Alaksandr Łukašenka 7 śniežnia padpisaŭ ukaz № 595 «Ab zaćviardžeńni najvažniejšych paramietraŭ prahnozu sacyjalna-ekanamičnaha raźvićcia Respubliki Biełaruś na 2010 hod», paviedamlaje pres-słužba kiraŭnika dziaržavy.
Praduhledžvajecca, što ŭ 2010 hodzie ŭ paraŭnańni z papiarednim rost vałavoha ŭnutranaha praduktu składzie 11—13%, pradukcyi pramysłovaści — 10—12%, pradukcyi sielskaj haspadarki — 10—11%, inviestycyj u asnoŭny kapitał — 23—25%.
Prahnazujecca, što ŭ 2010 hodzie na ekspart budzie nakiravana 52% pryrostu vytvorčaści pramysłovaj pradukcyi.
Z ulikam hetaha abjom źniešniaha handlu tavarami i pasłuhami pavialičycca na 24—25%, u tym liku ekspartu — na 27—28%, impartu — na 20—21%.
Rost realnaj zarabotnaj płaty ŭ 2010 hodzie składzie 13—14% pry indeksie spažyvieckich cen 9—10%. Naminalnaja naličanaja siaredniamiesiačnaja zarabotnaja płata pa narodnaj haspadarcy da kanca 2010 hoda dasiahnie 500 dalaraŭ ZŠA ŭ ekvivalencie.
Jak zaznačaje pres-słužba prezidenta, u cełym zadańni pa prahnoznych paramietrach na 2010 hod ustanoŭleny «z ulikam biezumoŭnaha vykanańnia rašeńniaŭ treciaha Usiebiełaruskaha narodnaha schodu i dasiahnieńnia asnoŭnych pakazčykaŭ Prahramy sacyjalna-ekanamičnaha raźvićcia Biełarusi na 2006—2010 hady».
Jak viadoma, na 2010 hod uradam byli padrychtavany dva varyjanty prahnozu sacyjalna-ekanamičnaha raźvićcia.
Heta bazavy varyjant, jaki praduhledžvaŭ rost VUP na ŭzroŭni 2—3%, i metavy, jaki praduhledžvaŭ rost VUP u miežach 11—12%.
Na naradzie 30 kastryčnika Łukašenka zastaŭsia niezadavoleny padrychtavanymi ŭradam dakumientami. «Hetyja dakumienty
nikudy nie vartyja.
I nie prydatnyja dla taho, kab pracavać u nastupnym hodzie napružana. Pavinien być adzin prahnoz, adzin płan hrašova-kredytnaj palityki, zrazumieły dla naroda», — padkreśliŭ prezident.
Kiraŭnik dziaržavy daručyŭ tady
staršyni praŭleńnia Nacbanka Piatru Prakapoviču i namieśniku kiraŭnika Administracyi prezidenta Leanidu Anfimavu
ŭznačalić dapracoŭku hetych dakumientaŭ i na praciahu miesiaca ich padrychtavać.
Łukašenka taksama padkreśliŭ, što 2010 hod pavinien stać etapam adnaŭleńnia chutkaha ekanamičnaha rostu: «Nielha zabyvać, što 2010 hod asablivy — jon zaviaršaje piacihodku. Ad taho, jak u hety pieryjad spracujem, budzie zaležać dasiahnieńnie zapłanavanych vynikaŭ i stupień palapšeńnia jakaści žyćcia ludziej — usio, što my abiacali biełaruskamu narodu».
Varta zaznačyć, što pavodle vynikaŭ 10 miesiacaŭ 2009 hoda Biełaruś uvajšła ŭ lik krain SND, dzie adbyłosia padzieńnie VUP. Za studzień—kastryčnik VUP źniziŭsia na 1%.
Miž inšym, zhodna z prahnozam sacyjalna-ekanamičnaha raźvićcia krainy ŭ 2009 hodzie čakaŭsia pryrost VUP na 10—12%.