Fota: AP
U pačatku 2010-ch Chołms nazyvali «novym Styvam Džobsam», vosiem hadoŭ tamu jana stała samaj maładoj žančynaj-miljarderam u śviecie.
Theranos na praciahu mnohich hadoŭ raspracoŭvała ŭniviersalny prybor, što, jak zapeŭnivali aŭtary, pavinien byŭ pa adnoj kropli kryvi dyjahnastavać sotni roznych zachvorvańniaŭ, u tym liku rak i dyjabiet. Adnak, jak vyśvietliŭ sud, heta pryłada akazałasia pustyškaj, a kiraŭnik kampanii śviadoma ŭvodziła ŭ zman inviestaraŭ prajekta.
U studzieni paśla trochmiesiačnaha sudovaha razboru prysiažnyja pryznali Elizabiet Chołms vinavataj pa čatyroch z 11 punktaŭ abvinavačvańnia, uklučajučy zmovu z metaj ździajśnieńnia machlarstva suprać inviestaraŭ, padman hramadskaści i machlarstva z vykarystańniem elektronnych srodkaŭ. Prakuratura patrabavała dla jaje 15 hadoŭ źniavoleńnia i 800 młn dalaraŭ kampiensacyi paciarpiełym.
Sama Chołms pryznała zahany ŭ raspracoŭkach Theranos, ale nastojvała, što nikoli nikoha nie ŭvodziła ŭ zman naŭmysna. Abarona prasiła sud abmiežavacca 18 miesiacami chatniaha aryštu. Bolš za 130 siabroŭ, svajakoŭ i byłych supracoŭnikaŭ Theranos źviarnulisia da sudździ z prośbaj ab źmiakčeńni prysudu.
Pierad abviaščeńniem prysudu 38-hadovaja Chołms vystupiła z pramovaj, u jakoj sa ślaźmi na vačach vybačyłasia pierad inviestarami i pacyjentami.
«Ja spustošanaja svaimi niaŭdačami. Ja adčuvała hłyboki bol z-za taho, što padviała ludziej», — skazała jana. — Ja škaduju ab svaich niaŭdačach kožnaj kletačkaj svajho cieła».
«Niaŭdača — heta narmalna. Ale niaŭdača z-za machlarstva — heta nie narmalna», — adkazaŭ joj sudździa Edvard Daviła i nazvaŭ jaje vypadak pavučalnaj historyjaj dla inšych kiraŭnikoŭ u Kramianiovaj dalinie.
Adbyvać pakarańnie Chołms pavinna budzie z 27 krasavika. U jaje jość adnahadovy syn, a ŭ ciapierašni čas jana ciažarnaja druhim dziciem. Čakajecca, što jaje abarona padaść apielacyju na prysud.
Jaje partniora pa biznesie Ramieša Bałvani sudzili asobna i hetak ža pryznali vinavatym u machlarstvie, prysud jamu budzie vyniesieny ŭ nastupnym miesiacy.
Theramos ličyŭsia adnym z topavych prajektaŭ Kramianiovaj daliny apošnich dziesiacihodździaŭ. Na piku papularnaści kampanija aceńvałasia ŭ 9 młrd dalaraŭ. Elizabiet Chołms i kiraŭnictva Theramos abiacali revalucyju ŭ śviecie miedycyny i ŭ industryi achovy zdaroŭja.
Prybor pad nazvaj «Edysan» pavinien byŭ pa adnoj kropli kryvi z palca dyjahnastavać mnohija niebiaśpiečnyja zachvorvańni raniej za daktaroŭ. Chołms nazyvała jaho «ajpodam u miedycynie» i śćviardžała, što hety aparat nieŭzabavie źjavicca ŭ kožnym domie.
Siarod inviestaraŭ Theranos byli samyja viadomyja palityki i biznesmieny ZŠA — eks-prezident Bił Klintan, ministr adukacyi pry administracyi Trampa Bietsi Devas, miedyjamahnat Rupiert Mierdak, technałahičny mahnat Łary Elisan i mnohija inšyja. U radu dyrektaraŭ kampanii ŭvachodzili byłyja dziaržsakratary ZŠA Hienry Kisindžer i Džordž Šulc, a taksama eks-kiraŭnik Pientahona Džejms Mecis.
Cikavaść da Theranos vyjaŭlaŭ i Džo Bajden, jaki zajmaŭ tady pasadu vice-prezidenta ŭ administracyi Baraka Abamy.
U ahulnaj kolkaści Elizabiet Chołms atrymałasia pryciahnuć dla raźvićcia svajho startapa bolš za 900 młn dalaraŭ. Svoj biznes jana zasnavała jašče padletkam, nieŭzabavie paśla taho, jak pierapyniła navučańnie ŭ prestyžnym Stenfardskim univiersitecie na fakultecie chimičnaj inžynieryi.
«Błahaja kroŭ»
U 2015 hodzie žurnalist vydańnia Wall Street Journal Džon Karejra vypuściŭ sieryju vykryvalnych artykułaŭ pra dziejnaść Theranos.
U pryvatnaści, jaho ŭvahu pryciahnuła krajniaja zakrytaść kampanii, jon vioŭ svajo rasśledavańnie na praciahu niekalkich hadoŭ i ŭ vyniku zdoleŭ dakazać, što technałohija, jakaja raspracoŭvajecca ŭ Theranos — padman.
Na ŭmovach kanśpiracyi jon sustrakaŭsia z šeraham supracoŭnikaŭ firmy, niekatoryja ź ich da taho času ŭžo pakinuli svaje pasady. Sa słoŭ Karejry, usie jany byli zapałochanyja.
Ź ich apoviedaŭ skłałasia karcina žachlivaj abstanoŭki, pry jakoj ludziej litaralna prymušali da padrobki, pahražajučy zvalnieńniami na ŭmovach, jakija aznačali razareńnie.
U 2018 hodzie Džon Karejra vypuściŭ knihu «Błahaja kroŭ», jakaja stała biestsieleram, a paźniej historyja Elizabet Chołms pryciahnuła ŭvahu kiniematahrafistaŭ.
