭ ab prablemie z drovami i płanuje źviartacca «ŭ adpaviednyja orhany»
«Letaś płacili 150 rubloŭ, a ciapier — 360, dy jašče i čarha». Les daje rekordny prybytak, a prostyja biełarusy nie mohuć nabyć sabie drovy
