Alaksandr Łukašenka daručyŭ kiraŭniku Administracyi prezidenta Uładzimiru Makieju bližejšym časam padrychtavać prapanovy pa kadravych rašeńniach adnosna členaŭ urada.
Pra heta prezident zajaviŭ 30 kastryčnika na naradzie pa vynikach sacyjalna-ekanamičnaha raźvićcia krainy za 9 miesiacaŭ 2009 hoda i prajektach prahnozu sacyjalna-ekanamičnaha raźvićcia, biudžetu i asnoŭnych napramkaŭ hrašova-kredytnaj palityki na nastupny hod.
«Kraina žyvie tak, jak byccam kryzisu ŭ krainie niama.Na čym jeździli, na tym i jeździać. Kudy jeździli, tudy i jeździać. Što jeli — toje jamo, što apranali — toje i apranajem», — cytuje Łukašenku jahonaja pres-słužba.
«Nichto jašče ŭ kryzisie nie žyŭ, akramia naroda, jakomu tolki i prapanoŭvajuć to na 10 dalaraŭ, to na 5 pavysić płaciažy pa kamunałcy, — skazaŭ jon. — I nie chadzicie da mianie i nie prasicie, maŭlaŭ, davajcie heta pavialičym, toje padnimiem. Šukajcie šlachi źnižeńnia sabiekoštu. Pracujcie nad pavyšeńniem pradukcyjnaści pracy».
Alaksandr Łukašenka taksama znoŭ papiaredziŭ ministraŭ ab tym, što «pačaŭ asabista i piersanalna słuchać kožnaha».
«I paprašu hubiernataraŭ usurjoz zaniacca svaimi terytoryjami. Pytańnie numar adzin — pramysłovaść. Hubiernatary asabista z zaŭtrašniaha dnia pavinny ŭznačalić kampaniju pa razhruzcy składoŭ usich pradpryjemstvaŭ, — skazaŭ prezident. — Niachaj što chočacie robiać, ale vychodziać na zadadzieny ŭzrovień. Ci alternatyva: nie možacie — skažycie. Ja budu šukać inšych ludziej, chto b heta zmoh. Ale pryniatyja mnoju rašeńni — zakon dla ŭsich tut prysutnych».
Padvodziačy vyniki narady, Łukašenka zastaŭsia niezadavoleny padrychtavanymi ŭradam dakumientami. Na 2010 hod uradam byli padrychtavanyja dva varyjanty prahnozu sacyjalna-ekanamičnaha raźvićcia. Heta bazavy varyjant, jaki praduhledžvaje rost VUP na ŭzroŭni 2-3%, i metavy, jaki praduhledžvaje rost VUP u miežach 11-12%.
«Hetyja dakumienty ničoha nie vartyja.
I nie pasujuć dla taho, kab pracavać u nastupnym hodzie napružana. Pavinien być adzin prahnoz, adzin płan hrašova-kredytnaj palityki, zrazumieły dla naroda», — skazaŭ prezident.
Kiraŭnik dziaržavy daručyŭ Piatru Prakapoviču i namieśniku kiraŭnika Administracyi prezidenta Leanidu Anfimavu ŭznačalić dapracoŭku hetych dakumientaŭ. «Prakapovič, Anfimaŭ, vy — hałoŭnyja adkaznyja, na praciahu miesiaca padrychtavać usie dakumienty na nastupny hod. Kali raniej padrychtujecie — budzie lepš. Usie rašeńni, pryniatyja na trecim Usiebiełaruskim narodnym schodzie, niaŭchilna pavinny być vykananyja», — zapatrabavaŭ Łukašenka.
Źviartajučysia da kiraŭnika Nacbanka, prezident adznačyŭ: «Piotr Piatrovič, dla vas heta maksimum času. Najmajcie, pryciahvajcie kaho chočacie. Staŭcie zadačy razam. A kiraŭnik Administracyi pavinien unieści mnie hetyja dakumienty kančatkova».
