Viciebskija łukašysty stali zapisvać videa z animavanymi piersanažami 8
«Viciebskaja viasna» zaŭvažyła, što ŭ adnym ź miascovych telehram-kanałaŭ, źviazanych z łukašenkaŭskimi siłavikami, źjaviłasia videa z zatrymanymi pa palityčnych matyvach biełarusami ŭ vielmi dziŭnym farmacie: zamiest tvaraŭ zatrymanych, jakija raspaviadajuć pra toje, jak jany nibyta parušyli zakanadaŭstva, hladač bačyć animavanyja vyjavy.
U videaroliku praciahłaściu paŭtary chviliny zapisany hałasy šaści zatrymanych: piaci mužčyn i adnoj žančyny. Videa zmantavana takim čynam, što animavanyja piersanažy nibyta robiać svaje pryznańni na fonie krataŭ.
Taksama rolik supravadžajecca ździeklivym tekstam pra «raznosčykaŭ ekstremisckaj zarazy», jakija stali ŭdzielnikami «rozyhryšu puciovak i niezabyŭnych padarožžaŭ u IČU».