Košt atrybutyki ź simvałami rasijskaha ŭvarvańnia va Ukrainu padaje ŭsie apošnija miesiacy, vynikaje sa źviestak ahrehataraŭ, na jakija źviarnuŭ uvahu telehram-kanał «Možiem objaśniť». Mienš stała i kamientaroŭ da hetych tavaraŭ, što aznačaje istotnaje źnižeńnie popytu na ich.
Tavary ź simvałami «śpiecapieracyi» pradajucca na ŭsich bujnych rasijskich placoŭkach (Wildberries, Ozon i «Jandeks.Markiet»). Adnak dynamika cen ciapier dastupnaja tolki na Wildberries, astatnija anłajn-kramy adklučyli jaje jašče ŭ sakaviku.
Padaje popyt jak na adzieńnie, tak i na nalepki, znački i ściahi. Naprykład, futbołki ź simvałam Z patańnieli prykładna ŭ paŭtara-dva razy (niekatoryja — navat u try razy). Vodhukaŭ da ich taksama stała mienš — u paraŭnańni z sakavikom-krasavikom. Padaje ŭ canie i adzieńnie z frazami nakštałt «Za Rasiju», «Mnie nie soramna», «Svaich nie kidajem».
Naprykład, samaja papularnaja Z-futbołka ad vytvorcy «Ruski śviet» patańnieła z 2028 da 1225 rasijskich rubloŭ. Pierastali karystacca papularnaściu nalepki na aŭtamabili z Z-simvolikaj, a taksama znački. Nalepka «Mnie nie soramna» i znački Z taksama patańnieli.
Mocna tańnieje i prapahandysckaja kancylaryja, naprykład, vokładki dla pašpartoŭ, školnyja dziońniki i knihi. Tak, abiasceniłasia kniha «Siła v praŭdzie» Uładzimira Kiknadze, prezientacyju jakoj u kastryčniku pravodziŭ były ministr kultury Uładzimir Miadzinski. Na tym mierapryjemstvie jon zajaviŭ, što ŭvieś žurfak MDU zabity «stvareńniami» ź liku libierałaŭ.
Niekatoryja kramy zdymajuć z prodažu tavary z Z-simvolikaj. Jak paviedamlaŭ RTVI, usia prapahandysckaja atrybutyka źnikła z sajta servisu druku na futbołkach «Vsiemajki». Pra heta raspaviała krynica, blizkaja da kampanii. Raniej, pa jaje słovach, na sajcie byŭ pradstaŭleny šyroki pieralik takoj pradukcyi — futbołki, tałstoŭki, chudzi i inšaje.
