Siońnia ŭ partuhalskim Kruš Kiebrada zavieršycca papiaredni etap tenisnaha Kubka fiederacyi (Jeŭra‑Afrykanskaja zona, hrupa 1). U zaklučnym matčy hrupy D biełaruskija tenisistki sustrenucca z kamandaj Vialikabrytanii.
Praŭda, dla abiedźviuch družyn vynik hetaje sustrečy turnirnaha značeńnia nie maje — jany ŭžo zhubili šancy praciahnuć baraćbu za vychad u 2‑iu Suśvietnuju hrupu hetaha turniru.
Našy dziaŭčaty ŭ pieršym matčy sastupili kamandzie Aŭstryi ź likam 1:2, a ŭčora vyjhrali ŭ tenisistak Bośnii i Hiercahaviny z suchim likam 3:0. U pieramožnaj sustrečy kapitan našaj družyny Uładzimir Vaŭčkoŭ nie moh raźličvać na lidera Viktoryju Azaranku (6‑y numar suśvietnaha rejtynhu) — jana zachvareła.
Tym nie mienš jaje kalažanki pa kamandzie vyjhrali ŭsie svaje matčy — Taćciana Pučak (298) pieramahła Emu Burhič (653) u dvuch setach z adnolkavym likam 6:1, a Volha Havarcova (55) vyjhrała ŭ Sandry Marcinovič (387) — 6:2, 6:3. Naša para ŭ składzie Kaciaryny Dziehalevič i Taćciany Pučak taksama vyjhrała ŭ dvuch setach u dueta Anita Husaryč — Sandra Marcinovič — 6:4, 6:0.
Adnak hety pośpiech nie dapamoh biełaruskam, bo pieršaje miesca ŭ hrupie D zabiaśpiečyli sabie aŭstryjskija sportvumen,
jakija atrymali druhuju pieramohu zapar nad brytankami ź likam 3:0, a heta zrabiła ich niedasiahalnymi dla supiernic.
U siońniašnim matčy našym spartoŭkam u składzie kamandy Vialikabrytanii buduć supraćstajać Alena Bałtača (83, jana, miž inšym, dačka znakamitaha hulca kijeŭskaha «Dynama» 1980-ch Siarhieja Bałtačy), Kiejt O'Brajn (84), Ańnie Kieotavonh (127) i Sara Borueł (919). Akramia parazy ad aŭstryjek brytanki ŭ pieršym matčy razhramili baśnijek ź likam 3:0.
