Maskva, 24 červienia 2023 h. Fota: Sefa Karacan / Anadolu Agency via Getty Images
Niahledziačy na toje, što Biełstat pakazvaje rost ekanomiki — 3,8% za 11 miesiacaŭ 2023 hoda ŭ paraŭnańni z anałahičnym minułahodnim pieryjadam, usio adno hety vynik nielha ličyć admietnym. Takuju dumku vykazaŭ daradca Śviatłany Cichanoŭskaj pa ekanamičnych pytańniach Aleś Alachnovič.
Jon nahadaŭ, što letaś biełaruskaja ekanomika «prasieła amal na 5%» (-4,7% pavodle infarmacyi Nacyjanalnaha statystyčnaha kamiteta. — «Pozirk»).
«Ciapier ekanomika vyrasła na niapoŭnyja 4%, to-bok my jašče nie adnavili tuju stratu, jakuju mieli ŭ 2022 hodzie, u tym liku praz stratu ŭkrainskaha rynku, ad dadatkovych ekanamičnych sankcyj za ŭdzieł u vajnie.
A prahnoz MVF na nastupnyja piać hadoŭ pakazvaje, što biełaruskaja ekanomika budzie mieć čaćviorty samy drenny pakazčyk ekanamičnaha rostu ŭ śviecie», — adznačyŭ Alachnovič.
Pavodle słoŭ daradcy demakratyčnaha lidara, nielha kazać, što hety hod byŭ karysnym dla ekanomiki: choć jana amal usia pieraaryjentavałasia na rasijski rynak, u tym liku vajenna-pramysłovy kompleks, heta nie dazvoliła i nie dazvolić joj u budučym chutka raści.
«Biełaruskaja ekanomika z 2012 hoda raście pavolniej za svaich susiedziaŭ, pierad usim zachodnich: Polšču, Litvu, Łatviju. Z taho času jana vyrasła ŭsiaho na 5%, u toj čas jak susiedzi — prykładna na 40-45%.
Hety hod ja aceńvaju davoli skieptyčna: my stračvajem svoj suvierenitet, idzie pieraaryjentacyja na rasijskuju ekanomiku, ale ekanamičnych vynikaŭ niama. I pry hetym režymie situacyja nie palepšycca», — zajaviŭ ekśpiert.
Alachnovič źviarnuŭ uvahu na toje, što «prapahanda vychvalajecca vychadam Biełarusi na novyja rynki, paviedamlaje ab sustrečach Łukašenki ź lidarami roznych krain». Adnak, ličyć surazmoŭca, novyja ekanamičnyja partniory nie dapamohuć. U śniežni Łukašenka naviedaŭ Ekvataryjalnuju Hvinieju, ale, padkreśliŭ Alachnovič, «hetaja kraina maje samy drenny ekanamičny prahnoz siarod 200 krain na bližejšyja piać hod, a jaje VUP u siem razoŭ mienšy za VUP Biełarusi».
«Łukašenka maje znosiny ź Vieniesuełaj, niekatorymi afrykanskimi i azijackimi krainami. Pa sutnaści, heta krainy-izhoi. U tym liku Rasija. Łukašenka ŭ vyniku abranaj im palityki represij, stvareńnia mihracyjnaha kryzisu, pasadkaj samalota Ryanair, saŭdziełu ŭ vajnie Rasii va Ukrainie zavioŭ siabie ŭ tupik. U hetym tupiku jon moža supracoŭničać vyklučna z takimi krainami, jak RF, Paŭnočnaja Kareja, Ekvataryjalnaja Hvinieja. A hetyja krainy nie raźvivajucca», — adznačyŭ ekśpiert.
Adnym z prykładaŭ taho, jak ekanomiki susiedziaŭ mohuć upłyvać na krainu, Alachnovič ličyć Polšču, jakaja «handluje ź ES, pryviazanaja da jaho vielmi mocna, i heta aznačaje, što ŭ krainy jość pryviazka da pieradavych ekanomik śvietu, bolš technałahičnych, bolš raźvitych, bolš zamožnych i demakratyčnych».
«Heta daje stymuły dla rostu. Biełaruś ža ciapier pryviazana da rasijskaj ekanomiki: 65% ekspartu tavaraŭ traplaje niepasredna ŭ RF, jašče prykładna 20-30% — praz rasijskija party, čyhunku i jaje finansavuju sistemu ŭ Kitaj, Indyju, niekatoryja inšyja trecija krainy. Takim čynam, Biełaruś całkam zaležnaja ad krainy, jakaja taksama z 2013 hoda nie pakazvaje ekanamičnaha rostu, stahnuje», — padkreśliŭ ekanamist.
Pavodle jaho słoŭ, Rasija ciapier nie moža nabyvać šmat jakija tavary, pastaŭlać u stanie tolki syravinu. «U vyniku heta budzie adbivacca na ŭzroŭni žyćcia biełarusaŭ, my budziem znachodzicca ŭ stahnacyi, pakul našyja zachodnija susiedzi buduć raźvivacca. Našaja moładź budzie źjazdžać z krainy. Heta ŭsio vielmi drenna dla budučaha Biełarusi», — kanstatavaŭ ekanamist.
Čytajcie taksama:
Kali pakarajuć, to nie mocna, a moža i pašancavać. Na što raźličvaje ministr handlu
Ministr ekanomiki raskazaŭ, jak zamiežnyja kampanii sprabujuć siłaj utrymać u krainie
