Mikałaju Aŭtuchoviču za hod tak i nie pieradali za kraty nivodnaj banderoli, chacia pavodle zakonu jamu naležyć atrymać nie mieniej za adnu. Pra heta «Radyjo Svaboda» raskazała svajačka byłoha pradprymalnika i pravaabaroncy, jakaja pražyvaje ŭ Polščy.
«Zahadzia adpravili jamu banderol ź vinšavańniem i cukierkami. Raźličvali, što jašče na Rastvo atrymaje, ale ŭžo i Novy hod, a banderol tak i nie dajšła. Vyśvietliłasia, što hety pakiet navat z pošty nie zabrali. Praź internet svajaki daviedalisia, jakaja pryčyna. Na sajcie pošty pračytali, što jon nibyta admoviŭsia atrymlivać. Ale ž heta niapraŭda», — pierakananaja svajačka Mikałaja Aŭtuchoviča.
Pavodle žančyny, 30 śniežnia Mikałaj koratka telefanavaŭ niekalkim svajakam. Krynica pieradała sens razmovaŭ z palitviaźniem.
«Usich pavinšavaŭ z nadychodziačym Novym hodam. Hołas byŭ badziory, skazaŭ pra siabie, što sa zdaroŭjem u jaho zbolšaha narmalna. Pra banderol skazaŭ, što jamu dazvolena adna na hod, ale dahetul ničoha nie atrymaŭ: «A sam ad banderoli nikoli nie admaŭlajusia».
Z pačatku śniežnia 2020 hodu Mikałaj Aŭtuchovič adbyvaje ŭžo treciaje ŭ svaim žyćci źniavoleńnie. 7 studzienia jamu spoŭnicca 61 hod. Usiaho, pavodle padlikaŭ svajakoŭ, palitviazień adznačyŭ u viaźnicach 9 navahodnich śviataŭ i 8 dzion naradžeńnia. Hetym razam jamu daviadziecca sustrakać dzień naradžeńnia ŭ adzinočcy haradzienskaj turmy.
«U jaho jość mahčymaść krychu hrošaj tracić u turemnaj kramie. Skazaŭ, što kupiŭ tam piečyva i cukierak, tamu zmoža adznačać śviaty z sałodkim. U našaj siamji šmat u kaho dni naradžeńnia prypadajuć na studzień i pačatak lutaha, tamu skazaŭ, što takim čynam adznačyć niekalki zapar śviataŭ», — padzialiłasia surazmoŭca.
Pavodle vyraku Horadzienskaha abłasnoha sudu Mikałaj Aŭtuchovič atrymaŭ 25 hadoŭ źniavoleńnia i hrašovy štraf u 1000 bazavych vieličyń, a taksama pazbaŭleńnie zvańnia praparščyka ŭ adstaŭcy. Pieršyja 5 hadoŭ źniavoleńnia były pradprymalnik i pravaabaronca musić adbyć u turmie, astatnija 20 hadoŭ — u kałonii strohaha režymu. Sud nazvaŭ Aŭtuchoviča vinavatym pavodle 10 artykułaŭ Kryminalnaha kodeksa, u tym liku ŭ stvareńni złačynnaj hrupoŭki i akcie teraryzmu. Svajoj viny Mikałaj Aŭtuchovič nie pryznaŭ, padčas pracesu jon trymaŭ haładoŭku pratestu. Viarchoŭny sud Biełarusi ŭ vyniku razhladu apielacyjnaj skarhi Aŭtuchoviča vyzvaliŭ jaho ad adbyćcia pakarańnia pavodle adnaho z abvinavačańniaŭ, ale ahulny termin źniavoleńnia pakinuŭ bieź źmienaŭ.
Biełaruskija pravaabaroncy pryznali Mikałaja Aŭtuchoviča palitviaźniem.
Čytajcie taksama:
Asudžanaha na 19 hadoŭ palitviaźnia źbirajucca pieravodzić na turemny režym
