U Minsku 30 kastryčnika prajšli sudy nad moładzievymi aktyvistami, jakich napiaredadni zatrymali paśla akcyi pa vyviešvańni nacyjanalnych ściahoŭ u centry stalicy. Aktyvistaŭ hramadzianskaj kampanii «Jeŭrapiejskaja Biełaruś» štrafavali na 15 i 30 bazavych vieličyń.
Nahadajem, što Halinu Piarvušynu, Nastu Askierku i Paŭła Ładućku zatrymali ŭčora viečaram padčas vyviešvańnia dziesiatkaŭ bieł‑čyrvona‑biełych ściahoŭ na praśpiekcie Niezaležnaści ad Parka Čaluścincaŭ da Nacyjanalnaj biblijateki.
Razam z zatrymanymi fotakarespandentami Julijaj Daraškievič i Uładziem Hrydzinym, jakich paśla adpuścili, aktyvistaŭ kampanii «Jeŭrapiejskaja Biełaruś» dastavili ŭ Pieršamajski RUUS. Im było pradjaŭlena abvinavačvańnie ŭ drobnym chulihanstvie, paśla čaho maładych ludziej advieźli ŭ centr izalacyi pravaparušalnikaŭ na Akreścina.
Siońnia ranicaj Halinu Piarvušynu, Nastu Askierku i Paŭła Ładućku dastavili ŭ sud Pieršamajskaha rajona stalicy.
Pavodle prysudu, Nasta Askierka i Halina Piarvušyna pavinny vypłacić štraf u 15 bazavych vieličyń (525 tysiač rubloŭ) kožnaja, a Pavieł Ładućka — 30 bazavych vialičyń (1 młn. 50 tys).
— Prysud ja, biezumoŭna, liču niespraviadlivym, bo mianie abvinavacili i pryznali vinavataj u tym, čaho ja nie rabiła. Supracoŭniki milicyja śćviardžali, što ja łajałasia matam. Nasamreč heta jany kryčyli i niervavalisia, a ja pavodziła siabie spakojna, — raskazała «Salidarnaści» Nasta Askierka, jakuju ŭčora zatrymali kala stancyi mietro «Maskoŭskaja». — Noč na Akreścina była niepryjemnaj, było choładna, ale ja ni ab čym nie škaduju. My praviali akcyju dla taho, kab ludzi pamiatali pra tyja hanieńni, ź jakimi sutyknulisia 29 kastryčnika 1989 hodu ŭdzielniki pachodu na Kurapaty, kab pamiatali pra achviar stalinskaha režymu.
