Vyjava: pixabay
Jašče hod tamu hłabalnaja niastača na rynku ŭsiaho adnaho mietału moh adzin sarvać enierhietyčny pierachod (tak zvany pierachod z vykapniovaj enierhietyki da enierhietyki, jakaja bazujecca na adnaŭlalnych krynicach). Mała taho, što kobalt — najvažniejšy materyjał dla akumulataraŭ — zdabyvaŭsia zanadta pavolna, kab zadavolić imklivy popyt na jaho, dyk jašče i lvinaja dola viadomych zapasaŭ znachodziłasia ŭ Konha, niestabilnaj krainie ź vializnym uzroŭniem karupcyi i vykarystańniem dziciačaj pracy. Adnak raptoŭna cana na błakitny mietał (jakaja vyrasła bolš čym udvaja ź leta 2021 pa viasnu 2022 hoda i składała 82 000 dalaraŭ za tonu) abvaliłasia da 35 000 dalaraŭ, što niedaloka ad histaryčnaha minimumu.
Častkova historyja źviazanaja sa źmianšeńniem popytu. Bolšaja častka kobaltu traplaje ŭ akumulatary, jakija siłkujuć smartfony, płanšety i noŭtbuki. Popyt na ich, i biez taho mocny ŭ 2010-ja hady, vybuchnuŭ padčas pandemii COVID-19. Z tych časoŭ jon pamienšyŭsia, bo ludzi ciapier pravodziać usio ž mienš času z hadžetami, čym u časy łakdaŭnaŭ. A z padzieńniem popytu na bytavuju elektroniku źniziŭsia i popyt na kobalt. Navat bum elektramabilaŭ nie byŭ dastatkovym, kab supraćstajać hetamu, bo vytvorcy zrabili ŭsio mahčymaje, kab skaracić vykarystańnie supierdarahoha (raniej) mietału.
U toj ža čas prapanova raście, pryčym chutka: pa prahnozach analitykaŭ vytvorčaść kobaltu ŭ Konha ŭ hetym hodzie vyraście na 38% — da 180 000 ton. Najbolš uražvaje paralelny ŭsplosk indaniezijskaha ekspartu, jaki, pavodle prahnozaŭ, dasiahnie 18 000 ton u hetym hodzie, u paraŭnańni z praktyčna nulavoj zdabyčaj niekalki hadoŭ tamu.
Na inšych rynkach nizkija ceny prymušajuć vytvorcaŭ zakryvać šachty. Ale heta nie tyčycca kobaltu. Choć cana ŭžo apuściłasia nižej za punkt biasstratnaści dla mnohich šachtaŭ, bujnyja hulcy na rynku mohuć ciarpieć nizkija ceny, tamu što kobalt — pabočny pradukt zdabyčy miedzi i nikielu, jakija zastajucca darahimi. Vytvorcy elektramabilaŭ va ŭsim śviecie starajucca padtrymlivać družalubnyja adnosiny ź Indaniezijaj dziela nikielu, raspačynajučy i finansujučy prajekty, jakija siarod inšaha dajuć dostup da vytvorčaści kobaltu.
U hetym hodzie ceny ŭsio jašče mohuć krychu vyraści, bo śpiekulanty imknucca atrymać vyhadnyja ŭhody. Adnak paśla 2025 hoda nasoŭvajecca jašče adzin abmiežavalnik rostu cany. Da hetaha času pieršaja chvala akumulataraŭ dla elektramabilaŭ, termin słužby jakich zvyčajna składaje da vaśmi hadoŭ, pačnie pierapracoŭvacca, što źmienšyć patrebu ŭ novych pastaŭkach.
Takim čynam, niezaležna ad taho, nakolki chutka budzie paskaracca enierhietyčny pierachod, błakitnaje zołata naŭrad ci budzie tarmazić raźvićcio bolš ekałahičnaj enierhietyki.
