Rajon pošukaŭ. Fota: AP
U Atłantyčnym akijanie vyjaŭlenyja abłomki batyskafa «Tytan», jaki źnik pry apuskańni da patanułaha łajniera «Tytanik». Piać čałaviek, jakija znachodzilisia na borcie, zahinuli, jak piša Bi-bi-si.
Jak paviedamiła bierahavaja achova ZŠA, padvodny aparat Odysseus, spuščany z kanadskaha sudna Horizon Arctic, vyjaviŭ chvastavy konus batyskafa, a taksama inšyja častki korpusa prykładna za 500 mietraŭ (1600 futaŭ) ad nosa «Tytanika», jaki znachodzicca na hłybini 3800 mietraŭ.
Stan abłomkaŭ pakazvaje na katastrafičnaje razbureńnie, adnak jaho pryčyna nieviadomaja. Mahčyma, heta byŭ vybuch. Taksama niezrazumieła, ci ŭdasca znajści cieły zahinułych.
«Heta niejmavierna surovaje asiarodździe», — zajaviŭ na pres-kanfierencyi ŭ Bostanie kontr-admirał bierahavoj achovy ZŠA Džon Mohier.
Kampanija OceanGate, jakoj naležyć «Tytan», raniej vypuściła zajavu, u jakoj pryznała hibiel ekipaža.
«Hetyja ludzi byli sapraŭdnymi daśledčykami, jakich abjadnoŭvaŭ asablivy duch pryhod i hłyboki zapał da vyvučeńnia i abarony Suśvietnaha akijana», — havorycca ŭ zajavie.
Sudna Polar Prince, jakoje dastaviła «Tytan» na miesca apuskańnia, prybyło da miesca, dzie 110 hadoŭ tamu zatanuŭ «Tytanik», u noč na niadzielu.
Batyskaf pačaŭ apuskańnie ranicaj, ale straciŭ suviaź z pavierchniaj praz 1 hadzinu i 45 chvilin paśla pačatku misii.
Na borcie batyskafa znachodzilisia piać čałaviek: 58-hadovy brytanski biznesoviec i daśledčyk Chemiš Chardynh, 48-hadovy biznesoviec z Pakistana Šachzada Davud i jaho 19-hadovy syn Suleman, 61-hadovy Stoktan Raš, dyrektar kampanii OceanGate, a taksama 77-hadovy francuzski daśledčyk Pol-Anry Naržole.
Ekipaž Polar Prince nie adrazu prainfarmavaŭ bierahavuju achovu ZŠA ab tym, što suviaź z «Tytanam» pierapyniłasia: ich apaviaścili pra heta prykładna praz vosiem hadzin. Paśla hetaha kamandny centr viedamstva ŭ Bostanie pačaŭ kaardynavać pošukavuju apieracyju, u jakoj brali ŭdzieł niekalki krain.
Spačatku batyskaf šukali rechałotami, zatym dastavili na miesca bieśpiłotnyja padvodnyja aparaty, zdolnyja pracavać na vialikaj hłybini.
Bierahavaja achova skiravała dva samaloty C-130 Hercules dla pošuku padvodnaha aparata na pavierchni vady, da ich dałučyŭsia kanadski samalot C-130 i samalot P8, abstalavany padvodnym sanaram.
U hetym rajonie taksama pakinuli hidraakustyčnyja bui.
U čaćvier pošuki batyskafa ŭvajšli ŭ vyrašalnuju stadyju, bo zapas kisłarodu na borcie pavinien byŭ kančacca.
Bierahavaja achova ZŠA pašyryła maštab vyratavalnaj apieracyi, padklučyŭšy da jaje jašče 10 sudoŭ i niekalki padvodnych łodak.
Raniej rechałoty zasiekli niekalki miescaŭ, adkul iduć padvodnyja šumy, ale ŭ nivodnaj ź ich batyskaf nie vyjavili. Adnak udzielniki apieracyi zasiarodzili namahańni ŭ niepasrednaj blizkaści ad miesca, dzie ŭdałosia zasiačy šumy.
Vyratavalnuju apieracyju pačali častkova zhortvać paśla taho, jak vyjaŭlenyja na dnie abłomki identyfikavali jak častki batyskafa.
Čytajcie taksama:
