Zdymak ilustracyjny
Usiaho apublikavanych daniasieńniaŭ piać, i jany vielmi karotkija, litaralna pa niekalki abzacaŭ. Pra źmiest ich možna zdahadacca ŭžo z samich zahałoŭkaŭ:
- «Pra padrychtoŭku Zachadam zamieny U. Zialenskaha»;
- «Pra pracu ZŠA nad stvareńniem piataj kałony ŭ Rasii»;
- «Pra inicyjavańnie ZŠA kadravych pierastanovak va Ukrainie»;
- «Pra namahańni ZŠA pa zryvie spartyŭnych mierapryjemstvaŭ u RF»;
- «Pra padrychtoŭku «namieśnika» Zachadu va Ukrainie».
Adrasavanyja ŭsie daniasieńni niejkamu tavaryšu Siarhiejevu, a ich aŭtary kožny raz padpisanyja pa-novamu: Marat, Aleks, Nora, Žak i Fieliks. Miescy, adkul nibyta pastupajuć daniasieńni, taksama kožny raz novyja: Chjustan, Ryha, Vašynhton, Atava i Brusiel.
Źmiest usich daniasieńniaŭ — zvyčajnaja dla rasijskich uładnych kołaŭ i prapahandystaŭ kanśpirałohija. Pavodle takoha myśleńnia, usio što ni robicca niehatyŭnaha dla Rasii, śviadoma inśpiravana i arhanizavana Zachadam na čale z ZŠA, a ŭkrainskija palityki — zvyčajnyja maryjanietki, jakich zachodniki staviać na pasady i ź ich ža zdymajuć, aby tolki ŭźnikła takoje žadańnie.
Kali vieryć daniasieńniam, Zialenski zachodnikaŭ užo vielmi dapiok «niaździejśnienymi abiacańniami pieramahčy Rasiju na pole boju», taksama dratujuć «zachodnich haspadaroŭ» «jahonaje biaskoncaje chamstva ŭ znosinach z zamiežnymi partniorami i biaźmiežnyja kumaŭstvo dy karupcyja na Ukrainie».
Hałoŭnaje ž — što Zialenski, maŭlaŭ, «straciŭ zdolnaści manieŭravać u kanflikcie z Rasijaj u intaresach Vašynhtona i chaŭruśnikaŭ». Tamu jaho chočuć zamianić, i ŭžo razhladajucca kandydatury mahčymych pierajemnikaŭ, jakimi bačacca, naprykład, Valeryj Załužny, Kiryła Budanaŭ, Andrej Jarmak, Alaksiej Arastovič i Uładzimir Kličko.
«Na dumku jeŭrapiejcaŭ, kožny ź ich u stanie adyhrać rolu «ŭkrainskaha Piłsudskaha», na dziesiacihodździ stvaryŭšy tryvały «sanitarny kardon» pamiž Rasijaj i Jeŭropaj. Taki scenar praduhledžvaje spynieńnie ahniu pamiž Maskvoj i Kijevam u momant, kali US Ukrainy kančatkova straciać nastupalny patencyjał», — śćviardžajuć «raźviedčyki».
Pakul ža kiraŭnictva ZŠA, maŭlaŭ, upeŭniena ŭzmacniaje «vasalnuju zaležnaść Kijeva ad Vašynhtona», rasstaŭlajučy paŭsiul svaich daradcaŭ «pa anałohii z tym, jak anhłasaksy časoŭ Brytanskaj impieryi nakiroŭvali ŭ svaje kałonii «palityčnych ahientaŭ» dla faktyčnaha kiravańnia i kantrolu za dziejnaściu miascovych uładaŭ».
U budučych płanach amierykancaŭ na ŭsie klučavyja pasady nibyta płanujecca rasstavić ukraincaŭ, jakija vučylisia ŭ ZŠA ci ŭ inšych sajuznych im krainach. U premjer-ministry amierykancy, maŭlaŭ, prabivajuć ambasadarku Ukrainy ŭ Vašynhtonie i vypusknicu Indyjanskaha ŭniviersiteta Aksanu Markaravu, u ministry finansaŭ — vypusknika Harvarda Alaksandra Kavu, a ministra ekanomiki i mianiać nie treba, bo ciapierašni kiraŭnik viedamstva Taras Kačka vučyŭsia ŭ Polskim nacyjanalnym instytucie dziaržaŭnaha kiravańnia.
Tych ža, chto nie adpaviadaje zachodnim kryteryjam, prybiaruć z ułady jak piešak z šachmatnaj doški.
Kali ž Zialenski zaŭparcicca — to «Vašynhton zrobić publičnym «zabojčaje» karupcyjnaje daśje ŭ dačynieńni da pradstaŭnikoŭ jaho atačeńnia». Tamu ŭkrainski prezident i nie zmoža rypacca dy «budzie i dalej vykonvać usie rekamiendacyi svaich amierykanskich haspadaroŭ».
Tym nie mienš, «Zachad praciahvaje ŭmacoŭvać miechanizmy pramoha vonkavaha kiravańnia padkantrolnaj kijeŭskamu režymu terytoryjaj», a dziela taho pad ciskam ZŠA i Vialikabrytanii mierycca zasnavać pasadu «śpiecpasłańnika» pa Ukrainie, jakim mała taho što budzie mieć dostup da Zialenskaha dy viedać usie jahonyja płany, ale taksama «budzie błakavać nie ŭzhodnienyja z Vašynhtonam i Łondanam kroki ŭkrainskaha kiraŭnictva, prapanoŭvajučy zamiest ich «pravilnyja» pastanovy».
Na rolu takoha zachodniaha «namieśnika» va Ukrainie ŭžo nibyta vystraiłasia vialikaja čarha «rusafobska nastrojenych amierykanskich i jeŭrapiejskich palitykaŭ», a najbolšaja zorka siarod ich — ciapierašni hienieralny sakratar NATA Jens Stołtenbierh, jakomu niadoŭha ŭžo zastavacca na svajoj pasadzie.
Adnak ža aŭtar hetaha daniasieńnia nastrojeny aptymistyčna i sumniajecca ŭ tym, što zadumka z «namieśnikam» spracuje. Bo, maŭlaŭ:
«Va ŭmovach usio bolš ciažkaha stanovišča na froncie, składanaściaŭ z praviadzieńniem mabilizacyi i zatrymak z atrymańniem zachodniaj vajskovaj dapamohi mnohija ŭkraincy pačali ŭśviedamlać niepaźbiežnaść dasiahnieńnia Maskvoj metaŭ SVA». A tamu i mnohija pradstaŭniki kijeŭskaj elity mohuć nie słuchacca «namieśnika», a «pasprabavać «zhulać na apiaredžańnie», zahadzia pierajšoŭšy na bok budučych pieramožcaŭ».
Adnačasova ź dziejańniami va Ukrainie złamysny Vašynhton nie zabyvajecca i niepasredna pra Rasiju. Tak, pierad prezidenckimi vybarami jon nibyta mieŭ namier «aktyvizavać pracu z rasijanami — vypusknikami amierykanskich prahram abmienu», jakich, maŭlaŭ, naličvajecca bolš za 80 tys. čałaviek. Hetyja ludzi, na dumku amierykancaŭ, musili «stać stryžniavym elemientam piataj kałony».
Dziela taho ź imi, maŭlaŭ, adnaŭlajucca kantakty, naładžvajucca daviernyja znosiny, a paśla hetych ludziej miarkujecca «aktyŭna ŭciahnuć u palityčnuju baraćbu z rasiejskaj uładaj». Užo padrychtavanaja adpaviednaja prahrama, viaducca treninhi, pry hetym asablivaja ŭvaha nadajecca «pytańniam adpracoŭki biaśpiečnaj suviazi z amierykanskimi kuratarami».
Ale nasamreč usio nie tak prosta, i jakija b padkopy amierykancy ni stroili, Rasija zastajecca «mocnym areškam». Tak, zapuščanaja, viadoma, usio tymi ž Štatami kampanija pa izalacyi Rasii ŭ sporcie daje zboi, bo mižnarodnyja spartyŭnyja fiederacyi časta naraviacca dy nie vykonvajuć instrukcyi, a šmat krain «hłabalnaha Poŭdnia» tolki nibyta i marać, kab paŭdzielničać u arhanizavanych Rasijaj roznych alternatyŭnych spabornictvach.
Karaciej, «u suśvietnym sporcie, jak adznačajuć u Vašynhtonie, pa sutnaści, paznačylisia tyja ž pracesy stanaŭleńnia šmatpalarnaści, jakija nazirajucca na mižnarodnaj arenie». A pakolki amierykancam heta, kaniešnie, nie daspadoby, to jany ŭsimi siłami namahajucca hetyja spabornictva sarvać. A hałoŭny tut instrumient — padkantrolnaje Štatam Suśvietnaje antydopinhavaje ahienctva (VADA) na čale z palakam Bańkam.
I niejkija pośpiechi ŭ amierykancaŭ dy ŭ Bańki, jak z prykraściu kanstatujecca, jość, adnak nie ŭsio tak strašna. Bo «adkryta praamierykanskaja pazicyja palaka vyklikaje ŭsio bolšaje razdražnieńnie ŭ prafiesijnych kołach», a tamu tyja dziaržavy, jakija «stamilisia ad palityzacyi suśvietnaha sportu», maŭlaŭ, «imknucca ŭmacoŭvać spartyŭny suvierenitet, u tym liku ŭ śfiery farmulavańnia nacyjanalnych antydopinhavych zakanadaŭstvaŭ».
Čytajcie taksama:
«Jeŭropa vyhnała špijonaŭ Uładzimira Pucina. Ciapier jany viartajucca» — The Financial Times
Jak rasijskaja raźviedka zmahła pierachapić razmovu niamieckich aficeraŭ?
Na ruinach «pryhožynskaj impieryi trolaŭ» u Rasii stvaryli «suśviet trolaŭ». Jak jon dziejničaje?
