Navučańnie ad EHU i BEROC raźličanaje na 3,5 hoda, u pieršy hod stvaralniki prahramy płanujuć nabrać 60 studentaŭ. Abiacajuć vizavuju padtrymku i jeŭrapiejski dypłom, a taksama mahčymaść pracaŭładkavacca ŭ Jeŭrasajuzie paśla vypusku — naprykład, u inavacyjnych i inviestycyjnych kampanijach, u mižnarodnych bankach, aŭdycie i kansałtynhu.
Možna budzie i vybrać karjeru ŭ navucy, a častka studentaŭ, kažuć kiraŭniki prahramy, budzie nacelenaja na zapusk ułasnych biznesaŭ.
Stvaralniki prahramy apisvajuć jaje jak prajekt, dla jakoha charakterna spałučeńnie roznych kampietencyj: u ekanomicy i finansach, sacyjalnych i humanitarnych navukach, matematycy i statystycy, a taksama infarmacyjna-kamunikacyjnych technałohijach. Płanujecca, što praz heta vypuskniki prahramy nie buduć pryviazanyja da vuzkaj śpiecylizacyi i atrymajuć roznyja varyjanty praciahu karjery.
Na pieršym siemiestry navučańnie idzie pa-rusku, ale ŭ prahramie praduhledžana vyvučeńnie anhlijskaj movy i pastupovy pieravod zaniatkaŭ na jaje. Budzie šmat praktyki, u tym liku ŭzajemadziejańnie studentaŭ ź biznesami, a taksama ŭdzieł u daśledčyckich i kamunikatyŭnych prajektach. Jość mahčymaści paŭdzielničać i ŭ prahramach abmienu i kałabaracyi sa studentami ź inšych krain.
Kab pastupić, treba budzie zdać dziaržaŭnyja ekzamieny pa matematycy, anhlijskaj movie i hramadaznaŭstvu. Dadatkova kamisija ŭličyć siaredni bał atestata i vyniki sumoŭja z abituryjentam.
Asnoŭnymi vykładčykami na prahramie buduć supracoŭniki BEROC, ekanamisty Dźmitryj Kruk, Kaciaryna Barnukova, Leŭ Lvoŭski i Anatol Charytončyk, paralelna z hetym studenty buduć pracavać z vykładčykami EHU. Abiacajuć i haściavych vykładčykaŭ ź viadomych zamiežnych univiersitetaŭ, u tym liku biełaruskaha pachodžańnia.
Za adzin siemiestr navučańnia daviadziecca vykłaści 1750 jeŭra — ale kiraŭniki prahramy raskazvajuć, što šukajuć mahčymaści dla źnižak i stypiendyj na navučańnie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
