Bad Bunny. Fota: Evan Agostini / Invision / AP
Artysty, jakich najbolš słuchali
Na pieršym miescy apynuŭsia puertarykanski repier, śpiavak, aŭtar piesień i akcior Bad Bunny. Dla jaho heta ŭžo treciaje zapar lidarstva ŭ rejtynhu. Były śpiavak dziciačaha carkoŭnaha choru, puertarykaniec atrymaŭ svoj psieŭdanim, kali ŭ malenstvie jaho prymusili apranuć u škołu kaścium zajčyka i sfatahrafavali ź siardzitym vyrazam tvaru (Bad Bunny pierakładajecca jak «drenny trusik»). Jon jarki vykanaŭca piesień u łacinaamierykanskim styli rehieton, a taksama niebłahi restler.
Bad Bunny nie zastajecca abyjakavym da hramadskich prablem: jon adkryta krytykavaŭ adsutnaść humanitarnaj dapamohi paśla ŭrahanu «Maryja», što mocna razburyŭ Puerta-Ryka, vystupaŭ suprać zakryćcia škoł na radzimie i adkryćcia ŭsio bolšaj kolkaści turmaŭ, padtrymlivaje pravy ŁHBT.
Razam z Bad Bunny ŭ top uvajšła i pop-śpiavačka Tejłar Śvift. Jana stała nie tolki druhoj samaj papularnaj artystkaj u śviecie, ale i skaryła top-śpisy ŭ Aŭstralii, Brytanii, Irłandyi, Małajzii, na Filipinach, u Novaj Ziełandyi, u Katary, Słavienii i Sinhapury. Vy možacie viedać Tejłar pa jaje raniejšych chitach nakštałt Love Story, Shake It Off I Blank Space, ale i siońnia amierykanka nie rassłablajecca: jaje novy albom Midnights, što vyjšaŭ 21 kastryčnika, adrazu ž pabiŭ rekordy siervisaŭ Spotify i Apple Music pa prasłuchoŭvańniach za sutki.
Hety reliz, poŭny piesień pa aŭtabijahrafičnych matyvach, raskazvaje pra jaje strachi i nianaviść da siabie, razvahi pra karmu i pomstu, a taksama roznyja etapy ramantyčnych adnosin. Dysk startavaŭ z prodažaŭ u 1 578 000 ekzemplaraŭ, što stała adnym z najlepšych vynikaŭ u historyi albomnaha čarta krainy Billboard 200.
Kanadski repier Drake biare bronzu ŭ śpisie Spotify. Hety chłopiec dabivajecca pośpiechu nie tolki ŭ muzycy, ale i ŭ pradziusarskaj pracy i ŭ biznesie — praŭda, jamu zusim nie šancuje sa staŭkami na sport. Jość navat «praklon Drejka»: kažuć, što kali repier stavić hrošy na niejkuju spartovuju padzieju i piša pra heta ŭ sacsietkach, lepš zrabić supraćlehłuju staŭku ci ŭvohule nie ryzykavać hrašyma, i navat kali repier sfatahrafujecca sa spartoŭcam da boju ci matča, toj, napeŭna, prajhraje. Kolkaść hrošaj, jakija kanadziec zhubiŭ na staŭkach, naličvaje miljony dalaraŭ.
Na čaćviortym miescy ŭ śpisie Spotify znachodzicca jašče adzin kanadziec — śpiavak i pradziusar The Weeknd. Vy mahli čuć jaho pieśni Earned It, The Hills, Can't Feel My Face i Starboy. Ejbieł Tesfaje — tak na samaj spravie zvać vykanaŭcu — admietny svajoj stylistykaj, što adsyłaje da vobrazaŭ Majkła Džeksana, Prynsa i R.Kelly.
Zamykaje piaciorku lidar karejskaj pop-sceny, hurt BTS. Heta samyja pradavanyja paŭdniovakarejskija artysty, jakija atrymali suśvietnaje pryznańnie ŭ 2017 hodzie. Ciapier, adnak, BTS nie vystupajuć: u 2022 hodzie hurt abviaściŭ pra pierapynak u karjery dziela słužby ŭ armii, ale abiacaje viarnucca da aktyŭnaści prykładna ŭ 2025 hodzie.
Samyja virusnyja artysty
Servis skłaŭ asobny rejtynh z vykanaŭcaŭ, čyje treki čaściej za ŭsio vykładvalisia na płatformach praz Spotify. Tut lidziruje Tejłar Śvift — usio dziakujučy jaje apošniamu relizu Midnights. Na druhim miescy The Weeknd, na trecim — Bad Bunny, čaćviortaje miesca zajmaje BTS.
A voś na piatym radku raźmiaściłasia Łana del Rej, kultavaja śpiavačka i vykanaŭca chitoŭ Born to Die i Summertime Sadness. U kastryčniku Łana zapisała ŭ saaŭtarstvie z Tejłar Śvift vialiki chit Snow on the Beach, jaki debiutavaŭ na čaćviortym miescy ŭ Billboard Hot 100, a ŭ nastupnym hodzie śpiavačka płanuje vypuścić novy albom. Niekalki miesiacaŭ tamu del Rej pieražyła vialiki stres: ź jaje mašyny skrali jaje noŭtbuk, ćviordyja dyski, try videakamiery i 200-staronkavy rukapis budučaj paetyčnaj knihi.
Najlepšyja pieśni 2022 hoda
Hety śpis uznačalvaje brytaniec Hary Stajłz, były ŭdzielnik viadomaha bojz-benda One Direction, i jaho trek As It Was. Na druhim miescy suajčyńniki Stajłza — indzi-rok-hurt Glass Animals z kampazicyjaj Heat Waves, što vykonvaje psichadeličny pop. Ich «srebrany» trek źjaviŭsia jašče ŭ 2020 hodzie, ale ž čamuści streliŭ tolki sioleta.
Treciaja pa papularnaści pieśnia hoda — STAY ad aŭstralijskaha repiera The Kid LAROI, zapisanaja razam z Džaścinam Bibieram. Aŭstralijcu ŭsiaho 19 hadoŭ, i svoj pieršy albom jon prezientavaŭ dva hady tamu, tak što vialikaj kolkaściu chitoŭ pakul pachvalicca nie moža. Trek STAY, što vyvieŭ chłopca ŭ topy Spotify, taksama siem razoŭ byŭ na viaršyni tydniovaha rejtynha piesień Billboard Top 100.
Čaćviortaje i piataje miesca zajmajuć treki ad Bad Bunny — adpaviedna Me Porto Bonito (zapisany razam z Chencho Corleone) i Tití Me Pregunto.
Najlepšyja albomy
Najpapularniejšym akazaŭsia dysk Un Verano Sin Ti ad Bad Bunny. Taksama ŭ topie znoŭ apynuŭsia Hary Stajłz — hetym razam jon na druhim miescy z relizam Harry's House. Bronza ŭ amierykanskaj akciorki (a ciapier jašče i śpiavački) Alivii Radryha z debiutnym relizam Sour.
Brytaniec Ed Šyran i jaho albom ź intryhoŭnaj nazvaj «=» uziaŭ čaćviortaje miesca rejtynha — vy dakładna čuli jaho pieśni Shape of You i Perfect. Piataj stała amierykanskaja repierka Doja Cat i jaje płaścinka Planet Her. Heta kanceptualnaja płaścinka pra vydumanuju płanietu, stvoranuju samoj śpiavačkaj, dzie ŭsie kaśmičnyja vidy i rasy žyvuć u harmonii.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Śpiavačka Sia raźmiaściła rolik, na jakim para tancuje na minskim praśpiekcie Niezaležnaści
Pieśnia Tor Band «My nie narodziec» stała nastolki narodnaj, što pad jaje zapisvajuć tyktoki navat łukašenkaŭcy VIDEA
