«U lutym u nas zapłanavanaja «Vialikaja razmova». Jana, jak zvyčajna, projdzie ŭ šyrokim składzie. My zaprašajem našych žurnalistaŭ, błohieraŭ, hramadskich dziejačaŭ, da maksimalna ščyraj razmovy ŭ žyvym efiry. […] Nam vielmi važna było paśla niaprostaha, ale niakiepskaha 2022 hoda dać mahčymaść žurnalistam razam z [Łukašenkam] padvieści jaho vyniki […] [Łukašenka] budzie maksimalna adkryty i adkaža na ŭsie pytańni žurnalistaŭ», — cytavała BiełTA Natallu Ejsmant napačatku lutaha.
Srodki masavaj prapahandy raspačali padrychtoŭku da aśviatleńnia mierapryjemstva, a pa ŭsioj krainie pačali adbor «jabaciek» dla kamandziroŭki ŭ stalicu.
Ale, niešta pajšło nie tak.
«Trapić na hetuju razmovu vyhladaje prestyžnym u kaštoŭnaściach sistemy. Ad našaha vykankama mieŭsia jechać zaŭvažny «jabaćka». Ale «razmovu» admianili. Čamu — nie viedaju», — skazaŭ «Našaj Nivie» čynoŭnik adnaho z abłvykankamaŭ.
Tuju ž infarmacyju paćviardziŭ supracoŭnik adnaho sa ŚMI.
«Sapraŭdy, admianili. Čamu nie viedaju. U nas u pracoŭnym hrafiku na luty było, a potym nie stała. Na ŭzroŭni razmoŭ tłumačać, što ŭ Łukašenki źmianiŭsia hrafik. Aficyjnaha tłumačeńnia nie viedaju», — skazaŭ hety čałaviek «Našaj Nivie».
Natalla Ejsmant pakul nijak nie paviedamlała pra admienu łukašenkaŭskaha stendapa.
Papiaredni raz «Vialikaja razmova z prezidentam» adbyłasia 9 žniŭnia 2021 hoda. Na tuju razmovu niezaležnyja ŚMI ŭžo nie zaprašali, ale prysutničali zamiežnyja žurnalisty, i ŭvieś scenar byŭ pabudavany na «adłupie» im jak z boku Alaksandra Łukašenki, tak i z boku prapahandystaŭ, siarod jakich byli, u pryvatnaści, Ryhor Azaronak i Ksienija Lebiedzieva. Taja pres-kanfierencyja doŭžyłasia 8 hadzin, što mieła na mecie pakazać fizičnuju i intelektualnuju formu Łukašenki praz hod paśla parazy 2020 hoda.
Siońnia rasijskija ŚMI paviedamili, što 17 lutaha moža adbycca čarhovaja sustreča Alaksandra Łukašenki i Uładzimira Pucina.
