U šerahu roźničnych kram Maskvy ŭ prodažy źjaviŭsia napoj, butelka i etykietka jakoha całkam supadajuć z aryhinalnaj Coca-Cola rasijskaj vytvorčaści, i sa śviežaj dataj raźlivu. Napoj, jak ukazana na jaho etykietcy, byŭ vyrableny «z dazvołu The Coca-Cola Company» na vytvorčaści ŭ Maskvie.
Heta supiarečyć zajavam amierykanskaj kampanii i rasijskaj kampanii, jakaja zajmałasia raźlivam napoju, ab zhortvańni vytvorčaści ŭ Rasii. Paśla pačatku vajny va Ukrainie rasijskija zavody, jakija naležali Coca-Cola, zasiarodzilisia na vypusku łakalnych brendaŭ — «Dobry», Rich, «Maja Siamja». U kancy lipienia botler pačaŭ vypuskać anałah Coca-Cola — hazavany napoj sa smakam koły «Dobry Cola».
Pa telefonie haračaj linii, jaki ŭkazany na etykietcy Coca-Cola, karespandentu adkazaŭ supracoŭnik rasijskaj kampanii, jakaja raniej zajmałasia raźlivam aryhinalnaha napoju. Jon zapeŭniŭ, što Coca-Cola z dataj vytvorčaści ŭ listapadzie 2022 hoda nie moža być aryhinalnaj pradukcyjaj, bo kampanija spyniła vypusk hetych napojaŭ jašče ŭ krasaviku 2022 hoda.
Smakavy kancentrat — sirop, nieabchodny dla vytvorčaści kłasičnaj haziroŭki Coca-Cola, pastaŭlaŭsia na rasijskija zavody z ZŠA, ale z-za sankcyj jaho pastaŭki spynilisia, a zavody pieraaryjentavalisia na vypusk miascovych brendaŭ. Zapasy aficyjna raźlitaj haziroŭki Coca-Cola i inšych hłabalnych brendaŭ praktyčna vyčarpanyja — kampanija spynić ich adhruzku ŭ siaredzinie śniežnia, dadaŭ surazmoŭca RBK.
U pres-słužbie Coca-Cola ŭ adkaz na zapyt ab źjaŭleńni ŭ rasijskich kramach vyrablenaj u kastryčniku i listapadzie haziroŭki paviedamili, što kampanija «spyniła vytvorčaść i prodaž usich brendaŭ The Coca-Cola Company ŭ Rasii i nie płanuje vyrablać hetyja pradukty ci brendy ŭ lubym farmacie».
Pavodle słoŭ jašče adnoj krynicy RBK, «śviežaja» Coca-Cola, z vysokaj dolaj vierahodnaści, była «vyrablena ź niesankcyjanavanym vykarystańniem etykietki».
Na etykietkach butelek Coca-Cola, vyrablenych u listapadzie, źmieščany stary jurydyčny adras kampanii, jakaja zajmałasia jaje vyrabam. Miž tym, paśla vajny arhanizacyja źmianiła nazvu i pieraniesła jurydyčny adras u inšy horad.
