Paviedamlajecca, što ŭ mai 2021 hoda ŭ efiry adnaho z telekanałaŭ i na YouTube była raźmieščanaja rekłama anłajn-hipiermarkieta «Je-dastaŭka» (ZAT «internet-krama Jeŭraopt»), u jakoj paraŭnoŭvalisia ceny ŭ «Je-dastaŭcy» i inšych handlovych sietkach na padstavie danych servisu paraŭnańnia cen Infoprice.by.
Źviartałasia ŭvaha na toje, što ceny ŭ anłajn-kramie, naprykład, «u siarednim na 30% nižejšyja, čym u kankurentaŭ», «za padhuźniki ŭ inšych kramach možna pierapłacić da 46% u paraŭnańni z «Je-dastaŭkaj», a taksama, što «Je-dastaŭku» vybirajuć usie».
U chodzie antymanapolnaha rasśledavańnia MARH było ŭstanoŭlena, što śćviardžeńni ab pieravahach internet-kramy, paraŭnańnie ŭzroŭniu cen z handlovymi sietkami — kankurentami nie ŭjaŭlajecca mahčymym abjektyŭna pravieryć, a anłajn-hipiermarkietam nie pradstaŭlenyja dokazy dakładnaści infarmacyi z rekłamy.
Akramia taho, spasyłajučysia na danyja servisu paraŭnańnia cen Infoprice.by, kampanija nie źviartaje ŭvahu na asablivaść krynicy infarmacyi: servisam pa zmoŭčvańni analizujecca tolki «top-500» tavaraŭ. Adsutnaść takoj ahavorki, na dumku MARH, moža stvaryć u spažyŭcoŭ pamyłkovaje ŭražańnie pra toje, što ŭ rekłamie paraŭnoŭvajecca ŭzrovień cen na ŭvieś asartymient tavaraŭ handlovych sietak.
U vyniku niekarektnaje paraŭnańnie anłajn-hipiermarkieta z kankurentami na svaju karyść pryznanaje MARH niesumlennaj kankurencyjaj.
MARH nahadvaje, što niesumlennaja kankurencyja ciahnie nakładańnie štrafu na jurydyčnuju asobu ŭ pamiery da 10% ad sumy hadavoj vyručki (artykuł 13.33 KaAP). Mieru adkaznaści dla parušalnika vyznačyć sud.
Kampanii taksama budzie vydadzienaje pradpisańnie ab spynieńni niesumlennaj kankurencyi, havorycca ŭ paviedamleńni.
Vyručka internet-kramy «Jeŭraopt» u minułym hodzie skłała 452 młn rubloŭ (u 2021 hodzie — 319 młn), značyć, joj pahražaje štraf da 45 młn rubloŭ abo da 32 młn, kali sud budzie ličyć vyručku 2021 hoda, paličyŭ partał «Zierkało».
