11—13 lutaha Minsk naviedaje novy staršynia fondu Konrada Adenaŭera, były kiraŭnik Jeŭraparłamienta Chans‑Hiert Pioterynh.
Jak paviedamlaje pres‑słužba fondu, heta pieršaja zamiežnaja pajezdka Pioterynha, meta jakoj — dać «vyrazny i jasny sihnał padtrymki demakratyčnaj apazicyi krainy».
Napiaredadni adjezdu Pioterynh zajaviŭ, što «jeŭrapiejcy nie mohuć dazvolić sabie pakinuć sproby i nie padtrymać demakrataŭ apošniaj dyktatury Jeŭropy, jakich stanovicca ŭsio bolš».
Kab aznajomicca z palityčnaj i hramadskaj situacyjaj u Biełarusi,
Pioterynh płanuje sustrecca z kiraŭnictvam pravasłaŭnaj i katalickaj cerkvaŭ, pradstaŭnikami treciaha siektara i pravaabaroncami.
«Na fonie aściarožnaha adkryćcia Biełarusi nasustrač Jeŭrasajuzu kiraŭnik fondu Adenaŭera bačyć realnuju mahčymaść spryjać demakratyzacyi krainy praz pastajanny abmien mierkavańniami i kankretnyja ahulnyja zachady, a taksama pry padtrymcy tych sił u administracyi, jakija zacikaŭleny ŭ reformach», — havorycca ŭ paviedamleńni dla presy.
U pajezdcy ŭ Biełaruś Pioterynha budzie supravadžać polski deputat, kiraŭnik delehacyi Jeŭraparłamienta Jacek Pratasievič.
Varta adznačyć, što niamieckija palityčnyja fondy aryjentujucca ŭ svajoj dziejnaści na palityčnuju liniju pradstaŭlenych u bundestahu partyj. Fond imia Konrada Adenaŭera blizki da Chryścijanska‑demakratyčnaha sajuza. Pry hetym fond faktyčna źjaŭlajecca niezaležnaj hramadskaj arhanizacyjaj i finansujecca ź biudžetu FRH.
Biuro fondu pa Biełarusi znachodzicca ŭ Vilni, jaho ŭznačalvaje Štefan Maleryus.