U 2010 hodzie ŭ śviecie i ŭ Biełarusi scenar kinazdymkaŭ budzie raniejšy: u raspracoŭku trapiać padnoŭlenyja viersii starych, pravieranych časam błokbasteraŭ, a taksama siužety pavodle kłasičnych tvoraŭ. «Vostraŭ skarbaŭ», «Frankienštejn» i «Kałasy pad siarpom tvaim». Naviny kiniematohrafa.
1. Dzie rymiejk, Bili?
 |
Nie tolki Frankienštejn zamyśliŭ viartańnie ŭ sučasnym farmacie. Pavodle kiniematahrafičnaha časopisa Empire, «Vostraŭ skarbaŭ» — kłasičnaja kniha Robierta Ljuisa Styviensana — moža adviedać kinateatry ŭ adnoŭlenaj viersii.
Z 1920 h., kali vyjšła pieršaja niamaja kiniematahrafičnaja viersija knihi, niamała režysioraŭ i multyplikataraŭ sprabavali svajo ščaście i pieraapracoŭvali paśpiachovy raman u kinastužki i telesieryjały. Natchnionyja šalonym pośpiecham inšaj pirackaj historyjaj apošnich hadoŭ, «Piratami Karybskaha mora» ŭ brytanskaj studyi Ecosse Films rychtujuć i abiacajuć kryvažernym marskim rabaŭnikam kambek, aphrejd-dostup da sučasnaj moładzi.
Adnanohaha Silviera syhraje Šerłak Chołms-2010, jon ža Robiert Daŭni-małodšy.
2. Frankienštejn-2010
 "Frankienštajn'94" |
U 2004 hodzie aŭtar litaraturnych trymcieńnikaŭ Dyna Kunc ažyviŭ trochi pamiarćvieły vobraz pačvary Frankienštejna. Kab pačvara trochi aklimatyzavałasia ŭ našym śviecie paśla dsiesiacihodździaŭ zabyćcia, jon adpraviŭ piakielnuju istotu ŭ Novy Arlean našych dzion.
Ciapier, vyhladaje na toje, što knižnaja sieryja z troch knih zdoleła praciarebić šlach da viartańnia Frankienštejna ŭ kino: časopis Variety paviedamlaje, što pradusary Ralf Vinter i Tery Butvik rychtujuć kiniematahrafičnuju apracoŭku dla pieršaj knihi.
Samaje paciešnaje, što sami knihi naradzilisia z televizijnaha sieryjała, jaki tak i nie vyjšaŭ na ekrany. Kunc i jaho suaŭtar Kievin Džej Andersan napisali apaviadańnie jak padmurak dla sieryjała, jaki zdymaŭ Markus Niśpiel. Ale aŭtaram nie spadabaŭsia piłotny prajekt, i Niśpiel vyrašyŭ za lepšaje nie źviazvacca z kinošnikami.
3. Znoŭ bunt!
 |
Histaryčny bunt u amierykanskaj viaźnicy «Atyka» ŭ vieraśni 1971 h. užo zaśviaciŭsia na ekranach. U 80-ja byli źniatyja telesieryjały pra hvałtoŭny pratest viaźniaŭ, a klič adtul: «Atyka, Atyka!» ŭ ZŠA ŭvajšoŭ u falkłor. Sioleta bunt maje pieratvarycca ŭ paŭnavartasny film. Duh Łajman, jaki paznajomiŭ nas z «Sp-rom. i sp-niaj Śmit», a Andžalinu Džoli - z Bredam Pitam, ciapier spradjusuje i zrežysuje stužku, jakaja budzie nazyvacca pa-prostu «Atyka». Scenar da jaje napisaŭ Džefry Fletčer, jaki ciapier chodzić u naminantach na «Oskar» za scenar da fantastyčnaha filma Li Deniełsa Precious/«Piataje vymiareńnie» (2009).
Łajman maje naŭprostavaje dačynieńnie da samoj historyi buntu ŭ turmie: jaho baćka byŭ u kamisii, jakaja rasśledvała pryčyny buntu, a taksama źjaŭlaŭsia adnym z padpisantaŭ kančatkovaj spravazdačy, u jakoj vina za dziesiatki śmierciaŭ častkova ŭskładałasia na hubiernatara štata Ńju-Jork i turemnyja słužby.
Pakul niajasna, kali vyjdzie film, i pakul što možna zadavolicca inšaj stužkaj Łajmana, jakaja vyjdzie da leta, bajevikom «Spraviadlivaja hulnia» z Šonam Penam u hałoŭnaj roli.
4. Ciažkija mientalnyja kanstrukcii
 |
Krychu kurjoznaha. Paśla «Manapolii», Lego i «Transformieraŭ» adnoj dziciačaj zabavie było niejak nie vielmi bavicca biez svajho kiniematahrafičnaha ŭvasableńnia. Hutarka idzie pra kanstruktar z žaleznych dzirkavatych płaścinak, pry dapamozie jakoha dzieci ŭsiaho śvietu robiać svaje pieršyja kroki ŭ inžynieryi i budaŭnictvie. Amierykanskaja pradjusarskaja kampanija Helix Films maje namier źniać siamiejny film pavodle kanstruktara, što viadomy ŭ Jeŭropie pa najmieńni Meccano, dy jaki byŭ vynajdzieny ŭ pačatku minułaha stahodździa. Jaki siužet, spytajecie vy? Zbytnaje pytańnie, hałoŭnaje, budučyja stvaralniki filma pakul adkryli, što heta budzie 3D dy film budzie napoŭnicu vykarystoŭvać handlovy patencyjał brendu.
5. Kałasy pad siarpom tvaim. The Movie.
 scena sa śpiektakla "Kałasy pad siarpom tvaim" |
Pieranieści histaryčna-pryhodnicki raman «Kałasy pad siarpom tvaim», jaki ŭpieršyniu byŭ apublikavany ŭ 1965 hodzie i staŭsia adnym z narožnych kamianioŭ spravy nacyjanalnaha vychavańnia moładzi, u bolš vidoviščny farmat sprabavaŭ šmat chto. Śpiarša ŭ kancy 80-ch na Biełaruskim radyjo była zroblena šmathałosavaja radyjopastanoŭka ramana. Kiraŭnikom hałasavoj trupy tady vystupiŭ teatralny režysior Valeryj Anisienka. U 2007-m užo biez muzyki i adnym hołasam, ale nie mienš palifanična i dramatyčna, «Kałasy» ahučyŭ znany moŭny piedahoh, viadomy čytalnik biełaruskaj kłasiki, prafiesar Andrej Kalada. Vyjšła CD-kružełka z poŭnym tekstam ramana, jaki hučyć ciaham 40 hadzinaŭ. Usio roŭna jak aŭtar ramanu, Uładzimir Karatkievič, jaki pisaŭ raman bolš za 12 hadoŭ, teatralny režysior Anisienka doŭhija hady vynošvaŭ i abdumvaŭ ideju pastavić raman na scenie. I tolki ŭ 2008 na padmostkach Teatra biełaruskaj dramaturhii jon spraŭdziŭ svaju maru, urešcie zrabiŭšy teatralnuju pastanoŭku pavodle ramana.
Śpiektakl «Kałasy pad siarpom tvaim» — pastanoŭka nie tolki hłybokaja, ale i vidoviščnaja. Jana najbolš nabližanaja da kinastužki: vialikaja, kinošnaja masoŭka (na scenie pobač z daśviedčanymi aktorami vystupajuć i pieršakurśniki Biełaruskaha dziaržaŭnaha univiersiteta kultury i mastactva), bahatyja śvietłavyja efiekty i paralelny videašerah, što daje mahčymaść hledaču bolš abjomna usprymać toje, što adbyvajecca na scenie.
I voś 2010 hod — aŭtar ščymlivaha pračytańnia «Tutejšych» i «Sialanki»
Mikałaj Pinihin budzie zdymać «Kałasy pad siarpom tvaim» na «Biełaruśfilmie».Farmalna kinastužka prymierkavanaja da 80-hodździa z dnia naradžeńnia Karatkieviča. Nad scenarom filma pracuje Alaksandr Kačan.
