Zaniatki ŭ anłajn-škole. Fota: sacyjalnyja sietki Pieršaj biełaruskaj anłajn-škoły va Ukrainie
«Nastaŭniki viedajuć minusy biełaruskaj sistemy adukacyi i ŭličvajuć ich»
Navučalny hod u Pieršaj biełaruskaj anłajn-škole va Ukrainie pačniecca 11 vieraśnia. U joj čakajuć vučniaŭ va ŭzroście ad 10 da 16 hadoŭ. Heta školniki 4-10 kłasaŭ. Padrabiaznaści pryjomu tut.
«My pracujem dla biełaruskich dziaciej z usiaho śvietu», — padkreślivaje Nastaśsia Špakoŭskaja, arhanizatarka škoły, aktorka i lidarka hurta «Naka».
Biełaruskaja anłajn-škoła — poŭnafarmatnaja navučalnaja ŭstanova, prahrama jakoj składzienaja z pradmietaŭ biełaruskaj školnaj adukacyi. U joj biełaruskija nastaŭniki vučać dziaciej biełaruskaj movie, litaratury, historyi, a taksama anhlijskaj movie i asnovam IT. Akramia taho, u škole vykładajecca historyja mastactva, a akcior Alaksandr Ždanovič (Malavanyč) pravodzić zaniatki dabryni. Ruskaj movie i litaratury vučać pa žadańni.
Anłajn-škoła pracuje z kijeŭskaj pryvatnaj škołaj «Midhard». Jaje nastaŭniki dajuć dzieciam uvieś viektar ukrainskich pradmietaŭ, pa jakich vučni atrymlivajuć atestat dziaržaŭnaha ŭzoru Ukrainy, jaki pryznajecca ŭ śviecie.
«U škole našy dzieci vyvučajuć biełaruskuju, ukrainskuju, anhlijskuju i, na žadańnie, ruskuju movy», — zaŭvažaje Nastaśsia Špakoŭskaja.
Pradmiety, jakija vyvučajuć u anłajn-škole. Skryn z sajta Pieršaj biełaruskaj anłajn-škoły va Ukrainie
Historyja biełaruskaj anłajn-škoły siahaje ŭ 2020 hod. Tady Nastaśsia Špakoŭskaja ź dziećmi vymušana była emihravać u Kijeŭ, dzie biełaruskich navučalnych ustanoŭ nie było. Artystka vyrašyła sama stvaryć jaje, vykarystoŭvajučy mahčymaści ŭkrainskaj sistemy adukacyi. U kastryčniku 2020-ha navučalny hod u biełaruskaj škole pačaŭsia, ale z-za kavidnych abmiežavańniaŭ — u anłajn-farmacie. Anłajn-farmat zastajecca aktualnym dahetul. Pieršyja dva miesiacy paśla poŭnamaštabnaj ahresii Rasii suprać Ukrainy ŭ navučańni byŭ pierapynak, a paśla zaniatki adnavilisia.
Uroki pravodziacca z paniadziełka da piatnicy ŭ pieršaj pałovie dnia. Kłasy da 12 čałaviek. Takaja forma navučańnia dazvalaje nastaŭniku achapić uvahaj usich vučniaŭ i tym samym pavialičyć jakaść atrymanych imi viedaŭ.
«Viedajučy nastaŭnikaŭ i jak cikava jany danosiać viedy dzieciam, nie zachacieć vučyć biełaruskaj movy nie mahčyma. U nas dobryja nastaŭniki. Svajo navučańnie jany bazava zasnoŭvajuć na dziaržaŭnaj školnaj prahramie, ale pry hetym razumiejučy ŭsie jaje minusy, raspracoŭvajuć bolš raznastajnyja i cikaviejšyja svaje kursy. Anłajn-farmat dazvalaje vykarystoŭvać šmat dadatkovych materyjałaŭ, tamu vučni atrymlivajuć sučasnuju adukacyju», — davodzić Nastaśsia Špakoŭskaja.
«U škole pracuje 11 nastaŭnikaŭ, jakija zaznali pieraśled uładaŭ»
Sioleta vypusknikami škoły stali blizu dvuch dziasiatkaŭ vučniaŭ. Praciahvajuć navučańnie bolš čym 50 vučniaŭ z 15 krainaŭ.
Nastaśsia Špakoŭskaja pierakananaja, što vučnioŭski kalektyŭ sioleta papoŭnicca jašče 20 novymi vučniami.
Pa jaje słovach, letaś, u siaredzinie navučalnaha hoda, paśla taho, jak u Biełarusi adbyłasia začystka pryvatnych škoł, byŭ vialiki napłyŭ vučniaŭ. Baćki nie chacieli vučyć svaich dziaciej u dziaržaŭnych ustanovach Biełarusi.
«Ciapier šmat biełaruskich siemjaŭ akazałasia ŭ takich umovach, što naša škoła ci nie adzinaja, dzie možna praciahvać navučańnie i atrymlivać viedy pa biełaruskaj movie, historyi i naahuł zachoŭvać biełaruskaść», — kaža jana.
Nastaŭniki škoły pravodziać dadatkovyja subotnija zaniatki, dzie biełaruskija dzieci vyvučajuć tolki pradmiety ź biełaruskaj prahramy navučańnia.
U škole pracuje 11 nastaŭnikaŭ, jakija zaznali pieraśled uładaŭ. Dla bolšaści praca ŭ joj adzinaja krynica dachodaŭ.
«Biaspłatnaja škoła — mara»
Nastaśsia kaža, što da vajny ŭkrainskija nastaŭniki, jakija žyvuć u Kijevie, pryzvyčailisia. Raniej, kali pačynalisia bambiožki, zaniatki pieranosili, a ciapier navučylisia vieści ich z bambaschoviščaŭ.
«Naohuł taki stres staŭ zvykłym u našym žyćci i škoła pracuje. Letaś, kali išła vajna, my skončyli hod paśpiachova, dzieci atrymali atestacyju i sioleta biez prablemaŭ skončyli vučobu, niahledziačy na biedy vajennaha času», — adznačaje surazmoŭnica.
Nastaśsia Špakoŭskaja. Fota: «Naša Niva»
Špakoŭskaja choča, kab anłajn-škoła była biaspłatnaj. Pakul ža heta jaje mara.
Pavodle Nastaśsi, zvaroty ŭ fondy i arhanizacyi, jakija zajaŭlajuć ab dapamozie asiarodkam biełaruskaj adukacyi za miažoju, nie dajuć plonu.
«My vymušany brać nievialikija hrošy z baćkoŭ, kab apłačvać pasłuhi ŭkrainskaj škoły «Midhard», jakaja vydaje nam atestacyju pa asnoŭnym viektary ŭkrainskich pradmietaŭ, i, zrazumieła, apłačvać pasłuhi našych nastaŭnikaŭ».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Aktrysa i śpiavačka Nastaśsia Špakoŭskaja: U svoj čas ja nie stała lizać nikomu dupu
Minčanka apłaciła adny zaniatki ŭ IT-škole. A praz hod u šoku: jana vinavataja canu cełaha kursa
