Repier Siaroha i čempijony śvietu pa taj‑boksie dałučajucca da mužčynskaj inicyjatyvy suprać damašniaha hvałtu ŭ siamji. Pra heta śpiavak zajaviŭ 2 sakavika na pres‑kanfierencyi ŭ Minsku.
«Nielha nie pryznać, što my majem fakty hvałtu nad žančynami, jakija paŭtarajucca i ŭzmacniajucca, nie tolki ŭ siamji, ale i na vulicy, — adznačyŭ Siaroha. — Kali možna štości zrabić dla vykaranieńnia i praduchileńnia nasilla i dla hetaha patrabujecca ŭsiaho tolki ŭdzieł, čamu b nie.
Ja chłopiec prosty i tym nie mienš hladžu ŭ korań».
Pavodle słoŭ vykanaŭcy, jon hatovy zrabić svoj uniosak u inicyjatyvu suprać damašniaha hvałtu:
źniać sacyjalnyja roliki sa słohanam «Chočaš kahości ŭdaryć, udar mianie».
U svaju čarhu kaardynatar prahram Fondu AAN u halinie narodanasielnictva (JUNFPA) Taćciana Hapličnik padkreśliła, što ab prablemie damašniaha nasilla treba havaryć dla taho, kab žyćcio žančyn u našaj krainie stała bolš dastojnym. «Kab kvietki, jakija nam dorać mužčyny ŭ śviaty, byli znakam kachańnia, a nie zahładžvańnia viny za hrubijanstva i žorstkaść», — ličyć jana.
Starejšy inśpiektar upraŭleńnia prafiłaktyki hałoŭnaha ŭpraŭleńnia achovy pravaparadku i prafiłaktyki milicyi hramadskaj biaśpieki MUS Volha Sakałoŭskaja sa škadavańniem adznačyła, što sami žančyny pra chatni hvałt jašče nie navučylisia havaryć adkryta. Pavodle jaje słoŭ, časta supracoŭnikam milicyi davodzicca vyśviatlać situacyju ŭ siamji ŭ susiedziaŭ, u pradstaŭnikoŭ sistemy adukacyi i achovy zdaroŭja.
Pryčynami maŭčańnia achviar hvałtu jana nazyvaje bojaź jašče bolš ciažkich nastupstvaŭ ci strach stracić mužčynu‑kryŭdziciela.
Pra dapamohu žančynam i dzieciam taksama raskazaŭ psichołah, kiraŭnik słužby dapamohi hramadzianam, paciarpiełym ad nasilla, HU «Terytaryjalny centr sacyjalnaha absłuhoŭvańnia nasielnictva Pieršamajskaha rajona h. Minska» Raman Kručkoŭ.
