Fota: Andrew Harnik, AP
ZŠA ŭ najbližejšy čas płanujuć abjavić ab novym pakiecie sankcyj suprać Rasii, u jaki ŭvojduć kala 200 fizičnych i jurydyčnych asob. Pra heta 21 lutaha raspaviało vydańnie The Wall Street Journal.
Hety pakiet prymierkavany da hadaviny vajennaha poŭnamaštabnaha rasijskaha ŭvarvańnia va Ukrainu, a taksama pryzvany jašče bolš abmiežavać vajskovy i technałahičny patencyjał Kramla, adrezaŭšy jaho ad krytyčna važnych resursaŭ.
«Abmiežavańni zakranuć šerah rasijskich hubiernataraŭ i svajakoŭ uradavych čynoŭnikaŭ. Jašče pad ich padpaduć rasijskija abaronnyja i technałahičnyja kampanii razam sa źviazanymi ź imi fizičnymi asobami, a taksama tyja jurydyčnyja asoby, jakija dapamahajuć Rasii abychodzić užo isnujučyja sankcyi», — paviedamlaje WSJ.
Stała viadoma, što novyja abmiežavańni — tolki častka pakieta mier, jaki raspracavała administracyja prezidenta ZŠA. U jaho taksama ŭvachodzić vajskovaja dapamoha Ukrainie na sumu 460 młn dalaraŭ, pra jakuju Džo Bajden abviaściŭ padčas svajho niadaŭniaha vizitu ŭ Kijeŭ.
Čakajecca, što novy pakiet sankcyj budzie aficyjna abjaŭleny ŭžo na hetym tydni.