Premjer‑ministr Biełarusi Siarhiej Sidorski siońnia na pasiadžeńni arhkamiteta pa padrychtoŭcy da čempijanatu śvietu pa chakieju 2014 hoda, jaki projdzie ŭ Minsku, vykazaŭ niezadavolenaść tym, jak idzie padrychtoŭka da suśvietnaha forumu.
Premjer‑ministr vykazaŭ pretenzii da Ministerstva sportu i turyzmu, jakoje, na jaho pohlad, nie zabiaśpiečvaje naležnuju infarmacyjnuju padtrymku majučaha adbycca turniru. «Na vašym sajcie viadziecca advarotny adlik dzion da Hulniaŭ u Vankuviery‑2010. Heta ŭsio dobra, ale nichto nie viedaje, kolki zastałosia času da čempijanatu śvietu pa chakieju ŭ Biełarusi. Nichto adlik nie viadzie», — adznačyŭ jon, źviartajučysia da ministra sportu i turyzmu Aleha Kačana.
Siarhiej Sidorski taksama źviarnuŭ uvahu na słabuju aktyŭnaść u pryciahnieńni inviestaraŭ dla budaŭnictva infrastruktury da čempijanatu śvietu.
«Kali vy nie razumiejecie, ab čym ja havaru, to pahladzicie, jakaja pijar‑kampanija razhornuta ŭ Rasii pa papularyzacyi zimovaj Alimpijady‑2014 u Sočy.
My damovilisia, što ŭ śniežni minułaha hoda vyznačymsia ź simvolikaj. Jana patrebna dla taho, kab u śviecie ŭsie adčuvali, što ŭ nas ŭ 2014 hodzie projdzie čempijanat śvietu. Kab inviestary pačali zmahacca za prava ŭdzielničać u padrychtoŭcy da čempijanatu śvietu. Čas idzie, a abjom raboty treba zrabić jašče vielmi vialiki», — padkreśliŭ premjer‑ministr.
Jon zaklikaŭ členaŭ arhkamiteta dakładna prytrymlivacca hrafika pa padrychtoŭcy da čempijanatu śvietu: «Nieabchodna, kab płan dakładna vykonvaŭsia. Ja ź pieršaha dnia pastaviŭ kantrol nad kožnaj kropkaj i koskaj. Nieabchodna razabracca, što sarvana i kim».
Premjer‑ministr taksama vykazaŭ niezadavolenaść tym, što da hetaha času nie zaćvierdžany talisman čempijanatu śvietu.
Aleh Kačan rastłumačyŭ heta słabaj aktyŭnaściu nasielnictva i pradpryjemstvaŭ, dla jakich nacyjanalnaj fiederacyjaj chakieja byŭ abjaŭleny konkurs. Adnak, pakolki dastojnych varyjantaŭ niedastatkova, konkurs byŭ pradoŭžany. Ministr sportu i turyzmu paabiacaŭ, što talisman aficyjna budzie zaćvierdžany da 1 lipienia hetaha hoda.
Siarhiej Sidorski rastłumačyŭ važnaść apieratyŭnaha zaćviardžeńnia talismana tym, kab inviestary mahli vykupić prava vykarystoŭvać simvoliku na svajoj pradukcyi. A atrymanyja hrošy možna było b puścić na budaŭnictva infrastruktury.
Premjer‑ministr taksama vykazaŭ ździŭleńnie nakont taho, što da hetaha času nie zapuščana łatareja,
pryśviečanaja čempijanatu śvietu‑2014, dachody ad jakoj pavinny stać dadatkovaj krynicaj finansavańnia padrychtoŭki da čempijanatu śvietu.
Aleh Kačan raskazaŭ, što z 1 sakavika źjavicca videarolik, pryśviečany chakiejnamu čempijanatu śvietu ŭ Minsku.
U jakaści hałoŭnaha biletnaha apieratara pieršynstva płaniety razhladajecca kampanija Ticket‑Pro, jakaja zajmałasia raspaŭsiudžvańniem biletaŭ na Matč zorak KCHŁ, jaki prajšoŭ na «Minsk‑Arenie».
