Jerłan Turhumbajeŭ. Fota Turar Kazanhapaŭ / Tengrinews.kz
U Kazachstanie zatrymali eks-ministra ŭnutranych spraŭ Jerłana Turhumbajeŭ. Heta źviazana sa spravaj ab padziejach studzienia 2022 hoda, kali masavyja pratesty i sutyknieńni z palicyjaj u Ałmaty i inšych haradach pryviali da hibieli pa mienšaj miery 238 čałaviek, piša Bi-bi-si.
U paviedamleńni prakuratury skazana, što Turhumbajeva padazrajuć u pieravyšeńni ŭłady, jakoje pryviało da ciažkich nastupstvaŭ.
«Uličvajučy, što ŭ kryminalnaj spravie majucca źviestki, jakija składajuć dziaržaŭnyja sakrety, inšyja danyja dasudovaha rasśledavańnia nie padlahajuć razhałašeńniu», — piša prakuratura.
Paśla studzieńskich padziej Turhumbajeŭ byŭ zvolnieny z pasady kiraŭnika MUS Kazachstana.
2 studzienia 2022 hoda ŭ horadzie naftavikoŭ Žanaazienie, na zachadzie Kazachstana, pačalisia mirnyja mitynhi suprać pavyšeńnia cen na haz. Kazachstancy byli aburanyja tym, što paliva, jakoje zdabyvajecca na ich ziamli, padaražeła ŭ dva razy.
U apošnija dni mitynhi raspaŭsiudzilisia na inšyja rehijony krainy. Pašyryŭsia i paradak dnia — da ekanamičnych i sacyjalnych prablem u krainie ŭ cełym, pratestaŭ suprać byłoha prezidenta Nursułtana Nazarbajeva.
U pieršyja dni pratestaŭ kazachskija siłaviki pry razhonie mitynhoŭcaŭ vykarystoŭvali ślozaciečny haz, śvietłašumavyja hranaty i humovyja kuli. Adnak 5 studzienia na ałmacinskaj płoščy Respubliki i prylehłaj da jaje rezidencyi prezidenta pačałasia stralba.
Usiaho, pa aficyjnych źviestkach, u chadzie masavych biesparadkaŭ u Kazachstanie zahinuli 238 čałaviek, ale pravaabaroncy śćviardžajuć, što achviar bolš. Ułady nie pryznajuć, što siłaviki stralali ŭ mirnych žycharoŭ.
Pa viersii Hienprakuratury, 92 čałavieki zahinuli pry ŭzbrojenych atakach na dziaržustanovy, rezidencyju prezidenta, kramy i inšyja budynki ŭ Ałmaty i inšych haradach Kazachstana.
Čytajcie taksama:
Kazachstan piaty hod zapar nie budzie pravodzić parad Pieramohi
U Rasii vyjšaŭ film ź niedvuchsensoŭnymi pahrozami Kazachstanu
