Značnaja častka dziaciej, jakija pačynajuć navučańnie ŭ škole ŭ šeść hadoŭ, nie hatovy da jaje z pryčyny niedastatkovaha psichałahičnaha raźvićcia.
Pra heta paviedamiŭ hałoŭny doktar Haradskoha kliničnaha dziciačaha psichanieŭrałahičnaha dyspansiera, hałoŭny pazaštatny dziciačy psichijatr Minska i Biełarusi Vadzim Kiryluk 12 lutaha padčas sustrečy z žurnalistami pierad pačatkam respublikanskaj navukova‑praktyčnaj kanfierencyi «Aktualnyja pytańni dyjahnostyki, lačeńnia i reabilitacyi zachvorvańniaŭ niervovaj sistemy ŭ dziaciej».
Śpiecyjalist skazaŭ, što hetaj viasnoj u Minsku ŭ treci raz projdzie ahulnaharadskaja akcyja «Ci hatova vaša dzicia da škoły?» i zaklikaŭ udzielničać u joj dziaciej, jakija pojduć u škołu hetym hodam. Baćki zmohuć atrymać kansultacyi psichołahaŭ i psichaterapieŭtaŭ Haradskoha kliničnaha dziciačaha psichanieŭrałahičnaha dyspansiera i dziciačych paliklinik horada nakont hatoŭnaści ich dziaciej da škoły.
U 2009 hodzie padčas akcyi da śpiecyjalistaŭ źviarnułasia bolš za paŭtary tysiačy čałaviek.
Pry hetym pa psichałahičnych pakazčykach akazalisia nie hatovymi iści ŭ škołu 52% dziaciej, u 2008 hodzie — 56%.
Kiryluk padkreśliŭ, što psichałahičnaja hatoŭnaść da škoły nie źviazana z umieńniem dziciaci čytać i ličyć, a vyznačajecca ŭzroŭniem psichičnaha raźvićcia dla zasvajeńnia školnaj prahramy i zdolnaściu vučycca ŭ kalektyvie adnahodkaŭ.
Hałoŭny ŭrač vykazaŭ mierkavańnie, što praźmiernyja razumovyja i fizičnyja nahruzki ŭ daškolnym i školnym uzroście niehatyŭna ŭpłyvajuć na zdaroŭje dziciaci. Nie varta pierahružać dzicia, addajučy jaho «ledź ci nie z troch hadoŭ u niekalki hurtkoŭ, u tym liku anhlijskaj movy». Dzicia nie treba pryśpiešvać z raźvićciom, a nieabchodna padychodzić da pracesu razumna, adznačyŭ śpiecyjalist.
