«Pachavańnie Lizy adbudziecca ŭ Varšavie. Iduć pieramovy, kab cieła addali rodnym, kab pachavać. Ciapier ź Biełarusi sprabuje pryjechać kreŭnik Lizy», — napisała ŭ svaim fejsbuku Valaryna Kustava, jakaja apiekavałasia apošnija dni nad dziaŭčynaj i trymała kantakt ź jaje chłopcam.
Jana kaža, što mnohija chacieli b raźvitacca ź dziaŭčynaj, ale dzie i kali budzie pachavańnie — infarmacyja budzie paźniej.
«Nakont zboru. Usie srodki sa zboru buduć viernutyja achviaradaŭcam z prapanovaj dapamahčy z pachavańniem albo srodki mohuć pierajści znoŭ na rachunki adpraŭlalnikaŭ», — dadała Valaryna Kustava.
***
25-hadovaja biełaruska Liza pamierła ŭčora ŭ balnicy, nie prychodziačy ŭ prytomnaść.
Žorstki napad na jaje adbyŭsia ŭ noč z suboty na niadzielu — zhvałtavanaja dziaŭčyna była znojdzienaja ranicaj la adnaho sa šmatkvaternych damoŭ na vulicy Žuravia. Z taho času Liza znachodziłasia ŭ balnicy, i daktary vyznačyli, što jaje stan vielmi ciažki. Dziaŭčyna ŭ vyniku ŭdušša pieraniesła hipaksiju hałaŭnoha mozhu i zastavałasia biez prytomnaści.
«Pacyjentka ŭ ciažkim stanie. Jaje žyćciu pahražaje niebiaśpieka, praciahvajucca sproby jaje vyratavać. Žančyna znachodzicca ŭ adździaleńni reanimacyi i aniestezijałohii. Stan zdaroŭja nie dazvalaje jaje apytać u palicyi. Pacyjentka znachodzicca biez prytomnaści», — paviedamiła 29 lutaha pres-sakratarka balnicy Barbara Miatkoŭska.
Čytajcie taksama:
Zhvałtavanaja ŭ Varšavie biełaruska pamierła
MZS nakiravała ŭ Varšavu zapyt nakont zhvałtavanaj u Polščy biełaruski
