Storys u instahramie piceryi. Skryn staronki piceryi «Kult picy»
Taki post źjaviŭsia 19 vieraśnia ŭ storys akaŭnta piceryi ŭ instahramie. Dopis supravadžaŭsia kartaj, na jakoj uschodnija ziemli ciapierašniaj Polščy dałučanyja da Biełarusi.
U piceryi skazali, što akaŭntam u instahramie zajmajecca ich «načalnik» i ŭsie pytańni pra jaho źmiest varta adrasavać jamu. Imia kiraŭnika nazvać admovilisia.
Na sajcie piceryi jaje kiraŭnicaj paznačana indyvidualnaja pradprymalnica Anastasija Lovačkina. U takim statusie jana zarehistravanaja z 12 vieraśnia 2021 hoda. Asnoŭny vid jaje dziejnaści — «vyrab chlebabułačnych, mučnych kandytarskich vyrabaŭ niepraciahłaha zachoŭvańnia».
Čytač «Našaj Nivy» pahutaryŭ z administrataram akaŭnta piceryi ŭ miesiendžary instahrama. Pierapiska ź im dasłanaja «Našaj Nivie».
Nieŭzabavie paśla hutarki post byŭ padpraŭleny. U im ciapier napisana, što Biełaruś nie maje terytaryjalnych pretenzij da susiedziaŭ, ale «bresckaja piceryja maje».
Paśla hutarki z čytačom akaŭnt piceryi padkarektavaŭ post. Skryn staronki piceryi «Kult picy»
Čytač pacikaviŭsia ŭ supracoŭnika piceryi, jaki admoviŭsia nazvać siabie, dla čaho byŭ apublikavany pravakacyjny zvarot i ci nie vykonvajecca takim čynam «zahad peŭnych orhanaŭ».
Administratar adpisaŭ, što nie moža zrazumieć pytańniaŭ na biełaruskaj movie.
«Ja kiepska razumieju pa-biełarusku. U mianie try kłasy adukacyja. «Bieł. jaz.» prahulvaŭ», — pryznajecca jon.
Paśla pierakładu ich na ruskuju movu administratar nastojliva prasiŭ čytača jaho numar telefona, kab spraŭdzić, ci źjaŭlajecca jon klijentam piceryi.
«Ja pa klijenckaj bazie manitoru klijentaŭ na zdradnikaŭ radzimy, jakija nie šanujuć historyi svajoj krainy. Davaj numar, ja pravieru na zakazy z 2020 hoda», — zajaŭlaje jon.
«Byli b žycharom Bresta, karennym, babula b vam raskazała pra hienacyd biełarusaŭ», — dadaŭ supracoŭnik piceryi.
«U źbiehłych niama intaresaŭ, elemientarna ty nie płaciš padatkaŭ i nie dapamahaješ starym, — davodzić jon. — Viartajsia ŭ Brest. Patrebna budzie praca, ja dam pracu, u nas zarobak ad 10 rubloŭ za hadzinu. Mahu dać kantakty HUBAZiKa. Upeŭnieny, što kryminalnaj adkaznaści nie budzie, kali nie rabiŭ ničoha drennaha».
Što da Biełastoka, to jon, jak śćviardžaje administratar, «zaŭždy byŭ biełaruskim» i tam «adny biełarusy žyli».
Piceryja «Kult picy», u akaŭncie jakoj źjaviŭsia pravakacyjny post pra Biełastok u składzie Biełarusi. Fota: sacyjalnyja sietki
Supracoŭnik piceryi nastojvaje, što biełarusy Polščy byli b radyja žyćciu ŭ Biełarusi.
«U Biełarusi ach***a. Najlepšaja kraina. Svaboda słova, adukacyja, miedycyna, charčavańnie, darohi — prosta raj na ziamli. Lepš za Polšču i RF», — padsumavaŭ hutarku administratar.
Bresckaja piceryja maje svaje staronki ŭ rasijskich sacyjalnych sietkach. Akaŭnt «UKantakcie» poŭnicca pastami sa źniavažlivymi vykazvańniami ab Ukrainie i krainach Zachadu dy prasłaŭleńniem Rasii. Bahata dopisaŭ z maciukami.
Adzin z pastoŭ na staroncy piceryi «UKantakcie». Fota: sacyjalnyja sietki
Adzin z pastoŭ na staroncy piceryi «UKantakcie». Fota: sacyjalnyja sietki
U apošnim apublikavana mapa BSSR z Padlaššam.
Heta polskaje vajavodstva ŭ 1939 hodzie stała častkaj Biełarusi paśla akupacyi Polščy vojskami Stalina i Hitlera. Hitleraŭskaja Hiermanija i Saviecki Sajuz padzialili tady zachoplenuju krainu zhodna z paktam Mołatava — Rybientropa. Da BSSR była dałučanaja i Vilenščyna.
«U sieciva źlili pravilnuju kartu Biełarusi. Jak vam?» — takim dopisam supravadžajecca pravakacyjny post.
Administruje staronku piceryi «UKantakcie» Maksim Arcichovič. Na jaho staroncy niama pravakacyjnych pastoŭ. U asnoŭnym — dopisy ź siamiejnaha žyćcia.
U kamientarach ad imia piceryi klijentam časam adkazvaje Daniła Lovačkin — vierahodna, svajak zasnavalnicy. Cikava, što na jaho staroncy va «UKantakcie» paznačana, što jon skončyŭ polski pryvatny ŭniviersitet — Vyšejšuju škołu mieniedžmientu / Polish Open University (ustanova ŭžo nie pracuje).
Post na staroncy piceryi «UKantakcie». Fota: sacyjalnyja sietki
Reakcyi kamientataraŭ na pravakacyjny post piceryi «UKantakcie» pieravažna krytyčnaja.
«A ŭ čym fiška takoha pasta? — pytajecca adzin ź ich. — A čamu Smalensk nie biełaruski na hetaj mapie? Tam abviaščali SSRB. A sami žychary ŭschodniaj Polščy ci žadajuć u Biełaruś? Pantujeciesia, spadary, pryčym tupa!!!!»
«Nu ŭ vas i vatnyja sacsietki. Da takoha dadumacca jašče treba ž było, — havorycca ŭ kamientary. — A rozhałas pra heta ŭžo pajšoŭ. Tak što čakajcie padzieńnia prodažu».
«Nie viedaju, jakaja pica ŭ vas, — adznačajecca jašče ŭ adnym, — ale zaraz sapraŭdy nie budu zakazvać».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Hrodna, Biełastok, Koŭna. Jak adroźnivajecca žyćcio ŭ troch blizkich haradach rehijona
Sabrać dzicia ŭ škołu: ceny paraŭnoŭvajuć baćki ŭ Biełarusi, Litvie i Polščy
