fota - AR
19 karcinaŭ, siarod jakich pracy Van Hoha, Pikasa, Siezana i Hahiena , znajšła italjanskaja palicyja hetymi vychadnymi na haryščy zasnavalnika zbankrutavanaha kancernu «Parmałat». Palicyja aceńvaje, što prychavanyja karciny majuć ahulny košt 100 miljonaŭ jeŭraŭ. Siarod znojdzienych tvoraŭ: piejzažy Van Hoha, akvarel Sezana, i škica Madeljani, zroblenaja ałoŭkam.
Pavodle papiarednich acenak, Kalista Tancy, zasnavalnik «Parmałatu» i adzin z tych, chto davioŭ charčovy kancern da bankructva ŭ 2003 hodzie, schavaŭ karciny, kab uchilicca ad kanfiskacyi majomaści paśla sudovaha vyraku.
Prakuror horadu Parma Džerarda Łahvardyja kaža, što, hruntujučysia na prasłuchoŭvańni telefonnych razmovaŭ, Tančy mieŭsia nieŭzabavie pradać karcinu. «Nam pašenciła: pačuŭšy pa telefonie razmovu pra adnu uhodu ad prodažy karciny, my zrabili pieratrus u troch parmskich kvaterach». Palicyja nie raskryvaje, kamu były biznesoviec mieŭsia pradać karcinu, adno paviedamlaje, što mierkavanym pakupnikom musiŭ być rasijec, jaki stała žyvie ŭ Italii: jon mieryŭsia kupić karcinu Mane «Skały ŭ Parvili» za 10 miljonaŭ jeŭraŭ.
Jašče daŭniej, 29 listapada pa italjanskim dziaržtelebačańni zajaŭlałasia, što Kalista Tancy chavaje zbory mastactva ŭ siabie doma. Dzień paśla Tancy vystupiŭ z zajavaj, što «nia maje nijakich schavanych tvoraŭ mastactva», i adprečyŭ ćvierdžańnie, što jon maje niešta na zapas kab uniknuć kanfiskacyi.
Letaś zasnavalnik «Parmałatu» byŭ pryhavorany da 10 hadoŭ źniavoleńnia za svaju daŭdzielnaść da bankructva kancernu. Niadaŭna jon padaŭ apielacyju, i ciapier čakaŭ pierahladu svajoj spravy. Kancern «Parmałat» razvaliŭsia u śniežni ŭ 2003 hodzie, kali vyśvietliłasia, što siabry kiroŭnickaj rada z kanca 80-ych padrablali čeki. Na niejkim etapie vyjaviłasia, što bolšaść čekaŭ, jakimi vałodaŭ kancern, prosta nielha abnajavić, i tady nabiahło pazykaŭ na 14 miljardaŭ dalaraŭ.
