Abjadnańni palakaŭ na Biełarusi «pavinny damovicca sami, a nie šukać dzieści padtrymki». Pra heta zajaviŭ kiraŭnik MZS Biełarusi Siarhiej Martynaŭ u intervju polskaj haziety Rzeczpospolita ad 10 lutaha.
Pavodle słoŭ Martynava, arhanizacyi pavinny samastojna «vyrašyć svaje prablemy, u tym liku prablemy ź ludźmi, jakich nie zadavoliŭ vynik vybaru kiraŭnictva». Jon zajaviŭ, što biełaruski ŭrad i ministerstva zamiežnych spraŭ «nie zajmajucca takimi pytańniami».
«Umiašańnie biełaruskaj dziaržavy, a tym bolš polskaj, ni da čaho dobraha nie pryviadzie», — miarkuje ministr.
Pry hetym Martynaŭ padkreśliŭ, što Biełaruś i Polšča — «važnyja partniory». Tak, da suśvietnaha ekanamičnaha kryzisu handlovy abarot dasiahnuŭ 3 młrd. dołaraŭ. Jon adznačyŭ, što Mytny sajuz Biełarusi, Rasii i Kazachstana adkryvaje polskim biźniesmienam «vialiki rynak».
Ministr vykazaŭ nadzieju, što padčas vizitu ŭ Varšavu, jaki płanujecca na 12 lutaha, budzie padpisana biełaruska‑polskaje pahadnieńnie ab małym pahraničnym ruchu. Pavodle jaho słoŭ, Biełaruś hatovaja da źnižeńnia koštu viz pa pryncypu ŭzajemnaści.
***
Adnosiny pamiž Minskam i Varšavaj abvastrylisia paśla kanfliktu ŭ Iviancy (Vałožynski rajon, Minskaja vobłaść).
Miascovy Dom polski nie mohuć padzialić dva kryły Sajuza palakaŭ na Biełarusi (SPB) — aficyjnaje i niezarehistravanaje. Kožny z bakoŭ śćviardžaje, što maje prava na ŭłasnaść.
8 lutaha sudovyja vykanaŭcy zrabili vopis majomaści Doma polskaha i vypravadzili z budynka aktyvistaŭ nieaficyjnaha SPB. Kiraŭnictva arhanizacyi rascaniła heta jak «zachop» i źviarnułasia pa padtrymku da polskich uład.
Situacyja ŭ Iviancy stała pryčynaj dypłamatyčnaha skandału. Pasoł Biełarusi ŭ Polščy Viktar Hajsionak byŭ vyklikany ŭ polskaje MZS, dzie jamu vykazali zaniepakojenaść dziejańniami biełaruskich pravaachoŭnych orhanaŭ u dačynieńni da Doma polskaha. U svaju čarhu, pasoł Polščy ŭ Biełarusi Chienryk Litvin byŭ na dva dni adklikany dla kansultacyj u Varšavu.
Prezident Polščy Lech Kačyński zaprasiŭ lidera nieaficyjnaha SPB Anžaliku Borys na sustreču. Čakajecca, što jana adbudziecca na nastupnym tydni.
Treba taksama adznačyć, što polskaja apazicyjnaja partyja «Prava i spraviadlivaść», jakuju ŭznačalvaje Jarasłaŭ Kačyński, brat prezidenta Polščy Lecha Kačyńskaha, zapatrabavała admianić vizit Martynava, a taksama zaklikała premjer‑ministra Donalda Tuska źviarnucca ŭ ES z prapanovaj nakłaści na Biełaruś handlovaje embarha.
