Daktary z roznych paliklinik raskazali «Našaj Nivie», što kiraŭnictva ŭstanoŭ zabaraniła lekaram kamunikavać z pradstaŭnikami farmdystrybjutaraŭ, jakija doŭhi čas mieli kantakty jak z šarahovymi lekarami, tak i z kiraŭnictvam ustanoŭ.
«Heta była raspaŭsiudžanaja praktyka, kali farmpradstaŭniki raskazvali pra svaju pradukcyju», — raspaviadaje doktar.
Daktaram byli vyhadnyja takija vizity, bo farmpradstaŭniki prynosili z saboj nie tolki infarmacyju ab pradukcie, ale i kancylarskija tavary, papieru, tanomietry.
Zahad Minzdaroŭja, jaki abaviazvaje ŭzhadniać prysutnaść farmpradstaŭnika va ŭstanovie achovy zdoroŭja z kiraŭnikom ustanovy, źjaviŭsia jašče niekalki hod tamu. Ale hetaha zahadu nie prytrymlivalisia stroha.
U toj ža čas siłavyja struktury bačyli ŭ kantaktach z farmpradstaŭnikami spryjalnuju hlebu dla karupcyi.
Zahadčyki paliklinik padpisvajuć papiery, dzie jany papiaredžvajucca pra nastupstvy karupcyi i abaviazvajucca danieści da lekaraŭ adpaviednuju infarmacyju. Siarod inšaha, ciapier zabaraniajecca kantaktavać z farmpradstaŭnikami, bo heta taksama mohuć razhladacca jak karupcyja.
«U pieršyja dni kastryčnika naš kalektyŭ jašče chadziŭ na zapłanavanuju raniej prezientacyju, jakuju ŭ restaranie ładziła adna z farmakałahičnych kampanij, a ŭžo praz paru dzion zahadčyca paviedamiła, što bolš nijakich prezientacyj nie budzie. Taksama zabaranili puskać farmpradstaŭnikoŭ u kabiniet», — kaža lekarka.
Pa słovach surazmoŭcy, u administracyi palikliniki napałochanyja pravierkami.
«Kažuć, nibyta ŭ niekatorych ustanovach užo ładzić pravierki prakuratura, praviarajuć, jak vydavalisia balničnyja listy, daktaroŭ raspytvajuć, čamu jany vypisvali adny preparaty, a nie na inšyja, paŭsiul šukajuć prykmiety karupcyi», — kaža doktarka.
«Ludzi aściarožničajuć, bo nichto nie choča sieści ŭ turmu za natatnik abo pačak papiery», — kaža surazmoŭca.
Pa słovach adnaho ź miedykaŭ, ciapier praviarajučyja orhany zajmajucca lekarami, jakija nibyta byli zacikaŭlenyja ŭ naznačeńni peŭnych prałanhujučych preparataŭ dla ŭviadzieńnia ŭ sustavy za tak zvanyja adkaty. Uvaha da kantaktaŭ z farmpradstaŭnikami moža być nastupstvam hetaj kryminalnaj spravy.
Čytajcie taksama:
Na hałoŭnaha doktara minskaj balnicy zaviali spravu za «niezakonnyja nadbaŭki»
Jak Čyž i jaho tajemny litoŭski partnior zarabili miljardy na chitraj naftavaj schiemie
