Piatro Prakapovič, Leanid Anfimaŭ, Siarhiej Tkačoŭ?
Alaksandr Łukašenka daručyŭ kiraŭniku Administracyi prezidenta Uładzimiru Makieju bližejšym časam padrychtavać prapanovy pa kadravych rašeńniach adnosna členaŭ urada. Heta adbyłosia ŭ piatnicu 30 kastryčnika na naradzie pa vynikach sacyjalna-ekanamičnaha raźvićcia krainy sioleta i prajektach prahnozu ekanamičnaha raźvićcia i biudžetu naleta.
U toj viečar Łukašenka byŭ surovy. Dziaržaŭnyja telekanały pakazvali, jak jon u hnievie nazyvaŭ čynoŭnikaŭ łajdakami.
«Kraina žyvie tak, jak byccam kryzisu ŭ krainie niama. Na čym jeździli, na tym i jeździać. Kudy jeździli, tudy i jeździać. Što jeli — toje jamo, što apranali — toje i apranajem», — cytuje Łukašenku jahonaja pres-słužba.
«Nichto jašče ŭ kryzisie nie žyŭ, akramia naroda, jakomu tolki i prapanoŭvajuć to na 10 dalaraŭ, to na 5 pavysić płaciažy pa kamunałcy, — pa-papuliscku hrymieŭ jon. — I nie chadzicie da mianie, i nie prasicie, maŭlaŭ, davajcie heta pavialičym, toje padnimiem. Šukajcie šlachi źnižeńnia sabiekoštu. Pracujcie nad pavyšeńniem pradukcyjnaści pracy».
Kiraŭnik dziaržavy daručyŭ staršyni Nacbanka Piatru Prakapoviču i namieśniku kiraŭnika Administracyi prezidenta Leanidu Anfimavu ŭznačalić dapracoŭku dakumientaŭ prahnozu sacyjalna-ekanamičnaha raźvićcia na 2010 hod, jakija rychtavaŭ urad.
Paśla hetaj narady čarhovy raz zahavaryli pra adstaŭku premjer-ministra Siarhieja Sidorskaha. Chto moža zaniać pasadu kiraŭnika ŭrada?
«Źmieny va ŭradzie mohuć adbycca vielmi chutka, jašče ŭ listapadzie, — kaža palityčny ahladalnik Raman Jakaŭleŭski. — Vidavočna, što Łukašenka byŭ niezadavoleny vynikam pieramovaŭ Sidorskaha ŭ Maskvie z Uładzimiram Pucinym, bo vynikaŭ nie było nijakich. Tamu Sidorski stanovicca voś takoj achviaraj. Łukašenka rašuča adšturchnuŭ usie prapanovy Sidorskaha i Siamaški. Ja bolš schilajusia da taho, što novym premjeram moža stać Leanid Anfimaŭ. Jon maje vydatnuju bijahrafiju — pracavaŭ u Minharvykankamie i Kamitecie dziaržkantrolu. Jahony aŭtarytet u łukašenkaŭskim atačeńni taksama raście».
Akramia biezabličnaha Anfimava, nazyvajucca i bolš viadomyja narodu proźviščy.
«Moža adbycca płanavaja źmiena premjera napiaredadni vybaraŭ. Ciažka skazać, chto moža stać novym kiraŭnikom urada. Najčaściej nazyvajecca proźvišča Prakapoviča, pazicyi jakoha ŭzmacniajucca, ale ci choča jon sam taho. Zdajecca, jon bolš choča pierakłaści častku paŭnamoctvaŭ urada na Nacbank. Pamočnik prezidenta Tkačoŭ taksama naŭrad ci. Ale važna, što Tkačoŭ źmianiŭ svaje artadaksalnyja pohlady. Moža być Siamaška ci niechta zusim novy. Nie važna, chto stanie novym premjeram, važna, ci zastaniecca stary kurs u ekanomicy, ci budzie novy», — kaža palitołah Vital Silicki.
Raman Jakaŭleŭski robić prahnoz, što Sidorskaha mohuć pryznačyć staršynioj Minskaha harvykankama. Pasada pustuje ad leta paśla zvalnieńnia pa chvarobie Michaiła Paŭłava. «Ja asabista nakiravaŭ by Sidorskaha pasłom u Maskvu ci Kijeŭ, bo jon viedaje hetuju pracu, ale naŭrad Łukašenka na takoje advažycca», — kaža R.Jakaŭleŭski.
