Julija Šapiel. Fota ź jaje staronki Ukantakcie
Havorka pra 34-hadovuju Juliju Šapiel. Jana z maleńkaj vioski Chadorki Ivacevickaha rajona, jakaja znachodzicca zusim blizka ad Kosava, radzimy Tadevuša Kaściuški. Jana kiruje (ci da niadaŭniaha času kiravała) ahrasiadzibaj, jakaja mieścicca tut ža, u rodnaj vioscy, razvodziła koniej i kazłoŭ dy rabiła konnyja vandroŭki dla dziaciej.
U studzieni 2023-ha jaje asudzili da 1,5 hoda «chatniaj chimii» za abrazu Łukašenki, a ŭ lutym uklučyli ŭ śpis ludziej, «datyčnych da ekstremisckaj dziejnaści». Ź Biełarusi jana nie źjechała i, kali mierkavać pa videa HUBAZiKa, dahetul žyvie ŭ rodnaj vioscy.
Na pačatku videa, jakoje vykłaŭ u sieciva brescki HUBAZiK, žančyna kaža, što ŭžo adbyvała pakarańnie na sutkach i «spała na padłozie». Pałovu videa hubazikaŭcy ŭdzialili «ahladu» stareńkaj viaskovaj chaty, dzie jana žyvie. Žančyna adkazvaje, što joj davodzicca šmat pracavać i času, kab navieści tam paradak, nie staje. Paśla hetaha jaje zmušajuć vybačacca «pierad usimi, kaho jana abraziła», i chvalić Łukašenku.
Nieviadoma, čym skončyłasia hetaja sustreča ź siłavikami i ci čakaje jaje niejkaje pakarańnie — u videa hetaha nie paviedamlajecca. Mahčyma, pryčynaj vizitu siłavikoŭ stali niejkija fota ci dopisy ŭ sacsietkach žančyny: jany adznačajuć, što ŭ jaje «bardak na staroncy ŭ sacyjalnaj sietcy».
U kancy hučyć pahroza pra toje, što «druhi raz pakarańnie budzie źviazana z pazbaŭleńniem voli».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Jak zaścierahčy siabie ŭ VK, Facebook i «Adnakłaśnikach» — padrabiazny hajd
Jak pravilna čyścić svoj akaŭnt u Instagram, kab zaścierahčy siabie. Padrabiazny hajd
