Kadr ź filma «Dziuna 2»
Takoje raźvićcio padziej stała mahčymym praz toje, što bujnyja sietki rasijskich kinateatraŭ prybrali z raskładu tak zvanaje «pieradsieansnaje absłuhoŭvańnie» — heta kali bilety farmalna pradavalisia na karotkamietražnyja filmy, a razam ź imi pakazvalisia filmy halivudskich kinakampanij, jakija pajšli z Rasii paśla pačatku vajny, piša «Śviaŝiennyj Biełavud».
Tak pa danych «Jandeks Afišy», druhaja častka filma «Dziuna», jakaja miesiac tamu demanstravałasia ŭ dziasiatkach kinateatraŭ Maskvy i Pieciarburha, na 18 krasavika zajaŭlena tolki ŭ adnym niasietkavym kinateatry. Na sajtach kinasietak «Siniema Star» i «Kinamaks», jakija raniej aktyŭna pakazvali hety film, pieradsieansnaha absłuhoŭvańnia taksama niama.
U pačatku krasavika Asacyjacyja ŭładalnikaŭ kinateatraŭ vystupiła z zaklikam da kinateatraŭ padtrymać rasijskija filmy i poŭnaściu admovicca ad pieradsieansnaha absłuhoŭvańnia ŭ pieryjad z 18 krasavika pa 12 maja.
U svaju čarhu šerah dystrybutaraŭ, u tym liku kampanija «Atmaśfiera kino», nakiravali sietkam kinateatraŭ listy, u jakich taksama «prapanoŭvali» nie pakazvać u hetyja daty halivudskija filmy pa schiemie pieradsieansnaha absłuhoŭvańnia.
U vypadku admovy dystrybutary pryhrazili nie padaŭžać dla takich kinateatraŭ mahčymaść pakazu stužak, jakija lehalna raspaŭsiudžvajucca imi.
Padobnuju rassyłku, pa danych sietkavaha vydańnia CinemaPlex, na jakoje spasyłajecca RBK, rabiŭ i «Centrał Partnieršyp», jaki naležyć chołdynhu «Hazprom-Miedyja». Padobnyja patrabavańni vysunuŭ i «Kara Prakat».
Dystrybutary spasyłalisia na toje, što ŭ hety pieryjad u ich u prakat vychodziać filmy rasijskaj vytvorčaści.
Kiraŭnik ahienctva TelecomDaily Dzianis Kuskaŭ zajaviŭ RBK, što «padobny ŭltymatum — pakinuć sietki bieź lehalnaha kantentu — hučyć surjozna».
«Całkam vierahodna, — ličyć jon, — što pa zakančeńni zajaŭlenaha termina — z 18 krasavika pa 12 traŭnia — hetaja praktyka budzie nasić pastajanny charaktar, a abjom «cieniavoha» prakatu skarocicca da minimumu».
Tym časam na biełaruskich kinateatrach rasijskaja praktyka nijak nie adabjecca, bo ŭ Biełarusi zaćvierdžany zakon ab vykarystańni kantentu z «niesiabroŭskich krain».
Tamu toje, što nie pakažuć u Rasii, vidavočna pakažuć u Biełarusi.
Čytajcie taksama:
Tarancina pieradumaŭ zdymać «Kinakrytyka». Film mieŭsia stać apošnim u karjery režysiora
«Rypli»: tonki i hustoŭny detektyŭ u styli nuar, ale nie dla ŭsich
