Sudździa Śviatłana Bandarenka
Alaksandr Łukašenka padpisaŭ ukaz «Ab pryznačeńni i vyzvaleńni sudździaŭ». Na pavyšeńnie pajšli niekatoryja z tych, chto ščyravaŭ na palityčnych spravach.
Sudździoj Viarchoŭnaha suda naznačyli Śviatłanu Bandarenku (dahetul jana pracavała ŭ Minskim haradskim sudzie). Siarod jaje prysudaŭ — vyraki niekatorym kamientataram u «spravie Zielcera», redaktaru «Ježiednievnika» Siarhieju Sacuku, doktaru Arciomu Sarokinu i žurnalistcy Kaciarynie Barysievič.
Jana ž dała zavočna 12 hod płyŭčysie Alaksandry Hierasimieni. A ŭ 2020-m vypisała 15 sutak muzyku Paŭłu Arakielanu.
U Viarchoŭny sud z Homielskaha abłasnoha pieraviali sudździu Alaksieja Chłyščankova. Jon taksama razhladaŭ spravy tych, chto kamientavaŭ pierastrełku Zielcera i Fiedasiuka, adpraviŭ na 4 hady za kraty žurnalista Jaŭhiena Mierkisa.
Pavysili i niekalki inšych sudździaŭ, zaŭvažnych na palityčnych spravach. Siarhieja Kacara z Maskoŭskaha rajonnaha suda stalicy pieraviali ŭ Minski haradski. Paśla vybaraŭ 2020 hoda jon mnohich adpraŭlaŭ na sutki — za ściah u aknie, čajavańnie z tortam, pracu žurnalistam na sudach. Jon taksama daŭ ad 2,5 da 3 hadoŭ kałonii haradžanam, jakija spalili čučała Łukašenki.
Namieśnikam suda Pinskaha rajona i Pinska pastavili na ŭlik sudździu Andreja Byčyłu. Jon davaŭ sutki za «raspaŭsiud ekstremisckich materyjałaŭ». Hety sudździa adpraviŭ za kraty Mikałaja Klimoviča, jaki paśla pamior u Viciebskaj kałonii № 3.
