Adelina Volskaja. Fota: facebook.com/adela.volskaya.7
23 listapada Adelina adkryła rachunak na placoŭcy pomagam.pl. Za dva dni na jaho pieraviali bolš za 9,7 tysiač złotych (bolš za 5000 rubloŭ). Nieabchodna sabrać 12 tysiač złotych (6300 rubloŭ).
«Jašče raz usim ščyra dziakuju za dapamohu! Heta prosta nievierahodna! Ja kožnamu vysyłała mejły z padziakaj i dzieści pamyliłasia, prašu prabačeńnia. Vy prosta nievierahodnyja! Ja navat i nie spadziavałasia, što tak chutka možna sabrać peŭnuju sumu», — adreahavała dziaŭčyna na aktyŭnaść ludziej u źbirańni joj hrošaj.
U zvarocie da achviaradaŭcaŭ Adelina napisała, što «vyjechała ŭ Polšču pa palityčnych matyvach».
«Niadaŭna daviedałasia, što ŭ mianie 8 sm kista ŭ jaječniku i mnie patrebna apieracyja, ale, na žal, u mianie niama strachoŭki, kab apłacić hety typ apieracyi. Była b vielmi ŭdziačnaja za vašu dapamohu. Ad raku pamierła maja maci, i hetaha ja bajusia», — adznačyła jana.
Adelina piša, što viadzie baraćbu za žyćcio na čužynie ciaham 2 miesiacaŭ, «ale, na žal, biez dobrych vynikaŭ pa pryčynach, jakija ad mianie nie zaležać».
Pra apieracyju Adelina ŭpieršyniu paviedamiła 11 vieraśnia. Jana spadziavałasia, što adoleje prablemu biez starońniaj dapamohi. Pryznałasia, što joj strašna, ale «ŭpeŭnienaja, što pieražyvie».
«Buduć rabić apieracyju. Čerhi ŭ balnicy vialikija (paŭhoda i bolš), ale ja ŭžo amal prarvałasia pa-za čarhoj. Skazali, što, chutčej za ŭsio, buduć rabić połaścievuju apieracyju (jak kiesarava). 5%, što puchlina złajakasnaja, adnak u lubych takich vypadkach jość «ale», «mahčyma». Nie daviedajucca, pakul nie vydalać», — napisała dziaŭčyna na svajoj staroncy ŭ fejsbuku.
Praź miesiac Adelina paviedamiła, što z-za adsutnaści ŭ jaje strachoŭki apieracyju adkłali. Pra toje dziaŭčynie skazali, kali jana była ŭ balnicy.
«Pryjšłosia vypisacca. Sprava zaciahvajecca na miesiac, mahčyma. Tut užo składana zrazumieć, bo ŭsio, što ad mianie patrabavałasia, ja zrabiła jašče raniej. Čakała vosiem hadzin u adnoj dziaržaŭnaj ustanovie, potym tyja ž vosiem hadzin sprabavała datelefanavacca da inšych dziaržaŭnych ustanoŭ, i ŭ vyniku pakul atrymała admovu… Nu što ž, budu dalej zmahacca», — sa skruchaj adznačyła jana.
Adelina šukała śmiełaści źviarnucca pa dapamohu.
«Mnie prychodzicca zrabić toje, čaho nie chacieła da apošniaha… Ja była b vielmi ŭdziačnaja za vašu dapamohu!» — piša jana.
Pra siabie Adelina piša, što «siem hadoŭ žyvie ŭ Polščy i vykładaje polskuju movu, ale bolš za ŭsio lubić muzyku. Śpiavaje, hraje na hitary, piša svaje pieśni pa-biełarusku».
Vystupaje pad imiem ADEL LINE. Uletku apublikavała novyja tvory, zapisanyja ŭ suaŭtarstvie z muzykam Stanislavam Dodzem.
Adela Volskaja śpiavaje pieśniu baćki VIDEA
