Ahnieška Ramašeŭska-Huzy
— Zvolnić z pracy čałavieka pavodle zakona nie tak i prosta. Jak kiraŭnictva TVP patłumačyła Vam svajo rašeńnie?
— Jany vielmi mocna namahalisia, kab ja syšła sama. Uvieś učorašni viečar i pałovu dnia siońnia jany sprabavali mianie pierakanać. Ja ŭžo amal paddałasia, bo załatyja hory, jakija jany abiacali mnie ŭ vypadku sychodu, byli vielmi spakušalnyja. Ale paśla ja pračytała tekst damovy i tam było napisana, što ja pahadžajusia z zabaronaj try hady vykazvacca publična pra Polskaje telebačańnie, jak i pra palityku nakont «Biełsata». Ja adkazała im, što dla mianie heta nieprymalna i što ja maju namier vykazvacca ŭžo siońnia.
Jany dumali nad hetym, byŭ pierapynak u sustrečach. Praź niekalki hadzin my iznoŭ sustrelisia i jany skreślili z damovy zabaronu na 3 hady i pakinuli 1 hod. Ja iznoŭ adkazała, što mianie heta nie zadavalniaje. Tady jany dastali dakumient pra zakančeńnie supracoŭnictva biez zhody bakoŭ.
Pryčyna zvalnieńnia była nastupnaja: adsutnaść naležnaha dbańnia pra dabro pracadaŭcy i jahonaje dobraje imia. Druhoje: admova ad daručeńniaŭ pracadaŭcy nakont pryviadzieńnia dziejnaści «Biełsata» pavodle vydatkavanych finansavych srodkaŭ ź dziaržaŭnaha biudžetu. Heta, kali kazać dalikatna, chłuśnia, bo ja siońnia ŭpieršyniu bačyła spadara Daniela Horhaša (farmalnaha kiraŭnika TVP — RS). Ani praź jemejł, ani asabista, ja nie mieła ad jaho nijakich daručeńniaŭ. Nakolki ja razumieju, jon pieradavaŭ mnie daručeńni telepatyčna.
Bo zvyčajna ja atrymlivaju paviedamleńni, što jość taki i taki biudžet, što vy jaho nastolki pierakročyli. U hetym vypadku ničoha padobnaha nie było. My dziejničajem pavodle praviłaŭ, pavodle ŭstupnaha biudžetu, jaki byŭ i letaś — heta 75 młn złotych. Jon abaviazvaje paŭhoda. Ničoha inšaha mnie nichto nie skazaŭ. Zvyčajna takija rečy robiacca praź finansavy adździeł. Hetaha nie było. I ŭ vyniku hetaha adnabakova spynili damovu. To-bok, heta nie dyscyplinarnaje zvalnieńnie, bo tam navat blizka nie było za što.
— A vy majecie namier abskardžvać hetaje rašeńnie?
— Tak. Pavodle zakonu, u mianie jość 21 dzień, kab abskardzić hetaje rašeńnie ŭ sudzie i, viadoma ž, ja heta zrablu. Ale, na žal, heta vielmi doŭhaja pracedura. Ich dakumient vielmi słabieńki. Ja nie mahu admovicca ad prava vykazvacca pra «Biełsat», bo ja jaho stvaryła mienavita dziakujučy tamu, što ja vykazvałasia. I tak jon pracavaŭ usie hetyja hady i daŭ rady. Ja nie mahu im pradać hetaje prava i prykidvacca, što ŭsio dobra. Źmianšeńnie biudžetu vielmi žorstkaje i ja nie razumieju, čamu.
— To-bok farmalna biudžet «Biełsata» zastajecca na ŭzroŭni 75 młn, jak i letaś?
— Pakul tak. Mnie ničoha nieviadoma pra toje, što ŭstupiŭ niejki inšy. Tolki sa ŚMI ja viedała, što MZS źbirajecca nam dać 40 młn i što, mahčyma, čarhovyja 14 młn my možam atrymać ad TVP World. Ja tak i mierkavała, što rasiejskamoŭnaja častka budzie pieraniesienaja ŭ TVP World.
Ale ja i dalej liču, što «Biełsat» — heta multymiedyjnaja płatforma i jaje kaštoŭnaść u ciapierašniaj palityčnaj situacyi ŭ rehijonie ŭ tym, što jana šmatmoŭnaja i multymiedyjnaja: dla biełaruskaj, rasiejskaj, ukrainskaj aŭdytoryj.
Stryžań byŭ biełaruski. Ale prablema ŭ tym, što jaho nie ŭtrymać za 40 młn, bo jość pastajannyja vydatki i jany vyraśli. I kali kamuści daviadziecca prymać kiepskija rašeńni ŭ spravie «Biełsata», to prynamsi dobra, što heta budu nie ja. Chacia ja nie mahu skazać, što radujusia z hetaj nahody.
— To-bok, heta daviadziecca rabić vašamu byłomu namieśniku Alaksieju Dzikavickamu?
— Tak vynikaje z zajavy Polskaha telebačańnia. Nakolki ja zrazumieła, aficyjna ź im pakul nie razmaŭlali, ale cikavalisia ŭstupna, ci pahodzicca jon na hetuju pasadu. Ale niachaj jon sam raskazvaje pra svajo rašeńnie. Dapuskaju, što jon kiravaŭsia łohikaj, što lepš, kab niechta byŭ znutry «Biełsatu», čym čužy. Jon pytaŭsia ŭ mianie, što ja dumaju na hety kont. Ja jamu ščyra adkazała, što mnie ŭsio roŭna, chto budzie zabivać «Biełsat» za hetyja prapanavanyja 40 miljonaŭ. Nie važna, svoj ci čužy.
— A jak vy aceńvajecie toje, što hetuju pasadu zaniaŭ Alaksiej Dzikavicki?
— Najpierš ja chaču skazać, što kiepska aceńvaju svajo zvalnieńnie. Dla hetaha niama nijakaj pryčyny. Ja 17 hod kiravała hetym prajektam ź vialikimi pośpiechami. Ja nie baču pryčyny kamientavać nastupnika. Ja kiepska ŭsprymaju toj fakt, što mianie zvolnili.
— Ci praŭda, što paśla taho, jak vy ahučyli infarmacyju pra svajo zvalnieńnie, častka supracoŭnikaŭ kanała nakiravałasia ŭ ofis kiraŭnika telebačańnia?
— Tak, takoje było, ja bačyła videa. Kali jany daviedalisia, to vyrašyli adrazu iści, heta 9 pavierch. Ale ich spynili. Pryjšoŭ administratyŭny dyrektar: «My spravilisia z deputatami, jakija prychodzili siudy pratestavać, spravimsia i z «Biełsatam».
— Čamu vy ličycie, što mienšy biudžet heta adrazu likvidacyja? Niešta možna skaracić, niedzie aščadzić. Heta ž usio roŭna vialikaja suma.
— Ja kažu pra likvidacyju fihuralna. 16 hod telekanał raźvivajecca. Jašče nie było anivodnaha hoda, kab biudžet «Biełsata» byŭ mienšy, čym papiaredni. I nie było anivodnaha hoda, kab kanał nie rabiŭ bolš, čym hodam raniej. Praca z takoj ustanovaj heta jak jazda na rovary — nielha spyniacca, a jechać nazad vielmi składana. Mienavita tamu ja liču, što heta śmiarotna niebiaśpiečnaja sprava.
Zrazumieła, što navat mienšy biudžet nie značyć, što kanał zakryjuć. Ale čamu «Biełsat» pavinien być zadavoleny mienšymi srodkami? Heta tak nie pracuje. Prabačcie mnie, ale heta biełaruski padychod — chopić i mienš. My zbudavali niešta vialikaje i raźvivali hety prajekt. Tamu padychod, što jon pavinien raźvivacca, pavinien być fundamientam našaj pracy. Ja nieadnarazova pierakročvała biudžet, jaki nam davali, i staviła siabie na miažu zvalnieńnia. Ja heta rabiła napiaredadni «biełaruskaj revalucyi», u 2020 hodzie. Potym pačałasia vajna i vyjaviłasia, što my mieli racyju, što treba było hety prajekt raźvivać. My adkryli rasiejskamoŭny adździeł i kali pačałasia vajna, to stała vidavočna — my zrabili słušna. My raźvivali sacyjalnyja sietki.
Ja adčuła, što ŭ Biełarusi niešta adbudziecca, jašče ŭ 2019 hodzie, kali adbyvałasia pachavańnie Kastusia Kalinoŭskaha. Vy dumajecie, što niechta z palitykaŭ i čynoŭnikaŭ u Polščy tady razumieŭ, što nabližajecca niešta hrandyjoznaje? I blizka nie. A ja chadziła i pierakonvała ich. Ja heta bačyła pa aktyŭnaści ludziej, praź jutub, sacsietki. A ciapier idzie vajna i jany źmianšajuć srodki. Dla MZS, a tym bolš biudžetu, heta kišennyja hrošy, heta ništo. Dyk navošta stavić pad pytańnie hety prajekt?
— U zajavie TVP jość słovy, što biełaruskaha kiraŭnika žadała i biełaruskaja apazicyja. Ci viadoma Vam, što byli niejkija pieramovy z apazicyjaj nakont novaha dyrektara kanała?
— Nakolki mnie viadoma, tak. Nibyta hetym zajmaŭsia pres-sakratar MZS, što nie da kanca adpaviadaje jaho zadačam. Mnie viadoma, što niekatorym ludziam prapanoŭvali ŭznačalić «Biełsat», navat viedaju kamu. Ale ja nie budu kazać publična pra heta. Viedaju, što niekalki čałaviek admovilisia.
— Vy kiravali «Biełsatam» 17 hod. Mahčyma, i sapraŭdy nadyšoŭ čas pieradać styrno inšym? Tak ličyć niamała ludziej.
— Niachaj ličać, i što?
— Pryjdzie inšaja asoba i pryniasie trochi śviežaha pavietra.
— Bajusia, što za takija srodki niemahčyma budzie ŭnieści navat śviežaha pavietra. Moj dośvied navučyŭ mianie, što biez hrošaj nielha budzie ničoha zrabić. Navat «śviežaje pavietra» kaštuje hrošaj. I što značyć, što mnie chopić kiravać? Kali b ja była ŭpeŭnienaja, što «Biełsat» maje harantavanuju budučyniu, to ja b schilałasia da taho, kab syści dobraachvotna. Ja mahła b zadumacca. Ale ja baču, jakaja pierśpiektyva.
Ź inšaha boku, a što, ja była kaliści suprać źmienaŭ? Prabačcie, ale heta akurat ja była hałoŭnym ruchavikom źmienaŭ na našym kanale. Mianie vielmi składana abvinavacić u tym, što ja admaŭlałasia niešta źmianiać. Zrazumieła, što nadychodzić čas dla kožnaha sychodzić. Ale ja nie razumieju, čamu mienavita ciapier?
— Ci moža być pryčynaj toje, što ŭ Polščy ŭrad, jaki vy krytykavali? Nie sakret, što vam bližej da kansiervatyŭnaj partyi «Prava i Spraviadlivaść».
— Pakul u Polščy niama takich praviłaŭ, jakija b dazvalali vykinuć kahości z pracy za toje, što ŭ jaho niasłušnyja pohlady. Mianie składana abvinavacić u tym, što ja zajmałasia prapahandaj. Ja nikoli nie vykazvałasia ŭ pieradačach inšych kanałaŭ TVP. Naadvarot, ja ich krytykavała. Tak, u mianie jość svaje pohlady. Jany jość u kožnaha. Ale nichto mianie nie abvinavacić u tym, što ja parušała žurnalisckija standarty. Ja suprać taho, kab zvalniać ludziej za pohlady.
Aprača taho, ja kiravała «Biełsatam» 17 hod. Za hety čas źmianialisia roznyja ŭrady i niejak ža my žyli. Radasłaŭ Sikorski ŭžo byŭ ministram i ja ź im pracavała. A što, lepš było z čarhovym uradam? Jany ž uvohule chacieli nas začynić. Ja liču, što za svajo žyćcio, usioj svajoj dziejnaściu ja zarabiła sabie prava vykazvacca nakont svajoj krainy. Ale pryznajusia, što apošnim časam ja rabiła heta vielmi aščadna, kab nikoha nie niervavać. Ale, nakolki ja razumieju, ciapier u mianie budzie jašče bolš svabody.
— Darečy, a čym płanujecie ciapier zajmacca?
— Nie maju paniaćcia. Ja žyvu «Biełsatam», dzień i noč. Tut maje siabry, kalehi. Štości budu rabić.
— A vierycie ŭ toje, što možacie viarnucca?
— Usialakaje byvaje. Pieršy raz mianie zvolnili z Polskaha telebačańnia 22 hady tamu. Potym viarnuli. 15 hod tamu, akurat u hetyja ž dni, mianie zvolnili ŭ čarhovy raz. Spadziajusia, što niechta voźmiecca za rozum. «Biełsat» — heta supiervažny prajekt.
Čytajcie taksama:
Kiraŭnikom «Biełsata» staŭ Alaksiej Dzikavicki
Dyrektarku «Biełsata» zvolnili paśla 17 hadoŭ pracy
Dyrektarka «Biełsata» patłumačyła, što aznačaje skaračeńnie finansavańnia telekanała
