Pry hetym u čarhovaj zvodcy ISW skazana, što častkovyja pośpiechi rasijskich vajskoŭcaŭ u Saladary zusim nie aznačajuć, što im udasca abrynuć ŭkrainski front i zachapić Bachmut. «Rasijskija razvahi pra chutki zachop Bachmuta i abrušeńnie ŭkrainskich abaronnych miežaŭ nie spałučajucca z realnaj situacyjaj u rajonie Bachmuta, dzie siły RF dalokija ad taho, kab adrezać ukrainskija naziemnyja linii suviazi», — zaklučajuć aŭtary zvodki.
Na ich dumku, «rasijskija nastupalnyja apieracyi pa zachopie Bachmuta, vierahodna, dasiahnuli kulminacyi z-za dehradacyi».
Ekśpierty ISW taksama padrabiazna analizujuć pryznačeńnie kamandujučym vojskami RF va Ukrainie načalnika rasijskaha hienštaba Valeryja Hierasimava.
Na ich dumku, heta rašeńnie zaklikana vyrašyć dźvie hałoŭnyja zadačy Kramla:
— pasprabavać palepšyć sistemu kamandavańnia dla efiektyŭnych vajennych dziejańniaŭ u hetym hodzie;
— i ŭmacavać pazicyi Ministerstva abarony na fonie ŭzmacnieńnia ŭpłyvu vajskovych błohieraŭ i siłavikoŭ, takich jak zasnavalnik PVK «Vahnier» Jaŭhien Pryhožyn.
Jak ličać aŭtary zvodki, prezident Rasii Uładzimir Pucin, vierahodna, płanuje novyja nastupy — pry tym, što ŭ minułym jon nieadnarazova demanstravaŭ nierazumieńnie sapraŭdnych mahčymaściaŭ svajho vojska i nie admoviŭsia ad maksimalisckich zadač kampanii va Ukrainie.
Pucin pa-raniejšamu ličyć, što armija RF zdolnaja na maštabnyja nastupalnyja dziejańni, skazana ŭ zvodcy ISW, ale takija jaho acenki, vierahodna, nie adpaviadajuć rečaisnaści. Pry hetym Hierasimaŭ nie piarečyŭ prezidentu Rasii paśla katastrafičnaha płana ŭvarvańnia ŭ lutym 2022 hoda — i naŭrad ci pačnie heta rabić ciapier, adznačajuć amierykanskija ekśpierty.
Jany nie ličać, što Hierasimaŭ zmoža chutka ŭdychnuć novaje žyćcio ŭ rasijskija pryncypy viadzieńnia vajny, kab zadavolić ambicyi Pucina. U zvodcy skazana, što hienierał, «vierahodna, akažacca na čale dezarhanizavanaj kamandnaj struktury, jakaja pieražyvaje pastajannyja, paśladoŭnyja i samaŭzmacnialnyja pravały, jakim mienavita jon šmat u čym i pakłaŭ pačatak svaimi dziejańniami da ŭvarvańnia va Ukrainu».
Pavodle acenak ISW, važnaj pieraškodaj dla nastupalnych apieracyj Maskvy na ŭschodzie Ukrainy taksama stanie niazdolnaść rasijskaj industryi vyrašyć prablemu niedachopu bojeprypasaŭ.